Thursday 3 Poush, 2071 |
Menu

अर्थ

पाँच महिनाभित्र निगमका पाँच जहाज उड्ने

(0 votes)
पाँच महिनाभित्र निगमका पाँच जहाज उड्ने
काठमाडौं - राष्ट्रिय ध्वजावाहक नेपाल वायुसेवा निगमले पाँच महिनाभित्र तीनवटा थपेर पाँच जहाजबाट आन्तरिक उडान गर्ने भएको छ। यसका लागि निगम व्यवस्थापनले त्रिभुवन अन्तर्राष्ट्रिय विमानस्थलमा लामो समयदेखि 'ग्राउन्डेड' रहेका आफ्ना तीनवटा ट्वीनअटर जहाजका ६ थान इन्जिन सम्बद्ध कम्पनीलाई दिएर नयाँ ल्याई जहाज थप्न लागेको हो।
इन्जिन साट्न निगमले अन्तर्राष्ट्रिय टेन्डर आह्वान गरिसकेको छ। 'आन्तरिक उडानलाई अझ चुस्त र विश्वसनीय बनाउन तथा बढीभन्दा बढी उडान गर्न तीनवटा जहाज थप्न लागेका हौं,' निगमका कर्पोरेट डाइरेक्टर तथा प्रवक्ता गणेशबहादुर चन्दले बुधबार नागरिकसँग भने, 'तिनै जहाज उडाउन चाहिने ६ वटा इन्जिन साट्न टेन्डर मागेका छौं।' निगमले हाल १९ सिट क्षमताका दुईवटा ट्वीनअटर जहाजबाट २६ आन्तरिक गन्तव्यमा उडान गरिरहेको छ। यिनमा अधिकांश दुर्गम भेगका गन्तव्य छन्। अब थप्न खोजिएको जहाज पनि यस्तै ट्वीनअटर नै हुन्। निगमसँग रहेका अधिकांश ट्वीनअटर ४० वर्षभन्दा पुराना हुन्। सबै क्यानडामा बनेका हुन्। 'आगामी असोजभित्र थप तीनवटासहित पाँच ट्वीनअटरबाट आन्तरिक गन्तव्यमा उडान गर्छाैं,' निगमका नायब महाप्रबन्धक गणेश ठाकुरले भने, 'त्यसपछि आन्तरिक उडानतर्फ हामी अझै बलियो हुने छौं।' आगामी जुलाई, सेप्टेम्बर र अक्टोबरमा गरी तीनवटै जहाज सञ्चालनमा आउने उनले जानकारी दिए। आफैंले इन्जिन पूणमर्मत (ओभरहल) गर्न ६ देखि आठ महिना लाग्ने भएका कारण इन्जिन साट्ने योजना ल्याइएको उनले बताए। आफ्ना पुराना इन्जिन दिएर सम्बद्ध कम्पनीले मर्मत गरी तयारी अवस्थामा राखेका इन्जिन लिने गरी टेन्डर मागिएको ठाकुरले जानकारी दिए। निगमले साट्न खोजेका ६ थान इन्जिन चालु हालतमा भने छैनन्। यिनलाई ओभरहल गरे चल्छन्। निगमले भने ट्वीनअटरका इन्जिन एउटालाई ४ हजार घन्टा उडाएपछि ओभरहल गर्दै आएको छ। इन्जिन साट्न इच्छुक इन्जिन मर्मतसम्भार ओभरहल एजेन्सीहरूका लागि टेन्डर आह्वान गरेको हो। 'पिटिए६ए–२७' इन्जिन एउटै दरमा साट्नुपर्ने सर्त निगमको छ। टेन्डर हाल्ने कम्पनीसँग यस्तो इन्जिन मर्मत/ओभरहल गर्ने क्षमता र सुविधा हुनुपर्ने पनि निगमले जनाएको छ। निगमको टेन्डर सूचना अनुसार इच्छुक कम्पनी अमेरिकाको फेडेरल एभिएसन अथोरिटी (एफएए) वा युरोपियन एभिएसन सेफ्टी एजेन्सी (इएएसए) र सम्बद्ध राष्ट्रको नागरिक उड्डयन प्राधिकरणबाट अनुमति प्राप्त हुनुपर्छ। जति परिमाणको वित्तीय प्रस्ताव पेस गर्ने हो, प्रतिष्ठित अन्तर्राष्ट्रिय बैंकबाट कुल प्रस्तावको शून्य दशमलव १ प्रतिशत ग्यारेन्टी र काउन्टर ग्यारेन्टीवापत नेपाली वाणिज्य बैंकमा धरौटी राख्नुपर्ने छ। ३० पाइलट माग जहाजसँगै पाइलट अभाव झेलिरहेको नेपाल वायुसेवा निगमले एकै पटक ३० पाइलट माग गरेको छ। आन्तरिक उडान गर्न निगमले बुधबार सूचना जारी गरी पाइलट माग गरेको हो। 