अनशनको १६ औं दिन

अझै देखेन सरकारले

शुक्रबार, २४ मङि्सर २०७३, ०७ : ४५ नागरिक


जितेन्द्रकुमार झा/मिथिलेश यादव

राजविराज/लहान- नेपाल सद्भावना पार्टी (गजेन्द्रवादी) का नेता विकास तिवारीले राजविराजस्थित गजेन्द्रनारायण सिंह सगरमाथा अञ्चल अस्पताल परिसरमा अनशन सुरु गरेको १६ दिन पुगे पनि उनका मागप्रति सरकारले वास्ता गरेको छैन।

राज्यको बेवास्ताले कुनै बेलाको व्यवस्थित सगरमाथा अञ्चल अस्पताल 'रेफरल सेन्टर' मा परिणत भएको भन्दै सुधारका लागि उनले मंसिर ८ देखि आमरण अनशन थालेका हुन्। 

राज्यको निरीहता र प्रशासनको हैकमवादी रबैयाले अस्पतालको अवस्था दयनीय भएको उनले बताए।

छोराको उपचारकै क्रममा तिवारीले असोज ३ गते विभिन्न मागसहित अस्पताल प्रशासनलाई पहिलो ज्ञापनपत्र बुझाए। त्यसयता अनशन थाल्नुअघिसम्म उनले चारपटक ज्ञापनपत्र बुझाए पनि उनको माग सुनुवाइ भएन।

'गरिब, विपन्न र अन्यत्र पहुँच नभएका मात्रै यस अस्पतालमा उपचार गराउन आउने हुँदा नेता र ठूलाबडाले चासो व्यक्त गर्न छाडेका छन्,' उनले भने।

अस्पताल सुधारका लागि तिवारीले २६ बुँदे माग अघि सारेका छन्। यसमा अस्पतालमा भइरहेको आर्थिक अनियमितता छानबिनदेखि आवश्यक जनशक्ति, भौतिक पूर्वाधार, सरसफाइ, बिरामीको खानाको गुणस्तरलगायत छन्।

भदौ २९ गते तिवारी र उनकी पत्नी १६ महिने छोरा सौर्यन आर्सको उपचारका लागि अञ्चल अस्पताल पुगेका थिए। निमोनियाबाट पीडित छोराको उपचारका निम्ति उनी १० दिन अस्पताल बसे। '१० दिनको बसाइमा अस्पतालमा भोग्नुपरेको पीडा १६ दिनको भोकहडतालभन्दा बढी थियो,' तिवारीले भने, 'त्यति बेलै मैले यस्तो पीडा अरू अभिभावकले भोग्नु नपरोस् भनेर त्यसका लागि प्रयास गर्ने प्रण गरेँ।'

निमोनिया उपचार क्रममा बालरोग चिकित्सक डा. सरोजकुमार यादवले छोरालाई दिनको चारपटक 'नेमोलाइज' गर्न भनेकोमा अस्पतालमा उक्त सुविधासमेत नपाएको तिवारीले बताए। 'डा. यादवले नेमोलाइज गर्न २५ रुपैयाँको औषधि लाग्ने बताए पनि त्यो समेत पाइएन,' उनले भने।

यसबारे निमित्त मेडिकल सुपरिटेन्डेन्ट डा. दिलीप साहलाई सोध्दा पनि समस्या समाधान नभएको, अस्पतालको सरसफाइ तथा बिरामीलाई दिने खानाको गुणस्तर तथा परिमाणमा अनियमितता रहेको तिवारीको भनाइ छ।

छोराको उपचारकै क्रममा तिवारीले असोज ३ गते विभिन्न मागसहित अस्पताल प्रशासनलाई पहिलो ज्ञापनपत्र बुझाए। त्यसयता अनशन थाल्नुअघिसम्म उनले चारपटक ज्ञापनपत्र बुझाए पनि उनको माग सुनुवाइ भएन।

अञ्चल अस्पतालको बेथिति छानबिन गर्न डा. गोविन्द केसीको संयोजकत्वमा उच्चस्तरीय समिति बनाउनुपर्ने, आफूले उठाएका अन्य माग पूरा गर्नुपर्ने र त्यो जानकारी दिन स्वास्थ्यमन्त्री गगन थापा आउनुपर्ने मागमा उनी अडिग छन्।

तिवारीले भने, 'जनताले सरकारी स्वास्थ्य सेवा सुलभ रुपमा पाउनुपर्छ भन्ने उद्देश्यले अनशन थालेको हुँ, त्यो पूरा नभएसम्म बसिरहन्छु।'

सप्तरी नागरिक सञ्जालका अध्यक्ष सुखराम यादव  तिवारीले सामूहिक हितका मुद्दा उठाएर सत्याग्रह थालेको बताउँछन्। उनी भन्छन्, ‘आफ्नो जीवन दाउमा लगाएर दुनियाँको हितका लागि लड्ने व्यक्ति मधेसमा थोरै छन्।’

 राष्ट्रिय मानवाधिकार आयोग, नागरिक समाज सप्तरी, नागरिक सञ्जाल सप्तरी, मधेसी नागरिक समाज सप्तरी, गैरसरकारी संस्था महासंघ, संयुक्त मधेसी लोकतान्त्रीक मोर्चा लगायतले तिवारीको ज्यान रक्षाका लागि उनले उठाएका माग अविलम्ब सम्बोधन गर्न सरकारलाई आग्रह गरेका छन्।  राजविराजस्थित विभिन्न उच्चमावि तथा क्याम्पसका विद्यार्थीले दिनहुँ तिवारीको समर्थनमा र्‍याली प्रदर्शन गर्दै आएका छन्।

को हुन् विकास तिवारी?

