‘सबै कुरा एकैसाथ पाँच वर्षमै भन्दैनौँ’

आइतबार, ०९ पुष २०७४, ११ : ३५ नागरिक


कञ्चनपुर क्षेत्र नम्बर ३ बाट नेपाली कांग्रेसका नेता रमेश लेखकलाई पराजित गर्दै विजयी भएका नेकपा एमालेका डा. दीपकप्रकाश भट्टसँग गरिएको कुराकानी:
चुनाव जितेपछि कस्तो महसुस भइरहेको छ ?
स्वाभाविक रूपमा वामगठबन्धनको उम्मेदवारको हैसियतमा मतदाताको बीचमा जाँदा देशैभरि उत्साहको वातावरण थियो र  जनतामा विश्वास झल्किन्थ्यो । स्थायी सरकारको पक्षमा देशमा आर्थिक समृद्धिको दिशामा लैजान बन्नुपर्ने वातावरण  वामगठबन्धनले दिन सक्छ भनेर त्यहीअनुसार मतदाताले मतदान गरे र परिणाम पनि आयो ।
तपाईंका प्राथमिकता के के हुन् ?
कञ्चनपुर क्षेत्र नम्बर ३ मा लामो समयदेखि राष्ट्रिय स्तरको योजना वा स्थानीय तहबाट भएका विकासका प्रयास अस्थिर राजनीतिक वातावरणका कारण गति लिन सकेको थिएन । अब यी विकासका योजनालाई अगाडि बढाउनुपर्छ । स्वास्थ्य, शिक्षा, याताायात र अन्य विकासका आयामलाई अगाडि बढाउने सोचका लागि तयारी गरेको छु । रोजगारीका सम्भावनाका कुरा छन्, राष्ट्रिय अर्थतन्त्र पराश्रयी बनिरहेका बेला राष्ट्रिय पुँजी र अर्थतन्त्रलाई बलियो बनाउने चुनौती पार गरी रोजगारी सृजना गर्ने नीति अवलम्बन गरिनु आवश्यक छ ।
प्रदेश ७ मा यहाँका जनताको अपेक्षा बमोजिम काम भएन भन्ने सुनिन्छ, अहिले पनि ४५ प्रतिशत बढी गरिबी यहाँ छ । तपाईंको योजना के छ ?
राष्ट्रिय स्तरको, प्रदेश  र निर्वाचन क्षेत्रको घोषणापत्र जनताबीच पु¥याएका छौँ । जहाँसम्म प्रदेश नम्बर ७ हिजोको सुदूरपश्चिमको विकास राष्ट्रिय गतिसँग पछाडि पारियो । विगतमा यो क्षेत्रबाट नेतृत्वमा गएकाले यसमा ध्यान दिएको पाइएन । देशभित्रै विकासमा असन्तुलन देखियो र सीमान्तीकृत पार्ने काम भयो । सुदूरपश्चिम क्षेत्रबाट पटकपटक प्रधानमन्त्री बनेका लोकेन्द्रबहादुर चन्द हुन् वा शेरबहादुर देउवा हुन् वा पटकपटक मन्त्री बनेका अन्य व्यक्तिले यस क्षेत्रको विकासलाई भन्दा आफू र आफ्ना वरिपरिका व्यक्तिको विकासलाई केन्द्रित गरी विकासको गलत व्याख्या गरेको पाइन्छ ।  पहिलो कुरा राष्ट्रिय स्तरमै पहल गरेर र हस्तक्षेप गरेर राष्ट्रिय पुँजी बलियो बनाएर अर्थतन्त्र बलियो बनाउने दिशामा लैजानुपर्छ ।  प्रदेश ७ को सवालमा जलस्रोत, जडिबुटी लगायतका सम्भावनालाई विकासमा परिणत गरिनुपर्छ । कञ्चनपुरलाई व्यापारिक नाकाको रूपमा विकास गर्न ०६७ सालदेखि थालिएका प्रयास ढिला नगरी अगाडि बढाउनुपर्छ ।
२० वर्षदेखि डिपिआर बनेर कार्यान्वयन हुन नसकेको पञ्चेश्वर परियोजनालाई कूटनीतिक पहल गरेर बिजुली निर्माण गर्नुपर्नेछ ।  राष्ट्रिय स्तरकै पश्चिम सेती परियोजनालाई निर्माण गर्नुपर्ने छ । ०६७ देखि सुरु भएको महाकाली–सेती लोकमार्ग निर्माणको कामलाई अघि बढाएर उत्तरतिरको नाका जोड्नुपर्छ । भीमदत्त नगरपालिका र दोधारा चा“दनी नगरपालिका जोड्ने महाकाली नदीमा चार लेनको महाकाली पुल निर्माण सम्पन्न गर्नुपर्नेछ । सुख्खा बन्दरगाह बनाउने काम अलपत्र छ । त्यो सम्पन्न गर्नुपर्ने छ । जोगबुढामा पक्की पुल निर्माण गरेर साँच्चिकै व्यापारिक केन्द्र र कञ्चनपुरलाई व्यापारिक नाकाका रूपमा विकास गरिनेछ । यस्ता धेरै छन् । विस्तृत गुरुयोजना बनाएर स्थानीय तह, प्रदेश र केन्द्रबाट एकैचोटि पहल गर्नुपर्नेछ ।
तपाईंका चुनावी आश्वासन पूरा होलान् त ?
हामीले त्यत्तिकै कुनै आश्वासन दिने ढंगले कुरा गरेका छैनौँ । जुन वास्तविक समस्या छन्, ती उजागर गरेका छौँ । त्यही अनुरूपको प्रतिबद्धता पनि गरेका छौँ । जुन कुरा अघि बढाउने भनेर प्रतिबद्धता गरेका छौँ, त्यो गरेर देखाउने पक्षमा छौँ ।
देशले अब आर्थिक समृद्धि र विकासमा गति लेला त ?
राष्ट्रिय पुँजी निर्माण, रोजगारी सृजना गर्ने दिशातिर अर्थतन्त्र अघि बढेन । नेपाली कांग्रेसले समाजवाद भनिरह्यो तर नवउदारवादी अर्थतन्त्र लिएर अघि बढिरह्यो । राष्ट्रिय उद्योगहरू कौडीको भाउमा निजी क्षेत्रलाई बिक्री गर्ने काम भयो । उत्पादन बढाएर राष्ट्रिय पुँजी निर्माण गर्ने काम भएन । अब समाजवाद उन्मुख हुने गरी राष्ट्रिय पुँजी निर्माण गर्न कृषिलाई व्यावसायिक बनाउने, कम्तीमा मलखाद आफैँ निर्माण गर्न ध्यान दिनु जरुरी छ । जहाँ औद्योगिक क्षेत्र छन्, त्यहाँ स्वदेशी–विदेशी लगानी बढाएर रोजगारी सृजना गर्ने र परनिर्भर रहेको अर्थतन्त्रलाई आत्मनिर्भर बनाउने दिशामा अर्थ नीति र पहल हुनुपर्छ । यो दिशामा अघि बढ्यो भने सबै कुरा एकैसाथ पाँच वर्षमै भनेर हामी भन्दैनौँ, आर्थिक समृिद्ध र विकासको दिशामा हाम्रा पाइला अघि बढेको व्यवहारमा देखिने गरी अघि बढ्न सक्छौँ भन्ने मलाई लाग्छ ।

