मुखै रसाउने जापानी परिकार

शुक्रबार, १६ भदौ २०७४, १२ : ४४ शान्ति लामा


दोस्रो विश्वयुद्धपछि जापानका सहरमा भोकमरी लाग्यो । मानिसहरू खानाका लागि भौँतारिन थाले । यस्तो बेला एक सस्तो खाले खानेकुरा लोकप्रिय बन्यो, जसलाई ‘इस्सेन–योसोकु’ नाम दिइएको थियो । सहरका साना पसलमा बेच्न राखिने यो खानेकुरा धेरैजसो बच्चालाई खान दिइन्थ्यो । त्यसअघि सबैले बेवास्ता गरेको खाना युद्धपछि निकै लोकप्रिय बन्यो । कारण, स्थानीय रेस्टुरेन्टले यसलाई केही परिमार्जित गरी बनाउन थाले । उनीहरूले यसको नाम पनि इस्सेन योसोकुबाट ‘ओकोनोमियाकी’ मा बदले । सन् १९५० सम्म यो सबै वर्ग र उमेरका मानिसको प्रिय स्वाद बनिसकेको थियो । 
युद्धपछिको भोकमरी छल्न हिरोसिमावासीबाट उत्पत्ति भएको यो खानेकुरा अहिले निकै लोकप्रिय डिसको रूपमा चर्चित छ । 

यही खानेकुरा नेपालीलाई चखाउने काम गरिरहेको छ, कुपण्डोलस्थित ‘ओताफुकु ओकोनोमियाकी’ले । २०१५ मार्चदेखि सञ्चालनमा रहेको यो रेस्टुरेन्टको नाम नै ओकोनोमियाकी राखिएको छ । ओताफुकु हिरोसिमाको निकै चर्चित ब्रान्ड हो । ओताफुकुकै सस प्रयोग गरी यहाँ ओकोनोमियाकी बनाइन्छ । ओकोनोमियाकीलाई यो स्वादमा काठमाडौंमा ल्याउने यही एक मात्र रेस्टुरेन्ट रहेको सञ्चालक नवीन डंगोल बताउँछन् । 

डंगोल आफैँ टुर गाइड हुन् । जापानी पाहुनालाई देश डुलाउँदाडुलाउँदै उनलाई जापानी खाना र संस्कृतिले तान्यो । विदेशी स्वाद चाख्ने बढ्दो चलनका कारण जापानी खानाले राम्रो व्यापार गर्छ भन्ने लाग्यो । त्यसपछि उनी आफैँ ओताफुकु कम्पनीमा तालिम लिएर आएपछि रेस्टुरेन्ट खोले । ओताफुकुको ब्रान्ड नाम पाउनु उनको व्यवसायका लागि प्लस प्वाइन्ट भयो । उनको रेस्टुरेन्टमा ओताफुकुकै झन्डा र लोगो देख्न सकिन्छ । 

‘यहाँका खाना पनि ओताफुकुकै रेसिपीमा आधारित छ,’ सञ्चालक डंगोलले भने । ओकोनोमियाकी विशेष रहेको यो रेस्टुरेन्टका सबै जापानी खाना नेपालीले मन पराएको उनी बताउँछन् । ‘ओकोनोमियाकी देख्नेबित्तिकै मानिसहरू खुसी हुन्छन् ।’ त्यसबाहेक जापानी खाना भन्नेबित्तिकै सम्झिने सुसी, टेम्पुरा त छँदै छ । कुपण्डोल हाइटमा रहेको रहेको डंगोलको रेन्टुरेन्ट जापानी खाना पारखीका लागि राम्रो गन्तव्य बनेको छ । 

उनको रेस्टुरेन्टको ५० प्रतिशतभन्दा बढी ग्राहक नेपाली नै रहेको उनले बताए । रेस्टुरेन्टमा आउने नेपालीमध्ये अधिकांश ग्राहक जापानी खानासँग परिचित नै आउने गरेको उनले पाएका छन् । यसबाट जापानी खानाले काठमाडौंवासीको मन जितिसकेको उनी अनुमान लगाउँछन् । जापानी खानालाई सर्वसाधारणमा पुर्‍याउने उद्देश्यले रेस्टुरेन्टको सेटअप र खानाको मूल्यलाई निकै सुलभ बनाइएको डंगोल बताउँछन् । 

