‘हामीलाई फिल्मको डर छैन’

शुक्रबार, २३ भदौ २०७४, १० : २० नागरिक


काठमाडौं- चार वर्ष अघि फिल्म ‘कर्कश’ रिलिज भएपछि निर्माता तथा नायक आसिफ शाहलाई अर्को फिल्म बनाउने सोच त्यतिबेलै आएको थियो । तर, तुरुन्तै फिल्म बनाउनु भन्दा पनि केही समय खाली बसेर अर्को फिल्मको काम गर्ने योजना बुने । व्यावसायिक काममा सक्रिय रहँदै गर्दा आसिफ र उनका भाइ असिमले समय निकालेर फिल्म ‘२ रुपैंयाँ’ बनाए । जुन फिल्म शुक्रबारबाट प्रदर्शनमा आउँदैछ ।

‘कुटुमा कुटु’ गीतका कारण चर्चामा रहेको फिल्म ‘२ रुपैंया’का कलाकार तथा निर्माता निश्चल बस्नेत र आसिफ शाह फिल्म सफल हुनेमा ढुक्क छन् ।

उनीहरुले निर्माण गरेको अघिल्लो फिल्म ‘कर्कश’ ठमेलको लागु औषध र त्यहाँ हुने डलरको कारोबारमा केन्द्रित थियो । अहिले बनेको ‘२ रुपैंयाँ’ चाहिँ २ रुपैंयाँ वरपर घुमेको छ । ‘पैसाको विषयमा फिल्म बन्नु एउटा संयोग मात्र हो । यस्तो बनाउने पूर्व योजना थिएन,’उनले भने,‘२ रुपैंयाँले एउटा नोटले दुई पात्रको जीवनमा ल्याएको अनेक समस्यालाई प्रस्तुत गरेको छ । २ रुपैंयाँ हराए पछि उनीहरुको जीवनमा आएको गतिरोधलाई देखाएका छौं ।’ फिल्ममा आसिफ ‘दारी’ चरित्रमा छन् ।

फिल्ममा आसिफसँग निर्देशक निश्चल बस्नेत पनि प्रमुख भूमिकामा अभिनय गरेका छन् । निश्चलको समेत निर्माण सहकार्य रहेको फिल्ममा निश्चल ‘जुरेली’ भूमिकामा छन् । ‘निश्चल र म पुरानो साथी हौं । हामी यो विषयमा फिल्म बनाउँदैछौं भनेर उसलाई वान लाइन स्टोरी सुनाएपछि उसले पनि फिल्ममा लगानी गर्न रुची देखायो,’आसिफले भने,‘सुरुमा ऊ निर्माताको रुपमा थियो । फिल्मको कथाको सबै काम सँगै मिलेर गरेकाले अन्य कलाकारभन्दा उसलाई नै अभिनय गराउन उपयुक्त ठान्यौं ।’

फिल्मको गीत ‘कुटुमा कुटु’ युट्युबमा हिट भइसकेको छ । फिल्मको व्यावसायिक सफलतामा गीतले पनि भूमिका खेल्ने आसिफको विश्वास छ । ‘अहिलेसम्म गीत दर्शकले अत्याधिक रुचाइदिनुभयो । अब फिल्म पनि यही हिसाबमा रुचाउनु हुनेछ भन्नेमा आशावादी छु ’ उनले भने ।

निर्देशक तथा कलाकार निश्चलले ‘२ रुपैंयाँ’मा आफूले गरेका पात्र रोचक रहेको दाबी गर्छन् । ‘जुरेली एउटा सामान्य चरित्र हो । जो अलिकति रिसाहा र फन्टुस किसिमको हुन्छ,’उनले आफ्नो चरित्र प्रष्ट्याए,‘कसैले केही चिज गरौं भन्दा पछि नहट्ने चरित्रमा म छु । मेरो भूमिका दर्शकका लागि मसला लाग्नेछ ।’

फिल्म ‘लुट’बाट निर्देशनमा डेब्यु गरेयता उनले केही फिल्ममा केमियो भूमिका गरे पनि ‘कबड्डी’ पछि ‘२ रुपैंयाँ’ उनको पूर्ण अभिनय रहेको फिल्म हो । ‘फिल्म मेकर भएपछि सबै विधातिर जानुपर्छ भन्ने सोच मेरो सोच हो । राम्रो स्क्रिप्ट हातमा आयो भने त्यसमा लगानीसँगै आफै पनि अभिनय गर्ने योजना हो,’निश्चलले भने,‘२ रुपैंयाँको बारेमा शुरुमा आसिफ र असिमजीले आइडिया सुनाउनुभयो । त्यो कथा मनपरेपछि मैले पनि लगानीमा चासो दिएको हुँ । कलाकार अरु नै राख्ने भन्ने थियो । तर, विकल्प केही नभएपछि घरमै छौं, घरकै मान्छे प्रयोग गरौं भन्ने सल्लाह भयो ।’

निश्चलले फिल्मको गीत ‘कुटुमा कुटु’मार्फत फिल्मबारे दर्शकमा सूचना पठाइएको दाबी गरे । ‘अहिले कुटुमा कुटु भन्ने बित्तिकै आम दर्शकमा फिल्म ‘२ रुपैंयाँ’ बसिसकेको छ । फिल्मको प्रमोसनमा यो गीतले ठूलो भूमिका खेलेको छ,’निश्चलले भने,‘अहिले मलाई डर छैन । शुक्रबारबाट फिल्म लाग्दैछ । दर्शकको निर्णय नै हाम्रा लागि सर्वोपरी छ ।’

असिम शाहको निर्देशन रहेको फिल्ममा बुद्धि तामाङ, मेनुका प्रधान, राजन इसान, टिका पहाडीलगायतका कलाकारको अभिनय छ ।







यसमा तपाईको मत

तपाईंको रुचि अनुसारको समाचारको लागि खाता खोल्नुहोस् ।

अन्य समाचार

‘पद्मावती’ विवाद

‘पद्मावती’ विवाद

महंगो सेटमा फिल्म बनाउन माहिर बलिउड निर्देशक सञ्जय लीला भन्सालीको फिल्म ‘पद्मावती’को फष्र्टलुक सार्वजनिक हुनासाथ फिल्मकर्मीदेखि दर्शकसम्मले फष्र्टलुकको तारिफ गरे...

फूलमानको ‘नीरफूल’मा म्यान्मारका राजदूत दम्पती

फूलमानको ‘नीरफूल’मा म्यान्मारका राजदूत दम्पती

सञ्चारकर्मी फूलमान बलको निर्देशन रहेको फिल्म ‘नीरफूल’मा म्यान्मारका राजदुत ऊ लिउन ऊ देखिने भएका छन् । भूकम्पले तितर वितर पारेको...

दसैंका गीतमा पीडा

दसैंका गीतमा पीडा

वाल्यकालमा औंला भाँँच्दै धेरैले यही गीत गाउँदै दसैंलाई निम्ता दिन्थे । यो गीत गाउँदा घरमै दसैं आइसकेको धेरैलाई आभाष हुन्थ्यो...

तीन फिल्मसँग आउँदै ‘तान्द्रो’

तीन फिल्मसँग आउँदै ‘तान्द्रो’

आगामी कात्तिक २४ गते ‘सकस’, ‘रोमियो’ र ‘मेला’ रिलिज हुने चर्चा चलिरहँदा यही मितिमा अर्को फिल्म ‘तान्द्रो’ पनि रिलिज हुने...