प्रदेश ७ को राजधानी कहाँ बनाउनुपर्ला ?
विगतमा भएका अखण्ड सुदूरपश्चिम आन्दोलन र थरूहटको आन्दोलनलाई समेत ध्यानमा राखेर कैलाली र कञ्चनपुरको बीचमा चुरेसँग जोडिएको कंचनपुरको कृष्णपुर र कैलालीको गोदावरी नगरपालिकाको बीचमा राजधानी बनाउनु उपयुक्त हुन्छ ।






यसमा तपाईको मत

तपाईंको रुचि अनुसारको समाचारको लागि खाता खोल्नुहोस् ।

अन्य समाचार

सेल्फि र सेल्फि फोनको लहर

सेल्फि र सेल्फि फोनको लहर

सेल्फि फोनको ट्रेन्डलाई नियालेर हेर्दै र सेल्फि क्यामरा राम्रो हुनलाई केको आवश्यकता पर्छ भन्ने विषयमा टिप्पणी । ...

ट्याब्लेट रोज्दा खोज्नुपर्ने उत्तरहरु

ट्याब्लेट रोज्दा खोज्नुपर्ने उत्तरहरु

सानदार स्क्रिन हुने, बोक्न गाह्रो नहुने र चलाउन सजिलो हुने भएकाले ट्याब्लेट छोटो समयमा नै अत्यधिक लोकप्रिय भएको छ ।...

ल्यापटप छान्न सरल

ल्यापटप छान्न सरल

गाह्रोभन्दा गाह्रो कामहरु पनि सजिलै गर्न मिल्ने तर जता पनि सजिलै बोकेर हिंड्न मिल्ने भएकाले ल्यापटप अहिले पुराना शैलीका डेस्कटप...

टिभीको नयाँ रुपलाई नियाल्दा

टिभीको नयाँ रुपलाई नियाल्दा

टिभी हेर्न सजिलो छ । किन्न भने त्यति सरल नहुन सक्छ । अहिले पुराना शैलीका सिआरटि टिभीहरु उत्पादन हुन छोडिसके...

बसन्त पञ्चमीमा साँगीतिक कन्सर्ट

बसन्त पञ्चमीमा साँगीतिक कन्सर्ट

झण्डै डेढ महिनादेखी बढेको चिसोविच सोमवार मनाइएको बसन्तपञ्चमीको अवरमा वीरगन्जस्थित ठाकुरराम बहुमुखि क्याम्पसमा आयोजित साँगितिक कन्सर्टले माहोल ततायो। ...

‘हस्पिटालिटी नेपाल कन्टेस्ट’को पोखरामा अडिसन

‘हस्पिटालिटी नेपाल कन्टेस्ट’को पोखरामा अडिसन

दोस्रो सिजनको हस्पिटालिटी नेपाल कन्टेस्टको पहिलो अडिसन पोखरामा भएको छ। शनिबार पोखरामा भएको अडिसनमा कुल २८ जनाले सहभागिता जनाएका थिए।...

चीनमा रुचाइयो आमिरको पछिल्लो फिल्म

चीनमा रुचाइयो आमिरको पछिल्लो फिल्म

बलिउडका ‘मिस्टर परफेक्शनिष्ट’ आमिर खानको पछिल्लो फिल्म ‘सिक्रेट सुपरस्टार’लाई चीनमा रुचाइएको छ। भारतीय सञ्चारमाध्यमका अनुसार यो फिल्मले चिनियाँ बक्स अफिसमा...

प्रदर्शन मिति नजिकिँदा ‘पद्मावत’ को विरोध बढ्दो

प्रदर्शन मिति नजिकिँदा ‘पद्मावत’ को विरोध बढ्दो

सञ्जयलिला भन्सालीको विवादित फिल्म ‘पद्मावती’को विरोध बढिरहेको छ। जनवरी २५ मा प्रदर्शन हुने फिल्मको रिलिज मिति नजिकिँदा भारतका विभिन्न राज्यमा...