ओकोनोमियाकीको खाना फुडमान्डुको डेलिभरी सर्भिसमार्फत पनि धेरै ग्राहकमा पुग्ने गरेको छ । चार सय रुपैयाँभन्दा बढीको अर्डर फुडमान्डुले लिने गरेको छ । 

संसारभरि नै स्वस्थ खानाको रुपमा जापानी खाना चर्चित छ । काठमाडौंमा पनि जापानी खानाको चलन अलि पहिले नै आइसकेको थियो । काठमाडौंको पुरानोमध्येको एक रेस्टुरेन्ट हो, कोटो जापनिज रेस्टुरेन्ट । दरबारमार्गमा रहेको यो रेस्टुरेन्ट ०४२ सालदेखि सञ्चालनमा छ । जापानीसहित नेपालीको समेत लगानी रहेको कोटोको किचेन अथेन्टिक जापानी क्युजिनका लागि चर्चित रहेको छ । यसको झन्डै आधाभन्दा बढी ग्राहक नेपाली रहेको म्यानेजर सुरथ डाँगी बताउँछन् । बाँकी ग्राहक जापानी पर्यटक अन्य देशका रहेका छन् । 

नेपालीहरू जापानमा जाने चलन बढेका कारण नेपालमा जापानी स्वादले लोकप्रियता पाउँदै गएको कोटोका म्यानेजर डाँगीले बताए । हिजोआज अध्ययनका लागि जाने तयारीमा रहेका र गएर आएका विद्यार्थीको पनि गन्तव्य बन्ने गरेको छ, सहरका जापानी रेस्टुरेन्ट । जापानी भाषा पढाउने स्कुलले पनि आफ्ना विद्यार्थीलाई जापानी खानाबारे सिकाउन ल्याउने गरेको डाँगीले बताए । उनले भने, ‘यसले गर्दा पनि सहरमा जापानी खानालाई लोकप्रिय बनाउन सहयोग पुगेको छ ।’ 
जापानी स्वादसँग घुलमिल भइसकेका मात्र नभई जापानी खाना चाख्न इच्छुक नेपाली पनि कम छैनन् । कोटोका सेफ ध्रुव ढकालले भने, ‘जापानी परिकारमा ससको प्रयोग धेरै गरिएको हुन्छ । सुरुमा खानेले अलि गुलियो मान्छन् ।’ तर खाँदै जाँदा लत बसेका ग्राहक पनि आउने गरेको सेफ ढकालले बताए । 

काठमाडौंका रेस्टुरेन्टमा चर्चित केही जापानी परिकारबारे पनि थाहा पाइराखौँ । 
सुसी 
जापानी परिकार भन्नेबित्तिकै धेरैले सुसी सम्झन्छन् । नोरी अर्थात् एक प्रकारको सिविडमा भिनेगर्ड राइस, भेजिटेबल्स, माछा (टुना, सालमन, प्राउन) बेरेर सुसी बनाइन्छ । यसलाई सुसी सस र वासाबी (पिरो अचार) सँग खाइन्छ । ओताफुकु ओकोनोमियाकीमा ओकोनोमियाकीपछि धेरैले मन पराउने परिकार माकी सुसी (जुसी) रहेको सञ्चालक डंगोल बताउँछन् । उसको मेन्युमा चार प्रकारका सुसी छन् । तिनको मूल्य जम्मा चार सय रुपैयाँदेखि पाँच सय ५० रुपैयाँसम्म निर्धारण गरिएको छ । आफूहरूले सुसीलाई जापानी परम्परागत तरिकाले बनाउने गरेको ओताफुकुका सञ्चालक डंगोलले बताए । 

सुसीलाई धेरै स्टाइलमा तयार पार्न सकिन्छ । अहिले काठमाडौंका रेस्टुरेन्टमा भने माकी सुसी नै धेरैले मनपराउने गरेको काटो जापनिज रेस्टुरेन्टका सेफ ध्रुव ढकाल बताउँछन् । कोटोले सुसीका सात स्टाइललाई आफ्नो मेन्युमा राखेको छ । जसको मूल्य पाँच सय ४० रुपैयाँदेखि ६ सय ९० सम्म निर्धारण गरेको छ । 

