काठमाडौं – युटुबमा एउटा गीत अहिले हिट छ । गीतको बोल छ, ‘अनि किन ल्याङ ल्याङ गर्दैछौ मैया ?’ ।
यो गीतको कभर भिडियोहरु पनि बनिसकेका छन् । तर, यसको ओर्जिनल भिडियो पनि सार्वजनिक भएको छैन ।
अब, भने केही समयमै दर्शकले यो गीतको भिडियो हेर्न पाउने भएका छन् । चलचित्र ‘रोमियो’मा समावेश यो गीतको भिडियोको छायांकन बिहीबारबाट सुरु गरिएको छ ।
काठमाडौको ठमेलमा रहेको एक डान्स क्लबमा यो गीतको भिडियो छायांकन गरिएको हो ।
८० जना भन्दा बढी कोरसका साथमा चलचित्रका नायक हसनराजा खान र नव–नायिका ओसिमा बानुले गीतमा नृत्य गरेका थिए । साथमा, अभिनेत्री अशिष्मा नकर्मी र अभिनेता संजोग कोइराला पनि गीतको भिडियोमा देखिनेछन् ।
निर्माता तथा नायक हसनले गीतको अडियो हिट भइसकेकाले भिडियोे हिट बनाउनु पर्ने चुनौती रहेको बताए । ‘अडियो हिट भैसकेकाले हामीलाई भिडियो पनि उत्कृष्ट बनाउनुपर्ने चुनौती छ । यसैले, सोही अनुसार मिहिनेत गरेर भिडियो तयार पार्न लागिपरेका छौं,’ उनले भने ।
गीतमा सहिमा श्रेष्ठ र सुनिल पाण्डेको स्वर छ । गीतको संगीत पनि सुनिल पाण्डेले नै तयार गरेका हुन् । फिल्ममा निर्देशन शंकर कार्कीका रहेको छ । रामेश्वर कार्कीको छायांकन रहेको फिल्मको गीतलाई गम्भिर बिष्टले कोरियोग्राफी गरेका छन् ।
अशिष्मा र संजोग यही गीतको भिडियोमा मात्र देखिनेछन् । फिल्ममा हसन, निशा अधिकारी, मेलिना मानन्धर र ओसिमा बानुलाई दर्शकले मुख्य भूमिकामा देख्नेछन् । कात्तिक १७ गतेबाट फिल्म देशभरका हलमा रिलिज हुनेछ ।
प्रकाशित: ९ असार २०७४ ०६:४५ शुक्रबार