‘मेलम्चीको आम्दानीबाट २५ प्रतिशत लेबी हामीलाई दिनैपर्छ’

सोमबार, १० पुष २०७४, १४ : २२ खिलक बुढाथोकी  | @KhilakB


सिन्धुपाल्चोकका सबै क्षेत्रबाट वाम गठबन्धनका उम्मेदवार विजयी भएका बेला प्रदेशसभा क्षेत्र– २ (ख) बाट भने लोकतान्त्रिक गठबन्धनका निमा लामा विजय भए । नेपाली कांग्रेसबाट प्रदेशसभा सदस्य बनेका लामासँग नागरिकका लागि खिलक बुढाथोकीले गरेको कुराकानी :

चुनाव जित्न गाह्रो रहेछ है ?
पहिले त टिकट लिनै गाह्रो । पार्टीभित्र टिकट पाउन आन्तरिक संघर्ष गर्नुपर्छ । टिकट पाएपछि चुनाव जित्न अर्को महाभारत । झन् यसपटक त वामपन्थी एक भएर लोकतान्त्रिक गठबन्धनलाई झनै सकस भयो । 

सिन्धुपाल्चोकमा नेपाली कांग्रेसलाई जोगाउने तपाईंं नै हुनुभयो है ? 
चुनाव जित्नका लागि योगदान, कला र आत्मबल चाहिँदो रहेछ । त्यहाँका जनताले विगतमा मैले गरेका योगदानको आधारमा मत दिएका हुन् । अर्कोचाहि मैले संगठनलाई मिलाउन सक्नु नै जितको आधार मान्छु । बटारिने पार्टीको संगठनलाई मिलाउन नसक्दा चुनाव जित्न गाह्रो छ । सबैलाई मिलाएर परिचालन गर्ने मेरो कलाले राम्रो ग¥यो । मैले चुनाव जितेको ठाउँमा अहिलेसम्म कांग्रेसले जितेको थिएन । म कांग्रेसी भएर पनि जनताको मन जित्न सकेँ । भौगोलिक हिसाबले गाह्रो भए पनि जनताको घरघरमा पुगेर अपनत्व महसुस गराउँदै मत मागेँ । स्थानीय स्तरमा भिजेको हुँदा वाम गठबन्धन भए पनि चुनाव जित्ने आत्मबल थियो। 

चुनाव खर्चिलो छ, होइन त?
चुनाव जो कसैले लड्न नसक्ने भइसकेछ। म पहिलोपटक चुनाव लडेको हुँ । पर्यटन व्यवसायी भएको हुँदा गाह्रो भएन। तर, पैसा नहुनेले चुनाव लड्न नसकिने रहेछ । सहरमा भन्दा गाउँमा चुनाव महँगो छ । सवारीसाधनमै धेरै खर्च हुन्छ। 

चुनाव त जित्नुभयो, जनताको मन जित्न सक्नुहोला त?
जोस–जाँगरयुक्त युवा भएकाले मलाई जनताले मत दिएका हुन् । स्थानीय स्तरमा निरन्तर रूपमा सामाजिक काम गर्दै आएको छु । मैले गर्नै नसक्ने अजेन्डा उठाएको छैन । हेलम्बुलाई पर्यटकीय क्षेत्रका रूपमा विकास गरी रोजगारी उपलब्धता गराउने, रोजगारमुखी र गुणस्तरीय शिक्षा उपलब्ध गराउने मेरा अजेन्डा छन् । दिगो विकास अवधारणाअनुरूप यस क्षेत्रको विकास गर्न लाग्छु । विगतमा पनि यसैका लागि काम गर्दै आएको हुँदा मैले उठाएका अजेन्डा पूरा गर्न नसक्ने कारणै छैनन्।

प्रदेशसभाको सांसद्ले यस्ता विकासे एजेन्डा पूरा गर्न सक्ने अवस्था त देखिँदैन नि?
अधिकार र स्रोतमा स्थानीय सरकार शक्तिशाली छ । त्यसो भन्दैमा प्रदेश सांसद्को भूमिका नहुने होइन । स्थानीय सरकारलाई विकासमा समन्वय गराउने र त्यहाँ आएका बाधा फुकाउने नीति बनाउने काम हामीले गर्नुपर्छ । अर्को कुुरा प्रदेशसभालाई पनि निश्चित अधिकार र स्रोत दिएको हुन्छ । त्यसबाट मैले उठाएका अजेन्डा पूरा गर्नेछु ।