ओकोनोमियाकी 
धेरैको स्वादग्रन्थीलाई थ्रिलिङ सेन्सेसन दिनका लागि ओकोनोमियाकीको लोभलाग्दो टेक्स्चर नै पर्याप्त छ । यसको निकै रसिलो स्वाद सुरुमा चाख्नेले कहिल्यै बिर्संदैन । ग्रिल गरिएको रोटीको बेसमा बन्दा, नुडल्स, मासु, गेडागुडीको टुसा राखेर ओकोनोमियाकी बनाइन्छ । रोटीको बेसमा बनाइने हुनाले यसलाई जापानी प्यान केक पनि भनिन्छ । यसमा स्वाद थप्ने काम ओकोनोमी ससले गर्छ । कुपण्डोलको ओताफुकु ओकोनोमियाकीमा प्रयोग गरिने सस ओताफुकुबाटै मगाउने गरेको सञ्चालक डंगोल बताउँछन् । भन्छन्, ‘त्यसैले हाम्रो स्वादसँग आजसम्म कसैले गुनासो गरेको छैन ।’ यहाँ हिरोसिमा र खान्साई (ओसाका) स्टाइल स्टाइलका भेज र ननभेज दुवै प्रकारका ओकोनोमियाकी बनाइन्छ । भेज ओकोनोमियाकीको मूल्य चार सय ५० र मिक्सको मूल्य पाँच सय ५० रुपैयाँ छ । यसलाई लन्च र डिनर दुवै रूपमा खान सकिन्छ ।

टेम्पुरा
जापानी क्युजिन रेस्टुरेन्टमा धेरै मनपराउने परिकार टेम्पुरा हो । टेम्पुरा जापानी परिकार भनिए पनि यसलाई पोर्चुगिजले जापानमा प्रयोग गरी चर्चित बनाइएको मानिन्छ । सिफुड तथा अन्य सब्जीलाई गहुँको रोटी, अन्डालगायत मिलाएर बनाइएको टेम्पुरा ब्याटरले बनाइने यो डिप फ्राइड परिकार हो । काठमाडौंका जापानी रेस्टुरेन्टमा धेरै बिक्ने परिकार टेम्पुरा पनि हो । यसलाई सस वा राइस बाउल वा सोबा नुडल्ससँग खान सकिन्छ । ओताफुकु ओकोनोमियाकीको टेम्पुरा मेनुमा भेज, मिक्स र प्राउन टेम्पुरा राखिएका छन् । कोटोमा रहेका तीन प्रकारका टेम्पुरामध्ये प्राउन टेम्पुरा धेरै खाइने परिकार रहेको सेफ ध्रुव ढकालले बताए। 

टेरियाकी 
लन्च वा डिनरमा भात खान रुचाउने नेपालीका लागि टेरियाकी सबैभन्दा उपयुक्त डिस हुन सक्छ । अलि हेभी डिसको रूपमा ओताफुकु ओकोनोमियाकीले दैनिक सर्भ गर्ने परिकारमै पर्छ । यहाँ चिकेन वा पोर्कलाई ग्रिल गरी टेरियाकी सससँग सर्भ गरिन्छ । यसमा राइस, सुप, गोमाइ पनि सँगै आउँछ । साधारणतः टेरियाकी सस गुलियो हुने भए पनि यसलाई स्पाइसी पनि बनाउन सकिन्छ । उसिनेको पालुंगोको सागलाई र तिलको छोपको स्वादको गोमाइ अपिटाइजर सलाद हो । गोमाइ आफैँ पनि निकै मन पराइने परिकार हो। 

कोटो जापनिज रेस्टुरेन्टको मेनुमा चिकेन र फिले टेरियाकी राखिएका छन् । लन्च र डिनरका रूपमा धेरैले यसलाई मनपराउने गरेको सेफ ध्रुव ढकालले बताए। 

सोबा
फापरको पिठोको नुडल्सको परिकार हो, सोबा । काठमाडौंका जापानी रेस्टुरेन्टका पनि चर्चित परिकारमा पर्छ, सोबा । तातो र सुपी सोबा विशेषगरी जाडो मौसममा खाइने भए पनि गर्मी महिनामा पनि खाइने कोटोका सेफ ध्रुव ढकाल बताउँछन् । गर्मी मौसममा चिसो खान मनपराउनेका लागि सोबाको चिसो डिस पनि कोटोको मेनुमा छ । सोबाको चिसो भर्जनमा छुट्टै सस र वासाबी (अचार) दिइन्छ । ससमा नुडल्स डिप गरेर खाइन्छ । सोबाका लागि चाहिने मिठी फापरको पिठो काटोले आफैँ तयार गर्ने गरिएको म्यानेजर सुरथ डाँगीले बताए । कोटोको मेनुमा विभिन्न प्रकारका सोबा बेस्ड नुडल्सका परिकार छन् । सोबा नुडल्सको बेसामा टेम्पुरा, चिकेन, पोर्क वा जुनसुकै एक्स्ट्रा टपिङमा खान सकिन्छ । 

