सुर्खेत— स्थानीय तहमा निर्वाचित जनप्रतिनिधिले आफ्नो सुविधा बढाउन आफूखुसी निर्णय गर्न थालेका छन्। पश्चिमको चौकुने गाउँपालिकाले जनप्रतिनिधिका लागि मोटरसाइकल खरिद गर्न २० लाख रूपैयाँ छुट्याएको छ । यस्तै बराह गाउँपालिकाले अध्यक्षदेखि वडाध्यक्षसम्मलाई मासिक तलब निर्धारण गरेको छ।

जनप्रतिनिधिले विकास निर्माणमा भन्दा आफ्नो सुविधाका लागि बजेट विनियोजन गर्न थालेपछि स्थानीय भने असन्तुष्ट बनेका छन् । चौकुने गाउँपालिका अध्यक्ष, उपाध्यक्ष र पाँचजना वडाध्यक्षका लागि नौवटा मोटरसाइकल किन्न २० लाख रुपैयाँ छुट्याएको अध्यक्ष धीरबहादुर शाहीले बताए । ‘१० वटा वडा रहेको चौकुनेमा पाँचवटा वडाले मोटरसाइकल किनिसकेका छन्,’ शाहीले भने, ‘बाँकी पाँच वडा र गाउँपालिका कार्यालयका लागि नौवटा मोटरसाइकल खरिद गर्न २० लाख रुपैयाँ छुट्याएका हौं।’

अघिल्लो साता भएको प्रथम गाउँसभाले जनप्रतिनिधिका लागि मोटरसाइकल खरिद गर्ने निर्णय गरेको थियो । ‘सबैको सुझाव लिएर हामीले मोटरसाइकल खरिद गर्ने निर्णय गरेका हौं,’ उनले भने, ‘जनताकै कामका लागि यी साधन प्रयोग गर्छौं ।’

स्थानीयले भने गाउँपालिकाको निर्णयप्रति सामाजिक सञ्जालमार्फत चर्को असहमति जनाएका छन् । रोजगारीका लागि दक्षिण कोरियामा रहेका चौकुनेका किरण बिसीले बिरामी बोक्ने स्टेचर नपाएर छटपटाइरहेका स्थानीयको पीडा सम्झेर मोटरसाइकल किन्नका लागि छुट्याइएको २२ लाख रुपैयाँले एम्बुलेन्स किन्न आग्रह गरेका छन् ।

अध्यक्ष शाहीले भने एम्बुलेन्स र मोटरसाइकल किन्ने कुरा फरक–फरक भएको बताए ।

‘गुठु स्वास्थ्य चौकीले एम्बुलेन्स खरिदको प्रक्रिया अघि बढाएको छ, गाउँपालिकाभित्रका अरू स्वास्थ्य चौकीले पनि एम्बुलेन्स खरिद गर्दैछन्,’ उनले भने । उनले सडकको स्तर राम्रो नभएको, विकट बस्ती भएको, जनतालाई सेवा दिँदा चुस्तता अपनाउन सहज होस् भन्ने उद्देश्यले मोटरसाइकल किन्ने निर्णय गरिएको बताए । ‘सार्वजनिक सवारी साधनमा चढेर जनताको सेवा गर्न सकिँदैन,’ उनले भने । उनले मोटरसाइकल किन्ने निर्णय फिर्ता नहुने पनि जनाए ।

यस्तै बराहताल गाउँपालिकाका जनप्रतिनिधिले आफ्नै लागि तलब सुविधा तोकेका छन् । चालू प्रथम गाउँसभामा लगिएको प्रस्तावमा अध्यक्षका लागि २५ हजार, उपाध्यक्षका लागि २० हजार र वडाध्यक्षका लागि १५ हजार रुपियाँ मासिक तलब तोकिएको छ ।

गाउँपालिका अध्यक्ष तेजबहादुर बस्नेतले गाउँपालिकाको आन्तरिक स्रोतबाट पाउने गरेर तलब सुविधा निर्धारण गरिएको बताए । ‘गाउँपालिकामै जनप्रतिनिधि बस्नका लागि घर भाडा तिर्नुपर्छ, यातायात खर्च चाहिन्छ,’ उनले भने, ‘तलब तोकिदिएपछि सजिलो हुन्छ भनेर गाउँसभामा प्रस्ताव लगेका छौं ।’ उनले बुधबारभित्र गाउँसभाले तलबको बारेमा निर्णय लिने बताए । बराह गाउँपालिकाको वार्षिक बजेट ३३ करोड छ । अध्यक्ष, उपाध्यक्ष र वडाध्यक्षलाई मासिक तलब दिँदा वर्षमा २३ लाख ४० हजार रुपियाँ खर्च हुन्छ । यसका साथै बैठक भत्ता, पर्वमा हुने खर्च जोड्दा धेरै हुन्छ ।

प्रकाशित: ११ श्रावण २०७४ ०२:१९ बुधबार