व्यंग्य : थ्री इडियट्स

शनिबार, २१ असोज २०७४, १० : २८ सुरेश किरण


केही समयअघिको कुरा हो, बलिउडमा एउटा फिल्म अत्यन्तै चर्चित भएको थियो । नाम हो, थ्री इडियट्स । सुरुमा यो त्यति चल्ला कि जस्तो लागेको थिएन । तर पछि के भएछ कुन्नि, फिल्म अत्यन्तै चल्यो । नाम पनि कमायो, दाम पनि । सुनिन्छ, यो भारतमा मात्र होइन, भारतबाहिर अरु देशमा पनि उत्तिकै चलेको थियो । फिल्म हेर्न मानिस हल–हलमा पुगेका थिए । यसरी थ्री इडियट्स बक्स अफिसमा खुबै हिट भयो ।

सबैभन्दा अर्थपूर्ण कुरा त के हो भने यत्रो फिल्म बनाउने घोषणा भइसक्यो, यसको निर्देशक को हो, त्यसको अहिलेसम्म ठेगान लागेको छैन । फिल्मको निर्माण चिनियाँ कम्पनीले गर्न लागेको भन्ने कुरा पनि गोप्य सूत्रबाट थाहा भएको हो । ब्यानरमा त युएमएल एन्ड एमबी फिल्मस् भनेर लेखिएको छ ।

