स्थानीय तहमा एमाले पहिलो

सोमबार, ०९ असोज २०७४, ०९ : ४९ भाषा शर्मा  | @sb_language


काठमाडौं- स्थानीय तहमा संसद्को दोस्रो ठूलो दल एमाले पहिलो बनेको छ । नयाँ संविधान कार्यान्वयनसँगै दुई दशकपछि भएको स्थानीय निर्वाचनको अन्तिम परिणाम आउन बाँकी रहे पनि एमालेले पहिलो दलका रूपमा आफ्नो स्थान सुरक्षित गरेको हो ।
आइतबार साँझसम्म प्रदेश २ का आठ जिल्लाको १ सय ३६ स्थानीय तहमध्ये ७ स्थानको चुनावी परिणाम आउने बाँकी छ ।
सात स्थानको परिणाम दोस्रो स्थानमा रहेको कांग्रेसका पक्षमा पुगे पनि एमाले नै पहिलो दल बन्ने निश्चित छ । एमाले र कांग्रेसबीचको अन्तर ३० सिटको छ ।  
झन्डै सात दशक लामो इतिहास बोकेको एमाले स्थानीय तहमा बीस वर्षपछि आफूलाई पहिलो राजनीतिक दलका रूपमा पुनस्र्थापित गर्न सफल बनेको छ । २०५४ को स्थानीय निर्वाचनमा ४७ प्रतिशत मतसहित ७५ प्रतिशत स्थानीय निकाय प्रमुख जितेर एमाले पहिलो दल बनेको थियो ।
संविधानसभाबाट जारी नयाँ संविधानको व्यवस्थाअनुसार स्थानीय तहको निर्वाचन तीन चरणमा भएको थियो । ७ सय ५३ स्थानीय तहमध्ये एमालेले महानगर, उपमहानगर, नगरपालिका र गाउँपालिकासहित २ सय ९३ तहका प्रमुखमा जितेको छ ।
संसद्को ठूलो दल कांग्रेस भने स्थानीय तहको निर्वाचनमा दोस्रो स्थानमा धकेलिएको छ । स्थानीय तहको पहिलो चरण निर्वाचनमै एमालेभन्दा पछि परेको कांग्रेसले दोस्रो र तेस्रो चरणमा आफ्नो अवस्था सुधार गर्ने दाबी गर्दै आएको थियो ।
कांग्रेस एमालेभन्दा ३० तहले पछि छ । कांग्रेसले जम्मा २ सय ६३ तहको प्रमुख जितेको छ ।
तेस्रो स्थान माओवादी केन्द्रले पक्का गरेको छ । उसले हालसम्म १ सय ६ स्थानीय तहको प्रमुखमा चुनाव जितेको छ । चौथो स्थानमा संघीय समाजवादी फोरम रहेको छ । उसले २८ तहमा जित निकालिसकेको छ भने राष्ट्रिय जनता पार्टी नेपाल (राजपा) ले २४, फोरम लोकतान्त्रिकले ९ र अन्य दलले २३ सिट जितेका छन् ।
दलहरुले प्राप्त गरेका सिट संख्याका आधारमा एमालेले ४०, कांग्रेसले ३५, माओवादी केन्द्रले १४, संघीय समाजवादी फोरमले ४, राजपा ३ र अन्यले ४ प्रतिशत स्थानीय तहको प्रमुखमा जितेका छन् ।
पहिलो र दोस्रो चरणको निर्वाचनमा एमालेभन्दा ५० स्थानीय तहले पछि परेको कांग्रेसले तेस्रो चरणको निर्वाचनमा केही सुधार भने गरेको छ । प्रदेश नम्बर २ र ४ मा मात्र पहिलो दल बन्न सफल कांग्रेसले आइतबार बेलुकासम्म प्रदेश २ मा ३७ स्थानमा जित हासिल गरेको छ । त्यसैगरी प्रदेश ४ मा ४४ स्थान हासिल गरेको छ । त्यस प्रदेशमा कांग्रेसले एमालेले भन्दा १० स्थान बढी जितेको छ ।
माओवादी केन्द्रले १०६ स्थानीय तहमा नेतृत्व लिएको छ । माओवादी केन्द्रले सबैभन्दा बढी प्रदेश ६ मा २५ स्थानीय तहको नेतृत्व लिइसकेको छ । त्यसपछि प्रदेश २ मा २१ तह जितेको हो ।
पहिलो र दोस्रो चरणको निर्वाचनको परिणाम आफ्नो पक्षमा पार्न सफल देखिएको एमाले तेस्रो चरणको निर्वाचनमा भने कमजोर देखिएको छ । १ सय ३६ तहका लागि असोज २ गते प्रदेश नम्बर २ मा भएको निर्वाचनमा एमाले पाँचांै दलका रूपमा खुम्चेको छ । एमालेले जम्मा १७ तहको मात्र परिणाम आफ्नो पक्षमा पारेको छ ।
एमालेले प्रदेश नम्बर एकमा ६९ तह, प्रदेश नम्बर तीनमा ६४, प्रदेश नम्बर चारमा ३४, प्रदेश नम्बर पाँचमा ४३, प्रदेश नम्बर ६ मा २७ र प्रदेश नम्बर सातमा ३९ तहका प्रमुख जितेको छ । दोस्रो दलमा धकलिएको कांग्रेसले प्रदेश नम्बर एकमा ५१, तीनमा ३५, चारमा ४४, पाँचमा ३३, ६ मा २५ र सातमा ३८ गरी २ सय ६३ स्थानीय तहको प्रमुख÷अध्यक्ष जितेको हो ।
माओवादी केन्द्रले प्रदेश नम्बर एकमा ९, प्रदेश नम्बर तीनमा १७, प्रदेश नम्बर चारमा ५, प्रदेश नम्बर ६ मा २५, प्रदेश नम्बर सातमा १० तहसहित १ सय ६ तह जितेको छ ।   
संघीय समाजवादी फोरम चौथो ठूलो दल बनेको छ । फोरमले २८ वटा स्थानीय तहमा नेतृत्व जितेको छ । तेस्रो चरणको निर्वाचनमा मात्र सहभागी राजपाले २४ तहमा जित निकालेको छ । संविधानप्रति असन्तुष्टि जनाउँदै आन्दोलनमा रहेको राजपा तेस्रो चरणको निर्वाचनमा मात्र सहभागी भएको थियो ।
प्रदेश २ को स्थानी तह निर्वाचनमा फोरम लोकतान्त्रिकको उपस्थिति कमजोर देखिएको छ । उसले आइतबार साँझसम्म ९ तहमा मात्र प्रमुख जितेको छ ।
दोस्रो संविधानसभामा चौथो दलका रूपमा स्थापित तत्कालीन राष्ट्रिय प्रजातन्त्र पार्टी नेपाल हालको राष्ट्रिय प्रजातन्त्र पार्टीले पाँच तहमा मात्र जितेको छ ।   
स्थानीय तहको निर्वाचन सहभागी हुन निर्वाचन आयोगमा ८० दलले निवेदन दिएका थिए । त्यसमध्ये पहिलो र दोस्रो चरणमा ६३ दल सहभागी थिए भने तेस्रो चरणको निर्वाचनमा राष्ट्रिय जनता पार्टी नेपाल सहभागी भएसँगै ६४ दलले सहभागिता जनाएका थिए ।






