रंगमञ्चले बसायो घरबार

बुधबार, २५ असोज २०७४, ०८ : ०९ नेमिष गौतम


काठमाडौं- रंगमञ्चको अभिनयबाट उदाएका कलाकार हरिहर शर्मा फिल्म क्षेत्रमा पनि सक्रिय छन् । पाको उमेरमा उनको अभिनयमा कुनै सुस्तपन देखिँदैन् । उनकी जीवनसंगिनी सकुन्तला शर्मा पनि नाटकका स्थापित कलाकार हुन् । नाटक गर्ने क्रममा भेटिएको यो जोडीले नाटकलाई कर्म क्षेत्र मात्र बनाएनन्, दैनिक भेटमा बढेको घनिष्ठताले घरबार पनि बसाए ।
हरिहरका अनुसार उनीहरूको भेटको माध्यम तत्कालिन नेपाल राजकीय प्रज्ञा प्रतिष्ठान बनेको थियो । ‘२०३० सालमा सकुन्तलासँग मेरो भेट प्रज्ञा प्रतिष्ठानमा भएको थियो । उनी त्यहाँ नाटकीय गतिविधिमा संलग्न थिइन् । म पनि कलाकार भएकाले नाटककै कामका लागि पुगेको थिएँ,’ हरिहर स्मरण गर्छन्, ‘चिनापरिचय भएपछि हामी प्रायः नाटकको काममा नै व्यस्त हुन्थ्यौं । नाटकको रिहल्सलदेखि अभिनयमा उत्तिकै लगाव हुन्थ्यो । नियमित भेट हुनाले घनिष्ठ साथीको रूपमा एकापसमा सहकार्य गरिरह्यौं ।’
उसबेला प्रेमभन्दा पनि घनिष्ठताले आफूहरूको सम्बन्ध बाँधिएको हरिहरको बुझाइ छ । ‘एकापसको व्यवहारको बारेमा सबै कुरा थाहा भयो । प्रेम प्रस्ताव कसैले राखेनौं । अहिलेको जस्तो डेटिङ र घुम्ने चलन पनि थिएन,’ हरिहर भन्छन्, ‘सबै कुरा थाहा भएपछि म आफैं उनलाई माग्न गएँ । प्रेम नगरीकनै घनिष्ठताले हाम्रो जोडी बनाइदियो ।’ थुप्रै नाटकमा सँगै काम गरिसकेका हरिहर र शकुन्तलाको जोडीले फिल्म ‘बासुदेव’ लगायतका फिल्ममा पनि सहकार्य गरिसकेका छन् । हरिहर पछिल्लो पटक फिल्म ‘धनपति’ मा देखिएका थिए भने सकुन्तलाचाहिँ ‘क्लासिक’मा आमाको भूमिकामा थिइन् ।
रंगमञ्चीय अभिनयबाट करियरसँगै परिवार बसाल्ने जोडीमा हरिहर र सकुन्तला एउटा उदाहरण मात्र हुन् । हरिहर पछिका सरोज खनाल, सुनिल पोखरेलदेखि अहिलेका नयाँ अनुहारहरु सुलक्षण भारती, सोमनाथ खनाल, विकास जोशीको पुस्तासम्म आइपुग्दा उनीहरूका अर्धाङगिनी पनि नाट्य क्षेत्रकै छन् । नाटकघरमा पहिलो भेट, त्यसपछिको घनिष्ठता अनि अंकुराएको प्रेमले उनीहरूलाई सच्चा जीवनसाथी जुराइदिएको छ ।
काठमाडौंकी सुलक्षण भारती र सिर्जना अधिकारी पछिल्लो पुस्तामा नाट्यसँगै फिल्मी अभिनयमा पनि सक्रिय जोडी हुन् । २००९ मा राजधानीको अनामनगरस्थित मण्डला थिएटरमा पहिलो पटक भेट हुँदा उनीहरू साथी थिए । बिहानदेखि बेलुकासम्म नाट्य अभिनयका विविध पक्षबाट प्रशिक्षण लिँदै अभिनयमा निखारता ल्याइरहे । सिर्जनाबाट मोहित सुलक्षणले आफ्नो मनलाई बाँध्न सकेनन् । सिर्जनालाई प्रेमको प्रस्ताव राखे ।
‘सिर्जनालाई मैले नै प्रेम प्रस्ताव राखें । उनले प्रस्ताव स्वीकारेपछि हाम्रो शुरुवाती डेटिङ स्पट मण्डला नै बन्यो । कहिलेकाँही घुम्न भैंसेपाटी, झम्सिखेल पुग्थ्यौं । झम्सिखेलको एउटा चिया पसलमा पनि खुब गइयो’, सुलक्षणले हाँस्दै भने, ‘हामी प्रेममा रहेको मण्डलाका समकालिन साथी तथा दाजुदिदी कसैलाई थाहा थिएन । तर २०१२ मा बंगलादेशमा नाटक देखाउन गएपछि मात्र साथीहरूले हाम्रो प्रेमबारे पत्तो पाए । त्यहाँ हामी सँगै हिँडेपछि मात्र बढी चासो राख्न थाले ।’ चार वर्षअघि विवाह गरेका यो जोडीको हाल दुई महिनाको छोरा छ । नाटकबाटै अभिनयको करियर सुरु गरेका उनीहरूले सिनामंगलमा नयाँ नाट्य थिएटरको शुभारम्भ गरिसकेका छन् । सिर्जना र सुलक्षण अभिनयसँगै नाटक निर्देशनमा पनि उत्तिकै अब्बल छन् । उनीहरू समय–समयमा एकापसको कामको मूल्यांकन गर्दै तारिफसँगै कमजोर पक्षको पहिचान गरेर त्यसलाई सुधार्न पनि प्रोत्साहन गर्छन् ।
मण्डलाकै उत्पादन सोमनाथ खनाल पनि नाट्य अभिनयबाटै जीवनसंगिनी पाउने कलाकार हुन् । सन् २०११ मा मण्डला नाटक घरमा नृत्य प्रशिक्षणमा आएकी नम्रता केसीसँगको चिनजान भएपछि सोम र उनी सुरुवातीकालमा असल साथी बने । ‘हाम्रो त्यस्तो घनिष्ट रूपमा प्रेम सम्बन्ध चाहिँ भएन । केबल साथीका रूपमा सामान्य कुराकानी मात्र हुन्थ्यो । मेरो व्यवहार मण्डलाका अन्य समकालिनलाई जस्तै नम्रतालाई पनि हुन्थ्यो,’ सोमले सम्झिए, ‘पछि केही समयका लागि नम्रता नृत्य अध्ययन गर्नकै लागि भारत गएपछि अलिक धेरै गफ हुन थाल्यो । बिस्तारै एकापसमा मनपरापरको अवस्था आएपछि हामीले कम प्रेम धेरै मागी विवाह गर्यौं ।’
गहिरो प्रेम नभएकाले पनि डेटिङमा खासै नगएको सोमले सुनाए । केही फिल्ममा पनि अभिनय गरिसकेका सोम नाटक निर्देशन पनि गर्छन् । मण्डला नाटक घरमा मञ्चन हुने नाटकमा कोरियोग्राफी गर्ने नम्रताको डान्स इनिष्टिच्युट पनि छ । मोरङ बेलबारी घर भएका सोम र सर्लाहीमा जन्मिई काठमाडौंमा परिवारसँग बस्दै आएकी नम्रताले गत वर्षको फागुनमा लगनगाँठो कसेका हुन् ।
मण्डलाकै विकास जोशीले पनि त्यहिँ कार्यरत नवीना अर्यालसँग प्रेम विवाह गरेका छन् । गुरुकुलका सुनिल पोखरेल र निशा शर्मा, प्रवीण खतिवडा र सरस्वती चौधरी, मणि पोखरेल र अरुणा कार्की, एक्टर्स स्टुडियोका अनुप बराल र दिया मास्के पनि अभिनयबाटै बाँधिएका दम्पती हुन् ।
आफू कार्यरत क्षेत्रकै जीवनसाथी पाएपछि जोडीलाई फिल्मसँगै नाटकमा फरक भूमिका भए पनि एउटै पर्दा वा स्टेजमा देखिन सजिलो भएको त छँदैछ । कला क्षेत्रको समस्यालाई बुझेर संघर्ष गर्न पनि उनीहरूलाई असजिलो भएको छैन । एकापसको राम्रो कामको तारिफसँगै अभिनयको कमजोर पक्षलाई सुधार्न पाउने सुझावले उनीहरूको अभिनय निखारिँदै गएको छ ।