'आन्तरिक उडानमा पाइलट कम छन्, र तीनवटा जहाज पनि थप्ने तयारी भएकाले पाइलट खोजेका हौं,' निगमका नायब महाप्रबन्धक गणेश ठाकुरले बुधबार नागरिकसँग भने, 'यसपालि भने राम्रैसँग आवेदन पर्ने विश्वास छ।' निगमले २० जना जुनियर क्याप्टेन र १० जना जुनियर को–पाइलट मागेको हो। आगामी ३० दिनसम्म आवेदन बुझाउन पाइने निगमले जनाएको छ। क्याप्टेनले न्यूनतम ५ सय घन्टा कमान्ड गरेर उडान गरेको हुनुपर्ने तथा को–पाइलटले दुर्गम भेगका विमानस्थलमा उडाई नेपाल नागरिक उड्डयन प्राधिकरणबाट प्रमाणित गरेर ल्याउनुपर्ने सर्त राखिएको छ। निगमले पाइलट माग गर्दै सूचना मागेको यो छैटौंपटक हो। यसअघि आर्थिक वर्ष २०६६/६७ मा पाँचपटक यस्तो आवदेन मागेको थियो। त्यसमध्ये एकपल्ट भने एउटा पनि आवेदन परेको थिएन। निगमले जुनियर क्याप्टेनलाई महिनाको १ लाख रुपैयाँभन्दा बढी तलब–भत्ता दिने योजना बनाएको छ। 'नयाँ लिइने पाइलटले सुरुमा ट्वीनअटर उडाए पनि दुई वर्षभित्र अन्तर्राष्ट्रिय उडानतर्फ ठूला जहाज उडाउन पाउँछन्,' ठाकुरले भने, 'निगममा पाइलट आकर्षित गर्ने बलियो पक्ष नै यही हो। आन्तरिक उडानमा छिरेर अन्तर्राष्ट्रिय उडान गर्ने पाइलट हुनु ठूलो अवसर हो।' उनका अनुसार नयाँ पाइलट भर्ना गरेपछि हाल उडाइरहेका पाइलटलाई बोइङ र एयरबसका जहाज उडाउन पठाइने छ। नयाँलाई भने आन्तरिकतर्फ ट्वीनअटर उडान गर्न लगाइने छ। 'एयरबससँग खरिद गर्न लागिएका दुईवटा ए३२०–२०० सिरिजका जहाज आएपछि अहिले भर्ना गरिएका पाइलटलाई त्यतातिर खटाउने योजना छ,' उनले भने, 'त्यसबेला हामीसँग दुइटा बोइङ ७५७ र चारवटा एयरबस ए३२० जहाज हुनेछन्।' निगम र एयरबसबीच दुईवटा ए३२०–२०० जहाज खरिद–बिक्रीका लागि गत चैत २३ गते समझदारीपत्रमा हस्ताक्षर भएको थियो। त्यसपछि वैशाख ९ मा प्रतिबद्धता रकम (बैना) स्वरूप एयरबसलाई ५ लाख अमेरिकी डलर पठाएकेा थियो। द्विपक्षीय समझदारीअनुसार एयरबसले निगमलाई सन् २०१५ फेब्रुअरी (२०७१ फागुन) मा पहिलो जहाज आपूर्ति गर्ने मिति दिएको छ। त्यसको दुई महिनापछि दोस्रो जहाज दिनेछ। त्यसै गरी निगमले दुईवटा जहाज भाडामा लिन पनि वैशाख ३० मा ग्लोबल टेन्डर आह्वान गरेको छ। त्यसअनुसार पाँच वर्षका लागि एयरबस ए३२०–२०० सिरिजका जहाज 'ड्राई लिज' मा लिइने छ।
आठ संस्थान ससर्त निजीकरण

आठ संस्थान ससर्त निजीकरण

काठमाडैं-बन्द अवस्थतामा रहेका आठवटा सार्वजनिक संस्थानलाई सर्त सहित निजिकरण गर्न उद्योग मन्त्रालय सहमत भएको छ। नेपाल सरकारको कम्तीमा ४९ प्रतिशत सेयर हुनेगरी व्यवस्थापन करारमा दिएर उद्योग संचालन गर्न मन्त्रालयले प्रकृया...

