एकै हिरासतमा चक्रे र मनाङे

बुधबार, २७ बैशाख २०७४, ०८ : ३० केपी ढुंगाना  | @kpdhungana


काठमाडौं – एकअर्काका प्रतिस्पर्धी दिपक मनाङे र चक्रे मिलन आपराधिक गतिविधिमा संलग्न रहेको अभियोगमा पटकपटक पक्राउ परे । तर, कहिल्यै एकै हिरासतकक्ष र जेलमा परेनन् । स्थानीय तह निर्वाचनमा सुरक्षा चुनौती बढाएको भन्दै पक्राउ परेका उनीहरू मंगलबारबाट भने महानगरीय प्रहरी परिसरको एकै हिरासतकक्षमा पुगेका छन् ।

 ठमेल क्षेत्रबाट पक्राउ परेका मनाङे आइतबारबाट सार्वजनिक अपराधको अभियोगमा टेकुमा रहेको परिसरको हिरासतमा थिए । चक्रपथको आफ्नै घरबाट पक्राउ परेका चक्रे पनि मंगलबारबाट मनाङे रहेकै हिरासतमा पुगेका छन् ।

मनाङे उपनामले परिचित दिपक गुरुङ र चक्रे उपनामले परिचित मिलन गुरुङको पृष्ठभूमि र उदयकाल एकै हो । संगठित गुन्डागर्दीका नाइकेका रुपमा २०४६ पछि दुवैको प्रभाव देखिएको हो काठमाडौंमा । ठमेल कार्यक्षेत्र बनाउँदै मनाङेले आम्दानीको स्रोतको रूपमा रात्रीकालीन व्यवसायलाई रोजे । चक्रेले चक्रपथलाई कार्यक्षेत्र बनाएर ठेक्कापट्टा, बालुवा र ढुंगाखानीलाई आयआर्जन गर्ने माध्यम बनाए ।

यी दुवैको प्रारम्भको समय पनि एकै हो, २०४६ । चक्रेले नेकपा एमालेको साथ लिएर आफ्नो प्रभाव बढाए । मनाङेले कहिले राष्ट्रिय प्रजातन्त्र पार्टीको साथ लिए कहिले नेपाली कांग्रेसको ।

आपराधिक गतिविधिबाट अकुत सम्पत्ति आर्जन गरेको मद्दा खेप्दै आएका उनीहरू आपराधिक यात्रामा दर्जनौं पटक पक्राउ परे । तर कहिल्यै एकसाथ जेल बसेनन् । मनाङेले जेल जीवनका लागि सधैँ डिल्लीबजार रोजे । चक्रेले केन्द्रीय कारागार ।

कार्यक्षेत्र विवादमा यी दुवै समूहबीच बारम्बार ग्याङफाइट भइरहन्थ्यो । कट्टर दुस्मनका रुपमा परिचित दुवैबीच दुश्मनीका कारण चक्रेमाथि मनाङे समूहले तरबार हान्दा उनको हातै छिन्नु थियो । चक्रेको हात जोडिए पनि अहिले सामान्य काम मात्र गर्न सक्छ ।

स्थानीय तहको निर्वाचनले भने यी दुवैलाई एकै थलो जुराइदिएको छ, काठमाडौं परिसरको हिरासतकक्ष । स्थानीय तह निर्वाचनमा समूह नै परिचालन गरेर निर्वाचन सुरक्षामा प्रभाव पार्न सक्ने भन्दै काठमाडौं परिसरले आइतबार पक्राउ गरेको मनाङे र महानगरीय प्रहरी अपराध महाशाखाले मंगलबार चक्रपथबाट पक्राउ गरेको चक्रे मंगलबार बेलुकाबाट एकै कोठामा एउटै ओछ्यान बाँडेर बसेका छन् ।