यसमा तपाईको मत

तपाईंको रुचि अनुसारको समाचारको लागि खाता खोल्नुहोस् ।

अन्य समाचार

सुटिङका लागि नेपाल आउँदै अर्जुन-परिणिती

सुटिङका लागि नेपाल आउँदै अर्जुन-परिणिती

अभिनेता अर्जुन कपुर र अभिनेत्री परिणिती चोपडाको अभिनय रहने नयाँ फिल्म ‘सन्दीप और पिंकी फरार’ को सुटिङ नेपालमा पनि गरिने...

सकियो श्वेताको ‘कान्छी’

सकियो श्वेताको ‘कान्छी’

नायिका तथा निर्मात्री श्वेता खड्काले निर्माण गरेको फिल्म ‘कान्छी’ को छायांकन सकिएको छ । आकाश अधिकारी निर्देशित फिल्मले ५० दिनको...

‘कसले बजाउने बिनायो र मुर्चुङ्गा ?’

‘कसले बजाउने बिनायो र मुर्चुङ्गा ?’

दुई दशक अघिसम्म खोटाङको हलेसी तुवाचुङ नगरपालिका–३ च्यास्मीटारका टोल–टोलमा बिनायो र मुर्चुङ्गा बज्थे । मेलापात घाँस–दाउरा, हाटबजार, अर्मपर्मका बेला घन्किने...

तस्विरमा कलाकारको भाइटीका

तस्विरमा कलाकारको भाइटीका

तिहारको अन्तिम दिन शनिबार दिदीबहिनीले दाजुभाइलाई र दाजुभाइले दिदी बहिनीलाई यश, ऐश्वर्य र दीर्घायुको कामना गर्दै आ–आफ्नो परम्पराअनुसार पञ्चरंगी वा...