सप्तरी, डाढाका ४५ वर्षीय  तिवारीका बुवा तरुणकुमार तिवारी स्वर्गीय गजेन्द्रनारायण सिंहले स्थापना गरेको सप्तरी सेवा आश्रमका संस्थागत अध्यक्ष थिए।

  विद्यार्थीकालदेखि नै गजेन्द्रबाबुको विचारधाराबाट प्रेरित भई राजनीतिमा लागेको तिवारीको भनाइ छ। तिवारी पाटन क्याम्पसमा स्नातकमा पढ्दै गर्दा नेपाल विद्यार्थी सद्भावना मञ्चको संस्थापक सदस्य भए। २०५० सालमा उनी मञ्चको केन्द्रीय अध्यक्ष चुनिए। पछि उनी  सद्भावना पार्टीको केन्द्रीय कार्यालय सचिव  हुँदै केन्द्रीय सदस्य र सहमहासचिव भए। गजेन्द्रनारायण सिंहको निधनपछि पार्टीमा विवाद हुँदा केही समय उनले पार्टी कार्यवाहक अध्यक्ष भएरसमेत काम गरे।

 आठ वर्षअघि तिवारीले आफ्नै नेतृत्वमा नेपाल सद्भावना पार्टी (गजेन्द्रवादी) स्थापना गरेका हुन्। पार्टी स्थापनापछि तिवारीले हुलाकी राजमार्ग निर्माणका लागि २०६६ चैत २० देखि झापाको गौरिगन्जबाट कञ्चनपुर जिल्लाको महेन्द्रनगरसम्म १ हजार १ सय ५० किलोमिटर लामो पदयात्रा गरे। उनको पदयात्रा २०६७ जेठ १६ गते पूरा भएको थियो।

 २०६८ चैत २८ देखि राजविराज–भारदह सडक निर्माणका लागि उनले आन्दोलनको अगुवाइ गरेका थिए। प्रहरीले पक्राउ गरेपछि जिल्ला प्रहरी कार्यालयमै उनी ४८ घन्टासम्म भोक हडतालमा बसेपछि उनलाई छाडिएको थियो।

 तिवारी २०६९ चैत १५ देखि २०७० वैशाख ४ सम्म विभिन्न मागसहित २१ दिनसम्म राजविराजमा अनश्ान बसेका थिए।

मधेसका जिल्लामा लोकसेवा आयोग कार्यालय स्थापना गर्नुपर्ने, सरकारी कार्यालयको गतिविधि पारदर्शी हुनुपर्ने, जिल्लाका सडक निर्माण गर्नुपर्नेलगायत माग राखी उनले थालेको अनशन तत्कालीन सिँचाइ मन्त्री उमाकान्त झासँग वार्तापछि टुंगिएको थियो।







यसमा तपाईको मत

तपाईंको रुचि अनुसारको समाचारको लागि खाता खोल्नुहोस् ।

अन्य समाचार

‘पद्मावती’ विवाद

‘पद्मावती’ विवाद

महंगो सेटमा फिल्म बनाउन माहिर बलिउड निर्देशक सञ्जय लीला भन्सालीको फिल्म ‘पद्मावती’को फष्र्टलुक सार्वजनिक हुनासाथ फिल्मकर्मीदेखि दर्शकसम्मले फष्र्टलुकको तारिफ गरे...

फूलमानको ‘नीरफूल’मा म्यान्मारका राजदूत दम्पती

फूलमानको ‘नीरफूल’मा म्यान्मारका राजदूत दम्पती

सञ्चारकर्मी फूलमान बलको निर्देशन रहेको फिल्म ‘नीरफूल’मा म्यान्मारका राजदुत ऊ लिउन ऊ देखिने भएका छन् । भूकम्पले तितर वितर पारेको...

दसैंका गीतमा पीडा

दसैंका गीतमा पीडा

वाल्यकालमा औंला भाँँच्दै धेरैले यही गीत गाउँदै दसैंलाई निम्ता दिन्थे । यो गीत गाउँदा घरमै दसैं आइसकेको धेरैलाई आभाष हुन्थ्यो...

तीन फिल्मसँग आउँदै ‘तान्द्रो’

तीन फिल्मसँग आउँदै ‘तान्द्रो’

आगामी कात्तिक २४ गते ‘सकस’, ‘रोमियो’ र ‘मेला’ रिलिज हुने चर्चा चलिरहँदा यही मितिमा अर्को फिल्म ‘तान्द्रो’ पनि रिलिज हुने...