पूर्वी पहाडमा उम्मेदवार छनोट तीव्र

शनिबार, २१ असोज २०७४, ०८ : १८ भीम चापागाईं


इलाम- मेची पहाडका राजनीतिक दलले प्रतिनिधिसभा र प्रदेशसभा निर्वाचनका लागि धमाधम उम्मेदवार सिफारिस गरिरहेका छन् । इलाम, पाँचथर र ताप्लेजुङका ठूला ३ दल (एमाले, कांग्रेस र  माओवादी केन्द्र) ले उम्मेदवार छनोटमा व्यस्त छन् ।

    यहाँका दलले पूर्वप्रधानमन्त्री, पूर्वमन्त्री, सांसद, पूर्वसांसद तथा गत असार १४ मा सम्पन्न स्थानीय तह निर्वाचनका पराजित उम्मेदवारसमेतलाई निर्वाचनमा उतार्दैछन् । दुई ठूला दल एमाले र कांग्रेसका नेताकार्यकर्ताबीच आउँदो चुनावमा टिकट लिन आन्तरिक रूपमै प्रतिस्पर्धा भएको छ ।

दलले पूर्वप्रधानमन्त्री, पूर्वमन्त्री, सांसद, पूर्वसांसद तथा गत असार १४ मा सम्पन्न स्थानीय तह निर्वाचनका पराजित उम्मेदवारसमेतलाई आउँदो निर्वाचनमा प्रतिस्पर्धामा उतार्दैछन् ।

तेस्रो स्थानमा रहेको माओवादीलगायतका दलले भने पार्टीबाट उम्मेदवारको नाम टुंगो लगाएर नै सिफारिस गरेका छन् ।
इलाममा निर्वाचन क्षेत्रको संख्या २ छ भने पाँचथर र ताप्लेजुङमा १–१ क्षेत्र छन् । प्रतिनिधिसभाका लागि एमालेले इलाम क्षेत्र १ बाट पूर्वप्रधानमन्त्री झलनाथ खनाल र क्षेत्र २ बाट पूर्वसभामुख सुवासचन्द्र नेम्बाङको नाम सर्वसम्मत सिफारिस गरेको छ ।  
पूर्वप्रधानमन्त्री खनाल अहिले इलाम क्षेत्र १ कै सांसद् हुन् भने नेम्बाङ क्षेत्र २ का । खनालले अहिलेसम्म यो क्षेत्रबाट ४ पटक चुनाव जितेका छन् । उनी एकपटक पराजित भएका थिए । खनालले २०७० सालको संविधानसभा सदस्य निर्वाचनमा त्यही क्षेत्रबाट कांग्रेस जिल्ला सभापति हिमालय कर्माचार्यलाई र २०६४ मा कांग्रेसकै बेनुपराज प्रसाईंलाई पराजित गरे । खनाल ०५६ को निर्वाचनमा चाहिँ प्रसाईंसँगै पराजित भएका थिए । २०५१ र ०४८ सालका दुवै निर्वाचनमा खनालले कांग्रेसका तोयानाथ भट्टराईलाई पराजित गरेका थिए ।
पूर्वसभामुख नेम्बाङले इलाम क्षेत्र २ बाट लगातार ३ पटक चुनाव जितेका छन् । उनले २०७० सालको संविधानसभा निर्वाचनमा यो क्षेत्रबाट कांग्रेसका भेषराज आचार्यलाई पराजित गरे । २०६४ सालमा नेम्बाङले कांग्रेसका केशव थापा र ०५६ मा कांग्रेसकै कुलबहादुर गुरुङलाई पराजित गरेका थिए ।