बेन्तो बक्स
बेन्तो टेक–आउट मिल बक्स हो । विभिन्न परिकारलाई मिलाएर बनाइएको खानाको प्याकेज हो, बेन्तो । जसमा राइस, माछा वा मासु, सब्जी, अचार लगायत खानेकुरा समावेश गरिएको हुन्छ। 

टेकआउट बक्सको रूपमा खाइने भए पनि यसलाई डाइनिङमा पनि रेस्टुरेन्टले बेन्तो चलाइरहेका छन् । ओताफुकु ओकोनोमियाकीका सञ्चालक डंगोलका अनुसार एउटै परिकारको स्वादभन्दा फरक–फरक परिकारका स्वाद एकैचोटि खान चाहनेले बेन्तो रोज्ने गरेका छन् । बक्समा समावेश सबै खाना खाँदा महँगो पर्ने भएकाले धेरैले धेरै प्रकारका परिकार एकैपटक चाख्ने मौकाको रूपमा लिन्छन् । बेन्तो खानेले बक्सको कम्पोजिसन आफ्नो इच्छाअनुसारका परिकार मिलाएर रोज्न सक्छन् । रेस्टुरेन्टले पनि आफ्नो स्टाइलका बेन्तो बक्स बनाएका हुन्छन् । कोटोको मेन्युमा भेज र ननभेज गरी बेन्तो राखिएका छन् । जसको मूल्य पाँच सय ४० देखि सात सय ९० रुपैयाँसम्म छ। 

सुकियाकी
फिङ (ग्लास नुडल्स), बोइल्ड भेजिटेबल बेसमा विभिन्न स्टाइलमा उमालेर बन्ने डिस हो, सुकियाकी । फिले, चिकेन, पोर्क र भेजिटेबल सुकियाकी कोटोको मेनुमा छन् । थुक्पाजस्तै देखिने सुकियाकीमा सोय सस र सुपले जापानी स्वाद दिन्छ । यो परिकारलाई नेपालीले गर्मी र जाडो दुवै मौसममा उत्तिकै रुचाएको कोटोका सेफ धु्रव ढकालले बताए । 







यसमा तपाईको मत

तपाईंको रुचि अनुसारको समाचारको लागि खाता खोल्नुहोस् ।

अन्य समाचार

गीत गाउँदा गाउँदै अस्ताए जनवादी गायक खुसीराम पाख्रिन

गीत गाउँदा गाउँदै अस्ताए जनवादी गायक खुसीराम पाख्रिन

बाम गठबन्धनले मंगलबार भरतपुरमा आयोजना गरेको सभामा ‘युवाहरु हो’ भन्ने जोशीलो गीत गाएका प्रशिद्ध जनवादी गायक तथा पूर्व सांसद खुसीराम...

लिलीबिलीको सुटिङ लण्डन र स्कटल्याण्डमा

लिलीबिलीको सुटिङ लण्डन र स्कटल्याण्डमा

मिलन चाम्सको निर्देशनमा बन्न लागेको नेपाली फिल्म ‘लिलीबिली’ को सुुटिङ लण्डन तथा स्कटल्याण्डमा भइरहेको छ । पछिल्लो समयका चर्चित नायक...

बोलचालमा प्रतिबन्ध

बोलचालमा प्रतिबन्ध

बलिउड अभिनेत्री परिणीति चोपडा र अर्जुन कपुर चाँडै नै फिल्म ‘सन्दीप और पिंकी फरार’मा देखिँदैछन् । अघिल्लो फिल्म ‘इशकजादे’मा पनि...

एकादेशमा ‘डेथ अफ साउण्ड म्यान’ उत्कृष्ट

एकादेशमा ‘डेथ अफ साउण्ड म्यान’ उत्कृष्ट

ध्वनिको महत्वलाई समेटिएको शर्ट फिल्म ‘डेथ अफ साउण्ड म्यान’ले यस वर्षको एकादेशमा अन्तराष्ट्र्रिय शर्ट फिल्म फेस्टिभल अवार्ड जितेको छ। थाईल्याण्डका...