उपत्यकामा खानेपानीका लागि ल्याइने मेलम्चीको मुहान तपाईंको क्षेत्रमा पर्छ, तपाईंले लेबी उठाउने अजेन्डा अघि सार्नुभएको रहेछ ? तपाईंहरूलाई लेबी किन दिने? 
मेलम्चीको पानी उपत्यकामा भित्रिन लागेको छ । निर्माण अन्तिम चरणमा छ । उपत्यकावासीले मेलम्चीको पानी पिउँदै छन् । तर, पानीको मुहानवासीले केही पाएका छैनन् । त्यसैले मेलम्चीको पानी वितरणबाट उठ्नेमध्ये २५ प्रतिशत रकम हामीलाई लेबीका रूपमा दिनुपर्ने माग गरेका हौँ । चुनावी अजेन्डामा समेटिएको यो कुरा जसरी पनि लागू गराएरै छाड्ने हो । लेबी पाएको खण्डमा यहाँको विकास गर्न केन्द्रीय बजेटको मुख ताक्नैपर्दैन । 

चुनावमा कांग्रेस निकै कमजोर देखियो, यसलाई कसरी लिनुभएको छ?
चुनावमा पाएको मत हिसाब गर्दा कांग्रेस कमजोर नभएर बलियो भएको छ । तर, वामपन्थीहरू एक हुँदा भोगेको हारलाई त्यो रूपमा हेरिनु हुन्न । कांग्रेस पार्टी सुध्रिने अवसरका रूपमा लिनुपर्छ । सोहीअनुसार कांग्रेस सुध्रिनुपर्छ । उदाहरणका लागि मेरो ठाउँमा अरु कुनै पाको व्यक्ति उठेको थियो भने चुनाव जित्न सक्दैनथ्यो । युवा भएका नाताले पनि जनताले मनपराएका हुन् । त्यसैले कांग्रेसमा पनि युवा नेतृत्वले ठाउँ पाएर जोस–जाँगरका साथ काम गर्दा कांग्रेस कमजोर हुनेछैन ।






यसमा तपाईको मत

तपाईंको रुचि अनुसारको समाचारको लागि खाता खोल्नुहोस् ।

अन्य समाचार

सेल्फि र सेल्फि फोनको लहर

सेल्फि र सेल्फि फोनको लहर

सेल्फि फोनको ट्रेन्डलाई नियालेर हेर्दै र सेल्फि क्यामरा राम्रो हुनलाई केको आवश्यकता पर्छ भन्ने विषयमा टिप्पणी । ...

ट्याब्लेट रोज्दा खोज्नुपर्ने उत्तरहरु

ट्याब्लेट रोज्दा खोज्नुपर्ने उत्तरहरु

सानदार स्क्रिन हुने, बोक्न गाह्रो नहुने र चलाउन सजिलो हुने भएकाले ट्याब्लेट छोटो समयमा नै अत्यधिक लोकप्रिय भएको छ ।...

ल्यापटप छान्न सरल

ल्यापटप छान्न सरल

गाह्रोभन्दा गाह्रो कामहरु पनि सजिलै गर्न मिल्ने तर जता पनि सजिलै बोकेर हिंड्न मिल्ने भएकाले ल्यापटप अहिले पुराना शैलीका डेस्कटप...

टिभीको नयाँ रुपलाई नियाल्दा

टिभीको नयाँ रुपलाई नियाल्दा

टिभी हेर्न सजिलो छ । किन्न भने त्यति सरल नहुन सक्छ । अहिले पुराना शैलीका सिआरटि टिभीहरु उत्पादन हुन छोडिसके...

पद्मावतीलाई चार राज्यमा प्रतिबन्ध, अदालत पुगे निर्माता

पद्मावतीलाई चार राज्यमा प्रतिबन्ध, अदालत पुगे निर्माता

राजपूत समुदायको विरोधपछि फिल्मको नाम परिवर्तन (पद्मावत) र दृश्य परिमार्जनसहित सेन्सर बोर्डबाट प्रदर्शनको अनुमति पाएको ‘पद्मावती’लाई राजसंस्थान, हरियाणा, गुजरात र...

साली बन्दै मरिस्का

साली बन्दै मरिस्का

नेपाली कथानक चलचित्र ‘साली कसको भेनाको’ मंगलबार चितवनमा शुभमुहूर्त गरिएको छ । मुभिङ पिक्चर्सद्वारा निर्मीत फिल्ममा वरिष्ठ कलाकार ऋद्धिचरण श्रेष्ठले...

‘शेरबहादुर हलिउडबाट प्रभावित’

‘शेरबहादुर हलिउडबाट प्रभावित’

फिल्म ‘शेरबहादुर’को ट्रेलर सार्वजनिक हुँदा यो फिल्म हलिउडको फिल्म ‘डन्ट ब्रिथ’बाट प्रभावित भएको आरोप लागेको थियो । फिल्म प्रभावित भएको...

लघुकथा वाचन तथा विमोचन

लघुकथा वाचन तथा विमोचन

शब्दपथको आयोजनामा लघुकथा सर्जक महेश प्रसार्इंको लघुकथा ‘अतिरिक्त स्वरहरू’को विमोचन ललितपुरको सिद्धेश्वर मन्दिर प्राङ्गण, लेलेमा सम्पन्न गरिएको छ । ...