यसपटक साविकका ३ निर्वाचन क्षेत्र घटेर २ वटामा सीमित भएपछि भने भौगोलिक क्षेत्र हेरफेर भएको छ । एमालेले प्रदेशसभाका लागि प्रत्यक्ष तथा समानुपातिक र प्रतिनिधिसभाको समानुपातिकतर्फका उम्मेदवार छनोट प्रक्रिया टुंग्याउन बाँकी रहेको जनाएको छ । एमाले जिल्ला अध्यक्ष राम रानाले शुक्रबार भने, ‘आज–भोलितिरै उम्मेदवारको नाम माथिल्लो तहमा सिफारिस गर्ने तयारीसाथ बैठक चलिरहेको छ ।’
कांग्रेसले भने उम्मेदवार सिफारिस टुंग्याएको छ । कांग्रेस जिल्ला सचिव निरोज खड्गीका अनुसार प्रतिनिधिसभाका लागि इलाम क्षेत्र १ बाट बेनुपराज प्रसाईं, केशव थापा र भेषराज आचार्यको नाम क्षेत्रीय समितिमा सिफारिस गरिएको छ । क्षेत्र २ मा पनि उनीहरू नै तीनजनाको नाम सिफारिस गरिएको खड्गीले बताए । थापा इलाम क्षेत्र ३ का सांसद हुन् । उनले २०७० सालको संविधानसभा निर्वाचनमा एमालेका टेकबहादुर राईलाई पराजित गरेका थिए । थापाले २०५६ को निर्वाचनमा एमालेका अगमप्रसाद बान्तवालाई पराजित गरेका थिए भने उनी २०६४ सालको निर्वाचनमा एमालेका सुवास नेम्बाङसँग क्षेत्र २ मा पराजित भएका थिए ।
पूर्वसांसद प्रसाईंले २०५६ सालमा एमालेका झलनाथ खनाललाई इलाम क्षेत्र १ बाट पराजित गरेका थिए । ०६४ को निर्वाचनमा प्रसाईं एमालेका खनालसँगै त्यही क्षेत्रमा पराजित भएका थिए । आचार्य ०७० सालको निर्वाचनमा एमालेका नेम्बाङसँग क्षेत्र २ मा पराजित भएका थिए । कांग्रेसले प्रदेशसभाका लागि क्षेत्र १ को १ बाट हुकुमलाल थेबे, मिलन क्षेत्री र विक्रम पाण्डे, १ को २ बाट दुर्गा बराल, हेमकुमार कार्कीलगायतको नाम सिफारिस गरेको छ । कार्की स्थानीय तह निर्वाचनमा माई नगरपालिकाको मेयरमा एमालेका दीपक थेबेसँग पराजित भएका थिए । कांग्रेसको इलाम क्षेत्र १ को क्षेत्रीय सभापति बरालले स्थानीय तह निर्वाचनमा सूर्याेदय नगरपालिकाको मेयरमा अन्तिम समयमा टिकट नपाएपछि १५ सदस्यसहित पदबाट राजीनामा गरेका थिए ।
कांग्रेसले प्रदेशसभाका लागि क्षेत्र २ को १ बाट डम्बर खड्का, केदार थापा, गोविन्द गिरी, राजेन्द्र शर्मा र पूर्णप्रसाद गौतम तथा क्षेत्र २ को २ बाट खगेन्द्र देवान र नगेन्द्र कुमालको नाम सिफारिस गरेको छ । कुमाल २०६४ को निर्वाचनपछि समानुपातिकतर्फको सभासद् थिए । गौतम नेपाल शिक्षक महासंघका जिल्ला अध्यक्ष हुन् । शर्मा र देवान पार्टीका जिल्ला सचिव हुन् भने गिरी क्षेत्र २ को क्षेत्रीय सभापति । खड्का पार्टीको पछिल्लो जिल्ला अधिवेशनमा सभापतिमा पराजित थिए ।
    जिल्लामा माओवादी केन्द्रले पनि उम्मेदवारको नाम टुंग्याइसकेको छ । केन्द्रले प्रतिनिधिसभा सदस्यका लागि निर्वाचन क्षेत्र नम्बर १ को उम्मेदवारमा पार्टीका जिल्ला इन्चार्ज धीरेन शर्मा (रमण) र क्षेत्र २ मा सहइन्चार्ज कान्छा लावतीको नाम तय गरेको छ । प्रदेशसभामा क्षेत्र १ को १ मा तेजबहादुर राई (विजय) र १ को २ मा श्रीमान् राईको नाम छानेको छ । क्षेत्र २ को १ मा लक्ष्मण राई (जनम) र २ को २ मा अनिल बराइलीलाई उम्मेदवार छानेको माओवादी जिल्ला इन्चार्ज  शर्माले बताए ।
माओवादीले प्रतिनिधिसभाको समानुपातिकतर्फ टीका घिमिरे र सोममाया राई (सिन्धु) तथा प्रदेशको समानुपातिकमा राम राई, उर्मिला तामाङ, किरण सुनुवार, ओमबहादुर गुरुङ, शान्ता बस्नेत, प्रेम नाछिरिङ र पवन शंकरलाई उम्मेदवार छानेको जिल्ला इन्चार्ज शर्माले बताए ।
जिल्ला इन्चार्ज रमण ०७० को निर्वाचनमा क्षेत्र ३ बाट तेस्रो स्थानमा पराजित थिए । क्षेत्र २ बाट उम्मेदवार बन्ने कान्छा लावती पनि ०६४ सालमा त्यही क्षेत्रबाट तेस्रो मत ल्याएर पराजित थिए । केन्द्रले समानुपातिकतर्फको उम्मेदवार बनाउने निधो गरेकी सोममाया राई २०६४ सालको निर्वाचनमा क्षेत्र ३ बाट प्रत्यक्षतर्फको उम्मेदवारमा तेस्रो मत ल्याएर पराजित भइन् ।
    उनी गत असार १४ को स्थानीय तह निर्वाचनमा इलाम नगरपालिकाको वडा नम्बर १२ को वडाध्यक्षमा पनि पराजित भएकी थिइन् । आउँदो निर्वाचनमा उम्मेदवार बन्न लागेका उम्मेदवार गत स्थानीय तह निर्वाचनमा पराजित भएका थिए । केन्द्रका राम राई देउमाई नगरपालिकाको प्रमुख पदमा र प्रेम नाछिरिङ सन्दकपुर गाउँपालिका अध्यक्षमा पराजित भएका उम्मेदवार हुन् ।  