६ वर्षपछि निगमले नाफा कमाएर ऋण तिर्‍यो

६ वर्षपछि निगमले नाफा कमाएर ऋण तिर्‍यो

काठमाडौं- झण्डै ६ वर्षपछि नेपाल आयल निगम आफैले नाफा कमाएर इन्डियन आयल कर्पोरेसन र सञ्चय कोषको ऋण तिरेको छ। २०६५ सालमा निगम नाफामा जाँदा ऋण तिरेपछि निरन्तर घाटा बेहोर्दै आएको...

दोस्रो चिनियाँ जहाज बिहीबारबाट पोखरा उड्ने

दोस्रो चिनियाँ जहाज बिहीबारबाट पोखरा उड्ने

काठमाडौं- राष्ट्रिय ध्वजावाहक नेपाल वायुसेवा निगमले चीनबाट अनुदानमा प्राप्त दोस्रो जहाजले बिहीबारबाट नियमित व्यापारिक उडान गर्ने भएको छ। यो जहाजको पहिलो गन्तव्य पोखरा रहेको छ। पोखराका लागि दैनिक दुई उडान...

सुन्तला किसानको गुनासो, पैसा राख्ने ठाउँ छैन

सुन्तला किसानको गुनासो, पैसा राख्ने ठाउँ छैन

दारेचोक-चितवन दारेचोक तोकदाङका किसानले सुन्तला फलाएर पैसा कमाए पनि राख्ने ठाउँ नपाएको गुनासो गरेका छन्। सुन्तला पकेट क्षेत्र अवलोकन गर्न गएको कृषि विज्ञसहितको टोलीसँग स्थानीयले गत वर्ष कमाएको करिब दुई करोड...

१३ वर्षपछि नेपाल बैंक सञ्चालकको जिम्मा

काठमाडौं— नेपाल राष्ट्र बैंकले १३ वर्षपछि देशकै सबैभन्दा पुरानो बैंक यसका सञ्चालकलाई हस्तान्तरण गरेको छ। नेपाल बैंक लिमिटेडको आइतबार सम्पन्न विशेष साधारण सभाले सर्वसाधारण सेयरधनीको तर्फबाट दुईजना सञ्चालक निर्विरोध चयन...

नेपाल युरोपको उड्डयन कालोसूचीबाट हटेन

नेपाल युरोपको उड्डयन कालोसूचीबाट हटेन

काठमाडौं- नेपालको उड्डयन क्षेत्रले युरोपेली आयोगको कालोसूचीबाट बाहिर निस्किन एक वर्षदेखि गरेको प्रयास असफल भएको छ। युरोपेली आयोगले युरोपेली युनियन (इयू) भित्रका देशमा उडान सञ्चालन गर्न निषेध गरिएको 'ईयु हवाई...

अस्थायी हेलिप्याड (एभटर्फ) को परीक्षण

अस्थायी हेलिप्याड (एभटर्फ) को परीक्षण

काठमाडौं- त्रिभुवन अन्तर्राष्ट्रिय विमानस्थलमा एक विदेशी कम्पनीले हेलिकोप्टर अवतरणमा प्रयोग गरिने अस्थायी हेलिप्याड ‘एभटर्फ' को परीक्षण गरिएको छ। डेनमार्कको एभरग्रिन एभिएसन कम्पनीले गत शुक्रबार राख्‍न र झिक्न मिल्ने एभटर्फ हेलिप्याडको...

लगानीका लागि नेपाल 'भर्जिन ल्यान्ड'

लगानीका लागि नेपाल 'भर्जिन ल्यान्ड'

काठमाडौं- प्रधानमन्त्री सुशील कोइरालाले लगानीका लागि नेपाल 'भर्जिन ल्यान्ड' भएको बताएका छन्। निर्माण व्यवसायी महासंघको १७ औं साधारणसभा तथा निर्वाचन कार्यक्रमलाई सम्बोधन गर्दै कोइरालाले नेपालमा लगानीको क्षेत्र व्यापक भएको बताए।