थ्री स्टारलाई क्षतिपूर्ति दिन समिति

बुधबार, २७ पुष २०७३, १० : ४५ अजय फुयाल

काठमाडौं–समयमा टिम दर्ता नगराएका कारण एएफसी कप प्लेअफ खेल्नबाट बञ्चित भएको नेपाली राष्ट्रिय लिग च्याम्पियन रुस्लान थ्री स्टार क्लबलाई क्षतिपुर्ति पाउन अझै कुर्नुपर्ने भएको छ ।

अखिल नेपाल फुटबल संघ (एन्फा) को मंगलबार वसेको कार्यसमिति वैठकले क्षतिपुर्तिको विषयमा निर्णय गर्ने अपेक्षा गरिए पनि एन्फाले भने तत्काललाई क्षतिपुर्ति दिनका लागि समितिमात्र बनाएको छ ।

मंगलबार सातदोबाटोस्थित मुख्यालयमा बसेको एन्फा बैठकले अध्यक्ष नरेन्द्र श्रेष्ठको संयोजकत्वमा थ्री स्टारलाई क्षतिपुर्ति दिने समिति बनाएको छ । समितिको सदस्यमा एन्फाका वरिष्ठ उपाध्यक्ष मणि कुँवर, महासचिव धिरेन्द्र प्रधान र प्रमुख कार्यकारी अधिकृत (सिइओ) इन्द्रमान तुलाधर सदस्य छन् ।

‘थ्री स्टारलाई उचित क्षतिपुर्ति दिने निर्णय भएको छ । थ्री स्टारले हाम्रो निर्णय आउनुअघि युवा तथा खेलकुद मन्त्रालय र राष्ट्रिय खेलकुद परिषद (राखेप) मा निवेदन दिएको छ र राखेपले छानविन समिति समेत बनाइसकेको छ,’ एन्फाका सिइओ तुलाधरले भने, ‘त्यसैले हामीले अहिल्यै क्षतिपुर्तिवारे निर्णय गर्न सकेनौं । अव हामी मन्त्रालय, राखेप र थ्री स्टारसँग समन्वय गरेर उचित क्षतिपुर्ति प्रदान गर्नेछौं । अहिल्यै हामीले एउटा निर्णय गरे मन्त्रालय, राखेप वा थ्री स्टारसँग राज बाझ्न सक्छ । सबैसँग समन्वय गरेर गर्दा त्यस्तो खतरा हुँदैन ।’

आफ्नो मिहिनेतको बलमा पाएको एएफसी कप प्लेअफ खेल्ने अधिकारबाट एन्फाको लापरवाहीका कारण विमुख भएपछि थ्री स्टारले पत्रकार सम्मेलन गरेर ६ करोड रुपैयाँ क्षतिपूर्तिका साथै दोषीमाथि कारबाहीको माग गरेको थियो । क्लबले माग पूरा नभएसम्म फुटबल नखेल्ने घोषणा गरेको थियो ।

भदौमा मंगोलियामा सम्पन्न एएफसी कप प्लेअफ छनोटअन्तर्गत समूह ‘बी’ को च्याम्पियन बन्दै थ्री स्टार अघिल्लो चरणलाई छानिएको थियो । प्रारम्भिक छनोटको आफ्नो समूहमा दुई खेलबाट ४ अंक जोड्दै शीर्ष टोलीका रूपमा थ्री स्टार छानिएको हो । अन्य सहभागी मंगोलियाको इर्चिम एफसी ३ अंकसाथ दोस्रो तथा कम्बोडियाको नागावल्र्ड क्लब १ अंकसाथ पुछारमा समेटिएका थिए । समूहको शीर्ष टोली स्वतः प्लेअफमा छानिने प्रस्ट प्रावधान भए पनि एन्फाको गल्तीका कारण थ्री स्टारको ठाउँमा उपविजेता इर्चिमले प्लेअफ खेल्ने मौका पाएको थियो ।