    पाँचथरमा एमालेले उम्मेदवारको नाम प्रदेश कमिटीमा सिफारिस गरेको छ । यहाँबाट प्रतिनिधिसभाको प्रत्यक्षतर्फ वसन्तकुमार नेम्बाङ, समानुपातिकमा डम्बरसिंह साम्बाहाम्फे सिफारिस भएको एमाले जिल्ला सचिव तिवेन्द्र चापागाईंले जनाए । साम्बाहाम्फे पूर्वमन्त्री हुन् । प्रदेशसभाको क्षेत्र १ मा प्रत्यक्षतर्फ तिवेन्द्र चापागाईं, गणेश काम्बाङ, भवानी लिङ्देन, महेन्द्र थाम्सुहाङ र ठुमनाथ चापागाईंको नाम सिफारिस गरिएको छ । प्रदेशको २ मा मेघराज घिमिरे, छवि लावती, नरेन्द्र बस्नेत, कृष्ण आङ्देम्बे र गंगा चेम्जोङ सिफारिस भएको चापागाईंले बताए ।
प्रतिनिधिसभाको समानुपातिकतर्फ उपेन्द्र दंगाल, रमा खवास, आशा जबेगू, वीरदल राई, तारावीर खपांगी, नरबहादुर खड्का, करुणा राई, सन्त राईलगायत सिफारिसमा परेका छन् । करुणा गत स्थानीय तह निर्वाचनमा फाल्गुनन्द गाउँपालिकाको उपाध्यक्ष पदमा नेपाली कांग्रेसका उम्मेदवारसँग पराजित थिइन् ।
कांग्रेसले प्रतिनिधिसभाका लागि जिल्लाबाट प्रत्यक्षतर्फ भीष्मराज आङ्देम्बे, मित्रप्रसाद काफ्ले र डिकबहादुर चेम्जोङको नाम सिफारिस गरेको छ । समानुपातिकतर्फ पूर्णकुमार शेर्मा, दीपकप्रकाश बाँस्कोटा र चन्द्रकला केरुङको नाम सिफारिस गरेको कांग्रेस पाँचथरका सभापति नरेन्द्र केरुङले जानकारी दिए । उनका अनुसार प्रदेशसभाका लागि क्षेत्र १ मा नरेन्द्र केरुङ, बालकृष्ण ओझा, लवदेव ढुंगाना र रूपनारायण जबेगू सिफारिसमा परेका छन् । केरुङ ०७० सालको निर्वाचनमा जिल्लाको क्षेत्र १ बाट पराजित भएका थिए । ढुंगाना नेपाल पत्रकार महासंघ जिल्ला शाखाका अध्यक्ष हुन् ।
प्रदेशसभाको क्षेत्र २ बाट सुरेन्द्रकुमार दाहाल, देवेन्द्रकुमार खड्का, धर्मेन्द्रविक्रम नेम्बाङ र सूर्यकुमारी चेम्जोङ सिफारिसमा परेको उनले जनाए । प्रदेशमा समानुपातिकतर्फ अम्बिकाप्रसाद नेउपाने, जयप्रसाद रिजाल, पूर्णबहादुर नेपाली र मधु जबेगूको नाम सिफारिस भएको छ । माओवादीले पाँचथरबाट प्रतिनिधिसभाका लागि प्रत्यक्षमा श्री जबेगू, प्रदेशसभाको १ मा हर्क नेम्बाङ र २ मा इन्द्र आङ्बोहाङको नाम सिफारिस गरेको छ । माओवादी पाँचथरका राधाकृष्ण नेउपानेले प्रत्यक्षतर्फका उम्मेदवार सिफारिस गरे पनि समानुपातिकतर्फका उम्मेदवार नछानेको बताए ।    
ताप्लेजुङमा कांग्रेसले उम्मेदवार छानेको छ । यहाँबाट प्रतिनिधिसभाको प्रत्यक्षमा केशव दाहाल, छविलाल गुरुङ, यामकुमारी सुब्बा, मीना गुरुङ र गोपाल गुरुङको नाम सिफारिस गरिएको छ । कांग्रेसले प्रतिनिधिसभाको समानुपातिकमा सूर्यमान गुरुङ, भारती गुरुङ, गीता सेन्दाङ र तिलप्रसाद सुब्बाको नाम सिफारिस गरेको कांग्रेस ताप्लेजुङकी सभापति लीलादेवी बोखिमले बताइन् । सूर्यमान पूर्वमन्त्री हुन् भने दाहाल गत स्थानीय तह निर्वाचनमा फुङलिङ नगरपालिकाको मेयरमा एमालेका छत्रपति प्याकुेरलसँग पराजित उम्मेदवार हुन् ।     बोखिमका अनुसार प्रदेशसभाको प्रत्यक्षतर्फ १ मा सभापति लीलादेवी बोखिम, युवराज गुरुङ र गजेन्द्र तुम्याहाङ तथा २ मा दीपेन्द्र सेन्दाङको नाम सिफारिसमा परेको छ । प्रदेशतर्फको समानुपातिकमा प्रतापप्रकाश हाङगाम, मंगल मेन्याङ्बो, रामबहादुर कङलिवा र मातृकादेवी प्रसाईंको नाम सिफारिसमा परेको छ । दीपेन्द्र जिल्ला विकास समितिका पूर्वसभापति हुन् भने हाङगाम पूर्वउपसभापति ।
प्रदेशसभातर्फ १ को प्रत्यक्षमा पार्टी अध्यक्ष बलबहादुर सम्सोहाङ र सन्तोष खतिवडाको नाम चर्चामा छ ।  प्रतिनिधिसभाका लागि एमाले केन्द्रीय सचिव तथा प्रचार विभाग प्रमुख योगेश भट्टराई र तिलकुमार मेयाङ्बोमध्ये १ जनाले पटक पाउने अनुमान छ । अध्यक्ष सम्सोहाङले शुक्रबार भने, ‘हामी छलफलकै क्रममा छौं, भरे–भोलिसम्ममा रिजल्ट आउनेछ ।’ माओवादी केन्द्रले प्रतिनिधिसभाका लागि पासाङ शेर्पा र वीरु हाङबाङलाई सिफारिस गरेको छ भने प्रदेशसभामा १ बाट खेलप्रसाद बुढाक्षेत्री र २ बाट विजय किरातीको नाम सिफारिस गरेको छ ।







