काडमाडौं– प्रहरीले अपराध नियन्त्रण, अनुसन्धान र शान्ति सुरक्षा कायम राख्न सर्वसाधारणको समान सहभागिता र सहकार्यका लागि ‘प्रहरी मेरो साथी’ अभियान संचालनमा ल्याएको छ । गृहमन्त्री शक्तिबहादुर बस्नेतले सोमबार एक औपचारिक कार्यक्रमका बिच अभियानको सुरुवात गरेका हुन्। प्रहरी मेरो साथी संकेत चिन्हको अनावरण पछि गृहमन्त्री बस्नेतले  कार्यक्रमले प्रहरी संगठनको छवी, प्रतिष्ठा र कार्यसम्पादनलाई थप प्रभावकारी बनाउन सहयोग पुग्ने बताए ।

प्रहरीले घटना पछि पहिलो सुचना सर्वसाधारणबाट पाउने, अभियुक्तका सम्बन्धमा सुराकी र घटनास्थलको सुरक्षा समेतमा सर्वसाधारणको सहयोग अपरिहार्य रहेको सन्र्दभमा योजनावद्ध रुपमै प्रहरी मेरो साथी सञ्जाल स्थापना अभियान अन्र्तगत गर्नेछ । कार्यक्रममा बोल्दै गृहमन्त्री बस्नेतले राज्य र नागरिक बिचको दुरी घटाउन प्रहरी नै सहज र मजबुत माध्यम भएको बताए । उनले अभियानलाई सफल बनाउन सबैको सहयोगको अपेक्षा समेत गरे ।

प्रहरी महानिरीक्षक उपेन्द्रकान्त अर्यालले अभियान २०३९ देखि संचालनमा रहेको सामुदायिक प्रहरीको अवधारणाकै एउटा ब्यापक स्वरुप भएको बताए । उनले प्रहरीले संचालन गरेका विभिन्न कार्यक्रम र अभियानलाई एउटै छातामुनि ल्याउन अभियान सहायक हुने बताए ।

प्रहरी मेरो साथी अभियानका परिकल्पनाकार डिएसपी विश्व अधिकारीले दुर्गम स्थानमा प्रहरी पुग्नु अगावै प्रहरीका साथी पुग्नसक्ने र सुचनादेखि सर्वसाधारणमा केही धुमिल भएको छबी  सुर्धान कार्यक्रम संचालन हुने बताए । उनले प्रहरीका सवै कार्यक्रमहरुलाई प्रहरी मेरो साथीको एउटै अवधारणमा आवद्ध गर्नु, शान्ति सुरक्षा कायम गर्नमा नागरिकको भूमिकाका बिषयमा प्रशिक्षण तथा चेतनामूलक कार्यक्रमहरुको माध्ययमबाट अपराध न्यूनीकरण गर्नु, देशभरी प्रहरीका साथीहरुको सञ्जाल बनाई आवश्यक सम्पर्क र सहकार्य गर्नु कार्यक्रमको उद्देश्य रहेको बताए ।

दुई प्रहरी सम्मानित

गृहमन्त्री शक्तिबहादुर बस्नेतले पहिरोमा फसेका बालबालिकालाई ज्यान जोखिममा राख्दै उद्दार गर्ने दुई प्रहरीलाई सम्मान गरेका छन । असार १८ गते धादिङको ‘रि’ गाविसको चेप्राङ गाउँमा पहिरो गइरहेको अवस्थामा पहिरोमा फसेका अपाङ्ग बालबालिकासहित १४ जनालाई सकुशल उद्धार गर्ने प्रहरी हवल्दार रुद्र बहादुर कुमाल र प्रहरी जवान संदिप कुमाललाई नगद पुरस्कार तथा प्रशंसापत्र प्रदान गरेका हुन ।

प्रहरीले आदेश होइन कर्तब्यको पालना गर्छः महानिरीक्षक अर्याल

प्रहरी महानिरीक्षक उपेन्द्रकान्त अर्यालले प्रहरीले माथिको आदेश होईन आफ्नो काम, कर्तब्य र अधिकार अनुसार कार्यगर्ने बताएका छन । प्रहरी मेरो साथी अभियानको शुभारम्भमा बोल्दै अर्यालले प्रहरीलाई नयाँ अवधारणा अनुसार स्थापित गर्ने जिम्मेबारी आफ्नो भएको बताउदै अबको प्रहरीले आदेश मानेर बस्ने अवस्था नरहेको बताए । उनले भने ‘प्रहरी नयाँ धरातलमा उभिएर अघि बढन र स्थापित हुन प्रयासरत छ, सक्रमणकालिन अवस्थामा प्रहरीको भुमिका र जिम्मेबारी फरक हुन्छन, माथिको आदेश होईन काम, कर्तब्य र अधिकारको पालना गर्ने हो,’ ।

प्रकाशित: २७ असार २०७३ १४:२२ सोमबार