आजभोलि संसारमा भारत र चीनको ठूलै प्रतिस्पर्धा चलिरहेको छ । यो सबैलाई थाहा भएकै कुरा हो । त्यही भएर पनि होला, भारतले बनाएको फिल्म संसारभरि नै चर्चित बनेपछि चीनलाई डाह लागेको छ । त्यो स्वाभाविकै हो । त्यसैले भारतले थ्री इडियट्स बनाएजस्तै अब चीनले पनि अर्को थ्री इडियट्स बनाउने तयारी गरेको छ । हालसालै मात्र चीनले बनाउन लागेको नयाँ थ्री इडियट्सको निर्माणसम्बन्धी घोषणा भएको थियो ।
अस्तिसम्म त चीनले जे बनायो, भारतले पनि त्यही बनाउँदै आइरहेको थियो । यसपालि चाहिँ भारतले जे बनायो, चीन पनि त्यही बनाउँदै छ । अर्थात् भारतले थ्री इडियट्स बनाएको थियो । अब चीनले पनि थ्री इडियट्स नै बनाउने तयारी गरेको छ । चीन पनि नयाँ थ्री इडियट्स बनाएर विश्वभरि चर्चित बन्ने र पैसा कमाउने धुनमा छ । चीनले बनाउने यो थ्री इडियट्सको निर्माण भने जम्मै नेपालमा हुनेछ । सुटिङ, कलाकार, प्राविधिक जम्मै नेपाली । निर्माता मात्रै चीन । त्यो पनि खुला निर्माता होइन, गोप्य निर्माता ।
अस्ति भर्खर मात्रै चीनले बनाउन लागेको नयाँ थ्री इडियट्स को घोषणा भयो । कार्यक्रममा इडियट्स भई खेल्ने तीनै प्रमुख कलाकारका साथै अरु कलाकारको पनि बाक्लो उपस्थिति थियो । कार्यक्रममा नेपाली चलचित्र क्षेत्रकी चर्चित नायिका करिश्मा मानन्धर पनि थिइन् । त्यसैले मानिसले ठानेका छन् कि अब बन्ने थ्री इडियट्सकी हिरोइन चाहिँ करिश्मा मानन्धर नै हुनुपर्छ । भारतले बनाएको थ्री इडियट्समा पनि एउटै मात्र हिरोइन थिई, करिना कपुर । संयोग हेर्नुस्, तिनै करिनाकी दिदीको नाम पनि करिश्मा नै हो । अतः यसलाई यसरी पनि भन्न सकिन्छ, भारतले बनाएको थ्री इडियट्समा बहिनी हिरोइन थिई, चीनले बनाउन लागेको थ्री इडियट्समा दिदी हिरोइन छन् । आखिर चीनले जे गर्छ, अलि माथिल्लो लेबलमै गर्छ ।
नयाँ थ्री इडियट्स बन्ने भएपछि देशैभरि हल्लाखल्ला मच्चिएको छ । नेपालको आर्थिक, राजनीतिक, सामाजिक, व्यापारिक, साहित्यिक जम्मै क्षेत्रमा अहिले यसैको चर्चा छ । यो फिल्म यस्तो होला वा उस्तो होला भन्ने अनुमान र अड्कल पनि तीव्र गतिमा भइरहेको छ । फिल्मको कथावस्तु यस्तै होला भन्ने कुरा त बाहिर आएको छैन । तथापि फिल्मको नामअनुसार यो मूर्खहरूसम्बन्धी फिल्म होला भनेर हचुवा अनुमान भने लगाउन सक्छौँ । बाहिर देखाउँदा आफू मूर्खजस्तो देखाउने । तर, यथार्थमा अरु जम्मैलाई मूर्ख बनाउने टाइपको कथा यसमा हुन सक्छ । यस्तो कथावस्तु भएको फिल्म बजारमा खुब चलेको पनि पाइन्छ । दर्शकले कलाकारलाई मूर्ख ठानिरहेको हुन्छ । यथार्थमा कलाकारले नै दर्शकलाई मूर्ख बनाइरहेको हुन्छ । पटकथामा यस्तो ट्विस्ट आइदिएको हुन्छ कि दर्शकले आफू मूर्ख बनेको थाहै पाउँदैनन् । यस्तो फिल्ममा संवाद राम्रो हुनु त स्वाभाविकै भयो । वास्तवमा दर्शकलाई मूर्ख बनाउने नै संवादबाट हो । अतः अत्यन्तै चिल्लो शैलीको संवाद यसमा हुनेछ ।
फिल्मलाई सफल र सम्पन्न बनाउने एउटा पक्ष त्यसको साजसज्जा पनि हो । पूरा नक्कली भए पनि सक्कलीजस्तो देखिने साजसज्जा र कला यसमा हुनेछ । बाहिर जे देखिन्छ, भित्र त्यस्तो हुँदैन । यस्तो सेटिङ यसमा हुनेछ । भेषभूषा चाहिँ बरु अलि पृथक हुने सम्भावना छ । किनभने फिल्मको कथाअनुसार थ्री इडियट्स बन्ने तीनैजना पात्रलाई कुनै वस्त्रको आवश्यकता पर्नेछैन । फिल्म थ्री इडियट्स भए पनि पात्रको वस्त्र भने पिके टाइपको हुनेछ । अर्थात् फिल्मको कथाले कुनै वस्त्रको माग गर्दैन । अस्ति फिल्मको घोषणा कार्यक्रममै संकेत मिलिसकेको छ नि, फिल्मका तीन प्रमुख पात्रलाई कुनै वस्त्र आवश्यक पर्नेछैन । अरु फिल्ममा हिरोइनहरू विनावस्त्र प्रस्तुत हुने गर्छन् । यो फिल्ममा हिरोहरू विनावस्त्र प्रस्तुत हुनेवाला छन् । यो पनि थ्री इडियट्सको मौलिक पक्ष हो । कथाले मागेपछि कलाकारले त्यो गर्नैपर्छ ।
अब आउने मंसिरसम्म फिल्म रिलिज गर्ने तयारी छ । प्रमुख कलाकार उत्साहित छन् । केही स्पट ब्वाय र सहायक कलाकार असन्तुष्ट रहेको बुझिन्छ । तर फिल्म निर्माणमा त्यसको कुनै अर्थ छैन । यसमा सबैभन्दा अर्थपूर्ण कुरा त के हो भने यत्रो फिल्म बनाउने घोषणा भइसक्यो, यसको निर्देशक को हो, त्यसको अहिलेसम्म ठेगान लागेको छैन । निर्देशकको नाम पनि घोषणा भएको छैन । यस्तो स्थिति छ । फिल्मको निर्माण चिनियाँ कम्पनीले गर्न लागेको भन्ने कुरा पनि गोप्य सूत्रबाट थाहा भएको हो । ब्यानरमा त युएमएल एन्ड एमबी फिल्मस् भनेर लेखिएको छ । तर, त्यो देखाउने निर्माता मात्र हो ।
अब जेहोस्, नेपाली भूमिमै एउटा ठूलो बजेटको नयाँ फिल्म बनाउने घोषणा भएको छ । जसरी बनाओस् जसले बनाओस्, हामी दर्शकको काम त हेर्ने मात्रै हो । हेरी नै रहौँ । कि कसो ?  
   






