पोखरा - लेखनाथ उद्योग वाणिज्य संघको अध्यक्षमा कृष्णहरि भण्डारी ८२४ मत प्राप्त गरी निर्वाचित भएका छन् । संघको ११औँ महाधिवेशनअन्तर्गत शनिबार निर्वाचन भई सम्पन्न मत परिणामअनुसार उनका निकटतम प्रतिद्वन्द्वी बसन्तमोहन भट्टराईले ३१७ मत प्राप्त गरेका थियो ।

वरिष्ठ उपाध्यक्षमा बलराम ढकाल, प्रथम उपाध्यक्षमा छत्रधर आत्रेय, द्वितीय उपाध्यक्षमा विनोदकुमार श्रेष्ठ निर्वाचित भएको छन् । त्यस्तै महासचिवमा भरतकुमार अधिकारी, उपमहासचिवमा गोपीचन्द्र बाँस्तोला, कोषाध्यक्षमा राजेन्द्र ओझा विजयी भएको छन् । आठ जना खुल्ला सदस्य पदमा १५ जनाबीच भएको प्रतिस्पर्धामा उपेन्द्रराज सुवेदी, रामजी पौडेल, मेनुका श्रेष्ठ, भरतराज ओझा, सरोजराज अधिकारी, भीमबहादुर नेपाली काइला, शिवप्रसाद भण्डारी र धीरजकुमार श्रेष्ठ निर्वाचित भएको हुन् । दुई महिला सदस्यमा जानुका अधिकारी र राधा सापकोटा निर्वाचित भएका छन् ।

संस्थागततर्फका शैलेन्द्रमोहन भट्टराई र एशोसिएटतर्फका प्रशान्तराज धमला यसअघि नै निर्विरोध निर्वाचित भएको थियो । कार्य समितिमा निर्वाचित अध्यक्षले तीनजना सदस्य मनोनित गर्न पाउने व्यवस्था छ । संघका नयाँ कार्यसमितिको कार्यकाल दुई वर्षको हुनेछ । निर्वाचनमा कुल एक हजार एक सय ५७ मत खसेको थियो ।

प्रकाशित: २९ आश्विन २०७४ ०५:२८ आइतबार