यसमा तपाईको मत

तपाईंको रुचि अनुसारको समाचारको लागि खाता खोल्नुहोस् ।

अन्य समाचार

सुटिङका लागि नेपाल आउँदै अर्जुन-परिणिती

सुटिङका लागि नेपाल आउँदै अर्जुन-परिणिती

अभिनेता अर्जुन कपुर र अभिनेत्री परिणिती चोपडाको अभिनय रहने नयाँ फिल्म ‘सन्दीप और पिंकी फरार’ को सुटिङ नेपालमा पनि गरिने...

सकियो श्वेताको ‘कान्छी’

सकियो श्वेताको ‘कान्छी’

नायिका तथा निर्मात्री श्वेता खड्काले निर्माण गरेको फिल्म ‘कान्छी’ को छायांकन सकिएको छ । आकाश अधिकारी निर्देशित फिल्मले ५० दिनको...

‘कसले बजाउने बिनायो र मुर्चुङ्गा ?’

‘कसले बजाउने बिनायो र मुर्चुङ्गा ?’

दुई दशक अघिसम्म खोटाङको हलेसी तुवाचुङ नगरपालिका–३ च्यास्मीटारका टोल–टोलमा बिनायो र मुर्चुङ्गा बज्थे । मेलापात घाँस–दाउरा, हाटबजार, अर्मपर्मका बेला घन्किने...

तस्विरमा कलाकारको भाइटीका

तस्विरमा कलाकारको भाइटीका

तिहारको अन्तिम दिन शनिबार दिदीबहिनीले दाजुभाइलाई र दाजुभाइले दिदी बहिनीलाई यश, ऐश्वर्य र दीर्घायुको कामना गर्दै आ–आफ्नो परम्पराअनुसार पञ्चरंगी वा...