यसमा तपाईको मत

अन्य समाचार

सेल्फि र सेल्फि फोनको लहर

सेल्फि र सेल्फि फोनको लहर

सेल्फि फोनको ट्रेन्डलाई नियालेर हेर्दै र सेल्फि क्यामरा राम्रो हुनलाई केको आवश्यकता पर्छ भन्ने विषयमा टिप्पणी । ...

ट्याब्लेट रोज्दा खोज्नुपर्ने उत्तरहरु

ट्याब्लेट रोज्दा खोज्नुपर्ने उत्तरहरु

सानदार स्क्रिन हुने, बोक्न गाह्रो नहुने र चलाउन सजिलो हुने भएकाले ट्याब्लेट छोटो समयमा नै अत्यधिक लोकप्रिय भएको छ ।...

ल्यापटप छान्न सरल

ल्यापटप छान्न सरल

गाह्रोभन्दा गाह्रो कामहरु पनि सजिलै गर्न मिल्ने तर जता पनि सजिलै बोकेर हिंड्न मिल्ने भएकाले ल्यापटप अहिले पुराना शैलीका डेस्कटप...

टिभीको नयाँ रुपलाई नियाल्दा

टिभीको नयाँ रुपलाई नियाल्दा

टिभी हेर्न सजिलो छ । किन्न भने त्यति सरल नहुन सक्छ । अहिले पुराना शैलीका सिआरटि टिभीहरु उत्पादन हुन छोडिसके...

नयाँ मिस नेपालको खोजी

नयाँ मिस नेपालको खोजी

मिस नेपालको आयोजना गर्दै आएको द हिडेन ट्रेजरले नयाँ संस्करणको मिस नेपालको तयारी थालेको छ । ...

‘पशुपति’ मा नीताको ‘हुर्रे’

‘पशुपति’ मा नीताको ‘हुर्रे’

आगामी फागुन २५ गतेबाट प्रदर्शनमा आउने फिल्म ‘हुर्रे’को दोस्रो गीत ‘पशुपति’ सार्वजनिक भएको छ । राजधानीमा आइतबार आयोजित कार्यक्रममा फिल्म...

ट्रेलर लिएर आइन् ‘कान्छी’

फागुन ४ मा प्रदर्शनमा आउन लागेको फिल्म ‘कान्छी’को ट्रेलर सार्वजनिक भएको छ । झन्डै तीन वर्षअघि फिल्म ‘कोहिनूर’मा अभिनेता श्रीकृष्ण...

‘कान्छी’को ट्रेलर सार्वजनिक

‘कान्छी’को ट्रेलर सार्वजनिक

अभिनेत्री श्वेता खड्काको फिल्म ‘कान्छी’ को ट्रेलर सार्वजनिक गरिएको छ। आफै निर्माता रहेकी श्वेताले बुधबार पत्रकार सम्मेलन गरी ट्रेलर सार्वजनिक...