यसमा तपाईको मत

अन्य समाचार

सेल्फि र सेल्फि फोनको लहर

सेल्फि र सेल्फि फोनको लहर

सेल्फि फोनको ट्रेन्डलाई नियालेर हेर्दै र सेल्फि क्यामरा राम्रो हुनलाई केको आवश्यकता पर्छ भन्ने विषयमा टिप्पणी । ...

ट्याब्लेट रोज्दा खोज्नुपर्ने उत्तरहरु

ट्याब्लेट रोज्दा खोज्नुपर्ने उत्तरहरु

सानदार स्क्रिन हुने, बोक्न गाह्रो नहुने र चलाउन सजिलो हुने भएकाले ट्याब्लेट छोटो समयमा नै अत्यधिक लोकप्रिय भएको छ ।...

ल्यापटप छान्न सरल

ल्यापटप छान्न सरल

गाह्रोभन्दा गाह्रो कामहरु पनि सजिलै गर्न मिल्ने तर जता पनि सजिलै बोकेर हिंड्न मिल्ने भएकाले ल्यापटप अहिले पुराना शैलीका डेस्कटप...

टिभीको नयाँ रुपलाई नियाल्दा

टिभीको नयाँ रुपलाई नियाल्दा

टिभी हेर्न सजिलो छ । किन्न भने त्यति सरल नहुन सक्छ । अहिले पुराना शैलीका सिआरटि टिभीहरु उत्पादन हुन छोडिसके...

समस्या बढाउने सञ्जाल

समस्या बढाउने सञ्जाल

केही अध्ययनले सोसल मिडियाको प्रयोग र डिप्रेसनबीच सम्बन्ध देखाएका छन् । केही अध्ययनले भने कसरी सोसल मिडियाले राम्रो गर्न सक्छ...

सोहेल खान काठमाडौंमा

सोहेल खान काठमाडौंमा

बलिउड अभिनेता सोहेल खान शुक्रबार काठमाडौं आइपुगेका छन्। दवाङ्ग इभेन्टका लागि आउँदो मार्चमा नेपाल आउन लागेका चर्चित अभिनेता सलमान खानको...

भैरहवामा कार्यक्रम गरेसँगै नेपथ्यको कन्सर्ट यात्रा सकियाे

भैरहवामा कार्यक्रम गरेसँगै नेपथ्यको कन्सर्ट यात्रा सकियाे

मुलुकभरिबाट सोनाम ल्होसार मनाउने भक्तजनको भीड, छेवैको लुम्बिनीमा लागेको साँझ भैरहवा पनि लोक भाकामा आधारित रक संगीतमा डुब्यो। ...

जितुले हसाँए, कमलले नचाए

जितुले हसाँए, कमलले नचाए

सर्लाहीको मूर्तियामा बुधबारदेखि जारी ऐतिहाँसिक मुक्तेश्वर मूर्तिया महोत्सव अन्तर्गत विहिबार राष्ट्रिय स्तरमा चर्चित कलाकारहरुले प्रस्तुती दिएका छन् । ...