‘अहिले मनाङे र चक्रे काठमाडौं परिसरको एउटै हिरासतकक्षमा छन्,’ महानगरीय प्रहरी अपराध महाशाखाका प्रमुख एसएसपी दिनेश अमात्यले भने‘ दुवैमाथि निर्वाचन सुरक्षामा चुनौती बढाएको अभियोग छ ।’

काठमाडौंको चक्रपथमा बस्दै आएका चक्रेलाई महाशाखाको टोलीले उनको घरैमा पुगेर पक्राउ गरेको हो । उनलाई पक्राउ गर्न महाशाखाबाट डिएसपीको कमान्डमा प्रहरी टोली घरमै पुगेको थियो । लागुऔषध र अवैध हतियारको अभियोग पुष्टिसँगै पाँच वर्ष केन्द्रीय कारागारमा बिताएर मुक्त भएका थिए उनी । प्रहरी इन्काउन्टरमा दिनेश अधिकारी चरी र कुमार घैंटेको मृत्यु भएपछि उनी पछिल्लो समय निस्क्रिियझैं देखिए पनि प्रहरी विश्लेषणमा ठेक्कापट्टा कब्जामा उत्तिकै सक्रिय रहेको उल्लेख छ ।

विशेष अदालतमा सम्पत्ति शुद्धिकरण मुद्दा खेपिरहेका उनी नेकपा एमालेनिकट मानिन्छन् । एमाले नेता प्रदिप नेपालसँग उनको पारिवारिक सम्बन्ध छ । ७ वर्ष अगाडि कारागारमुक्त भएपछि एमालेको युथ फोर्समार्फत राजनीतिमा सक्रिय हुने योजनामै रहेको बेला उनी हतियार र लागुऔषधसहित पक्राउ परेका थिए । 

कहिले सार्वजनिक अपराध त कहिले सम्पत्ति शुद्धिकरणको मुद्दामा पक्राउ पर्दै जेल बस्दै मुक्त हुँदै आएका मनाङे स्थानीय तह निर्वाचन अगाडि राप्रपा नेपालमा प्रवेश गरेका थिए । राप्रपासँगको एकता महाधिवेशनमा उनी मनाङको जिल्ला अध्यक्षमा चयन भएका थिए । काठमाडौंमा राप्रपाका उपमेयर राजाराम श्रेष्ठलाई सघाउन खटिएका उनी आइतबार बेलुका पक्राउ परे ।

दुवैमाथि प्रहरीमा कुनै आपराधिक उजुरी भने दर्ता छैन । चक्रे पक्राउ गर्ने महाशाखाका एसएसपी अमात्य र मनाङे पक्राउ गर्ने काठमाडौं परिसरका एसएसपी छविलाल जोशी ‘ चुनावमा गुन्डा समूह परिचालन गर्न सक्ने देखिएकाले उनीहरू पक्राउ परेको’ बताउँछन् । 

एक सय २२ निगरानीमा, ४७ पक्राउ
सरकारले स्थानीय तह निर्वाचनको मिति घोषणा गरेसँगै महाशाखा र महानगरीय प्रहरी परिसर काठमाडौैंले १ सय २२ जनाको सूची बनाएको थियो । व्यक्ति र समूहको प्रभावका आधारमा ए,बि, सि, डि समूहमा विभाजन गरिएकोमा आइतबार पक्राउ परेका मनाङे समूह ए को पहिलो नम्बरमा थिए भने चक्रे तेस्रो नम्बरमा ।

दोस्रो नम्बरका समिरमानसिंह बस्नेत, चौथो नम्बरमा राजु गोर्खाली, पाँचौमा गणेश लामा, छैटोेंमा सुकबहादुर लामा (बाघे), साजन महर्जन, सरोज थापा, सुजन पौडेल, विश्वक्रान्ति सिंह, तेजेन्द्र गुरुङ र काजी शेर्पाको नाम छ ।