एएफसीको बारम्बार ताकेताका बावजुद एन्फाले समयसीमाभित्र क्लब तथा टिम दर्ता नगराएका कारण थ्री स्टार प्लेअफ खेल्नबाट वञ्चित भएको थियो ।
यसैगरी एन्फा वैठकले गतवर्ष मृत्यु भएका तत्कालिन कार्यवाहक अध्यक्ष ललितकृष्ण श्रेष्ठ संयोजक रहेको प्राविधिक समितिमा नेतृत्वको जिम्मेवारी वरिष्ठ उपाध्यक्ष कुँवरलाई दिएको छ भने केन्द्रिय सदस्य वशन्त अर्यालको ठाउँमा फुटसल समितिमा अर्का केन्द्रिय सदस्य रमेश रायामाझीलाई संयोजक तोकेको छ । एन्फा अन्तर्गत रहेका प्रतियोगिता, युवा, महिला, कानुनलगायतका अन्य स्थायी कमिटीहरुमा पनि रिक्त पद पुर्ति गरिएको सिइओ तुलाधरले नागरिकलाई जानकारी गराए ।

क्षेत्रीय फुटबल विकास समितिको हकमा मध्यमाञ्चल र पश्चिमाञ्चलमा केन्द्रिय कार्यसमितिको वैठकले नेतृत्व परिवर्तन गरेको छ । मध्यमाञ्चल अध्यक्षमा अनिलबन्धु रुपाखेतीको ठाउँमा नेपाल कार्कीलाई नियुक्त गरिएको छ भने पश्चिमाञ्चलमा विश्व पौडेललाई खेम गुरुङले स्थानान्तरण गरेका छन् । दुई साताअघि एएफसीको प्रस्तावमा एसियन कपको तेस्रो चरण खेल्न पाएको अवसर स्विकार्ने अध्यक्षको निर्णयलाई पनि वैठकले अनुमोदन गरेको छ ।

त्यस्तै पोखराको सहारा क्लबलाई एकेडेमी सञ्चालन गरेवापत वार्षिक रुपमा दिइने गरेको ५० हजार रुपैयाँ अनुदानलाई निरन्तरता दिने निर्णय गरेको छ । देशका विभिन्न स्थानबाट अनाथ, असहाय तथा आर्थिक रुपले विपन्न वालवालिकालाई एकेडेमीमा राखेर शिक्षासँगै फुटबल प्रशिक्षण गराएर राम्रो खेलाडी उत्पादनमा निरन्तर लागिरहेको भन्दै एन्फाले अनुदानलाई निरन्तरता दिने निर्णय गरेको बताइएको छ ।
यसैगरी केही दिनअघि मृत्यु भएकी राष्ट्रिय महिला खेलाडी ममता सिकेको परिवारलाई ५० हजार रुपैयाँ दिने निर्णय गरेको तुलाधरले जानकारी गराए ।
 









यसमा तपाईको मत

Loading...

तपाईंको रुचि अनुसारको समाचारको लागि खाता खोल्नुहोस् ।

अन्य समाचार

धुर्मस र सुन्तली पुनर्निर्माण सद्भावना दूत नियुक्त

धुर्मस र सुन्तली पुनर्निर्माण सद्भावना दूत नियुक्त

राष्ट्रिय पुनर्निर्माण प्राधिकरणले कलाकार सीताराम कट्टेल(धुर्मुस) र कुञ्जना घिमिरे(सुन्तली)लाई सद्भावना दूत नियुक्त गरेको छ। ...

भैरहवाको ‘नेपाल फोटो प्रर्दशनी’ २० हजारद्वारा अवलोकन

भैरहवाको ‘नेपाल फोटो प्रर्दशनी’ २० हजारद्वारा अवलोकन

फोटो पत्रकार क्लब(पिजे क्लब)को आयोजना तथा सिद्धार्थ होटल एशोसियसन सान र रुपन्देही क्रिकेट संघको सहयोगमा भैरहवामा चार दिनसम्म प्रदर्शन भएको...

मधेश–पहाड जोड्दै धुर्मुस–सुन्तली

मधेश–पहाड जोड्दै धुर्मुस–सुन्तली

भूकम्पपीडितका नागरिकको पुर्नवासका एकीकृत बस्ती निर्माण गरेर उल्लेखनीय योगदान गरेका चर्चित हास्यव्यङग्य कलाकार जोडी सीताराम कट्टेल ‘धुर्मुस’ र कुन्जना घिमिरे...

जीवन शैली बदल्ने किताब

जीवन शैली बदल्ने किताब

बागमती सफाइ महाअभियानका अभियन्ता एवं लाइफ कोच डा. राजु अधिकारीको ‘यस्तो होस् जीवनशैली’ नामक किताब राजधानीमा विमोचन गरिएको छ ।