पहिलो सूचीका विश्वक्रान्ति र सुजन जेलमा छन् । पहिलो सूचीमा रहेकामध्ये प्रहरीले साजन र तेजेन्द्रलाई पक्राउ गरेको थियो । एमालेनिकटका साजन पक्राउ परेको तेस्रो दिनमै हिरासतमुक्त भए भने दाइ चक्रे एमालेनिकट भए पनि कांग्रेसतिर लागेका भाइ तेजेन्द्रलाई प्रहरीले पक्राउ गरेर २४ घन्टासमेत नियन्त्रणमा राख्न सकेन । सत्ताधारी दल फोरम लोकतान्त्रिकका केन्द्रीय सदस्य रहेका गणेश लामा चुनावी प्रचारमा व्यस्त छन् । कांग्रेस समर्थक गोर्खालीसमेत चुनावमै व्यस्त छन् ।

प्रहरीको दोस्रो सूचीका ३० जनामध्ये दावा लामालाई एक महिनाअघि गोली लागेको थियो । घटनाको अनुसन्धान अझै सकिएको छैन । प्रवेश श्रेष्ठ, रमेश सुनुवार, मुखिया घले, चन्द्र लामा, सञ्जय डंगोल, सञ्जिव लामा, पञ्चे लामा, उमेश लामा, रेन्बो गुरुङ, राधे भण्डारीलगायत चुनावी सुरक्षाका चुनौती हुन् ।

यही सूचीमा रहेका निराजन पौडेल भने प्रहरी हिरासतमा छन् । प्रहरीले सि ग्रेडमा ४७ जना र डि मा ३३ जनालाई राखेको थियो । 

प्रहरीले सूचीअनुसार मंगलबारसम्ममा ४७ जनालाई पक्राउ गरिसकेको छ । ४७ जना पक्राउ परे पनि प्रहरी हिरासतमा भने ६ जना मात्रै छन् । 

‘प्रहरीको सूचीमा रहेका कोही उपत्यकामा छन् भने उनीहरू ढिलोचाँडो प्रहरी हिरासतमा आउँछन्,’ एसएसपी अमात्यले भने‘ हाम्रो मुख्य चासो चुनावी सुरक्षा हो, चुनावमा बाहुबल प्रयोग गर्नसक्ने पक्राउ पर्छन् ।’

 







यसमा तपाईको मत

तपाईंको रुचि अनुसारको समाचारको लागि खाता खोल्नुहोस् ।

अन्य समाचार

तिहारलाई कोसेली ‘रानी’ र ‘रुद्रप्रिया’

तिहारलाई कोसेली ‘रानी’ र ‘रुद्रप्रिया’

तिहारलाई लक्षित गर्दै बिहीबार अर्थात लक्ष्मीपूजाको दिनबाट दुई फिल्म ‘रुद्रप्रिया’ र ‘रानी’ प्रदर्शनमा आउँदैछन् । चाडबाडलाई लक्षित गरी फिल्म प्रदर्शन...

कार्यक्रमको सभापति नै आलु  !

कार्यक्रमको सभापति नै आलु !

कुनै पनि औपचारिक कार्यक्रममा उद्घोषकले विशिष्ट व्यक्तिलाई प्रमुख अतिथी वा सभापति राखेर कार्यक्रम सञ्चालन गर्छन् । तर, मंगलबार यस्तो परम्पराभन्दा...

विप्लवको ‘अभिजित’

कवि तथा गीतकारका रूपमा परिचित विप्लव प्रतीक उपन्यासकारको रूपमा पाठक माझ आउने भएका छन् । ‘अविजित’ शीर्षकको उपन्यास कात्तिक ११...

कल्पना जयन्ती, तथ्य स्मृति

कल्पना जयन्ती, तथ्य स्मृति

आज धार्मिकहरूका लागि लक्ष्मीपूजा मात्र होइन, साहित्यिकहरूका लागि महाकवि लक्ष्मीप्रसाद देवकोटा जयन्ती पनि हो । वर्षाैंदेखि हामी देवकोटालाई आजका दिन...