‘प्रदेश राजधानी काठमाडौंबाहिर हुनुपर्छ’

सोमबार, १७ पुष २०७४, १६ : ३८ नागरिक


सुरेन्द्रराज गोसाइ, प्रदेशसभा सदस्य
भक्तपुर क्षेत्र– १ (ख)

प्रदेशसभामा चुनिनुभयो, कस्तो महसुस भएको छ ?
जिम्मेवारी र दायित्व थपिएको महसुस भएको छ । अब म आफ्ना निम्ति होइन, जनताका निम्ति बाँच्नुपर्छ । मैले चुनावका बेला देखाएका सपना पूरा गर्नुपर्छ । समाजका नकारात्मक पक्ष रूपान्तरण गर्ने मेरो मुख्य लक्ष्य हो । जनताले जुन आकांक्षा राखेर मत दिनुभयो, त्यसलाई पूरा गर्नेछु ।

विजयी पछिका दिन कसरी बित्दै छन् ?
विजयी भएपछि म मतदाताको घर–घरमा पुग्ने गरेको छु । बिहानैदेखि साँझसम्म जनताकै रायसुझाव संकलनमा व्यस्त हुन्छु । चुनाव जित्नुपहिले भोट माग्न जनताको घरदैलो पुगेको थिएँ, अहिले पनि उहाँहरूका पीरमर्का बुझेको छु । मतदाताले आफ्ना धेरै पीरमर्का साटेका छन् । ती सबै सम्बोधन गर्नेछु । रायसुझाव लिने सिलसिला सकिएपछि मात्रै काममा लाग्छु । 

जनता कस्तो पीरमर्कामा रहेछन् त ?
नेपालको राजनीतिक अवस्था देखेर जनता दिक्क छन् । धेरैले त राजनीतिलाई विश्वास नै गर्न छाडेका छन् । म घरदैलोमा पुग्दा पनि अधिकांश मतदाताले विगतमा नेतृत्व गर्नेले पनि सपना मात्रै देखाए, तपाईंले पनि त्यही त गर्ने होला भनेका छन् । युवाले रोजगार सिर्जना गर्न र विदेशी हस्तक्षेप रोक्न सुझाव दिएका छन् । पाका पुस्ताले संस्कृति जोगाउन अपिल गरेका छन् । यी कुरा हामीले जसरी पनि सम्बोधन गर्नुपर्छ । विगतमा सत्तामा पुग्नेले काम नगरेका कारण अहिले धेरै जनता निराश भएका हुन् । अझै पनि सबैतिर भ्रष्टाचार मौलाएको छ । जबसम्म भ्रष्टाचार रोकिन्न, तबसम्म देशको विकास सम्भव छैन । अब छुट्टै नीति बनाएर भ्रष्टाचारीलाई नङ्ग्याउन जरुरी छ । 

कस्ता कार्य गरेकाले विजय भएजस्तो लाग्छ ?
विगतमा पार्टीको आचारसंहिताअनुसार इमानदार राजनीति गरेकाले म विजयी भएको हुँ । मैले स्थानीय जनताको जीवनस्तरमा सुधार ल्याउन पनि विगतमा धेरै काम गरेको छु । मसँग १७ वर्ष शिक्षण पेसा अँगालेको अनुभव छ । पञ्चायतकालदेखि नै देशको आर्थिक विकासमा टेवा पुग्ने काम गर्दै आएको छु । यहाँका सांस्कृतिक सम्पदा संरक्षण क्षेत्रमा पनि विगतदेखि नै काम गरेको छु । यो कुरा यहाँका जनतालाई राम्ररी थाहा छ । नेपाल क्रान्तिकारी संस्कृति संघको अध्यक्ष भएर सम्पदा क्षेत्रमा काम गरेको अनुभव पनि छ । त्यसैले मैले उठाएका अजेन्डा सहजै पूरा गर्न सक्छु । 

तपाईंले तत्काल आफ्नो क्षेत्रमा गर्न सक्ने काम के के हुन् ?
मैले शिक्षा र सांस्कृतिक क्षेत्रलाई प्राथमिकतामा राखेको छु । यो क्षेत्रमा मेरो लामो अनुभव पनि छ, त्यसैले भक्तपुरको शिक्षा र सांस्कृतिक क्षेत्रलाई अन्य जिल्लाको भन्दा फरक बनाउँछु । पारदर्शी बनाउँछु । मौलिकता नमेटिने गरी सम्पदा संरक्षणलाई अघि बढाउँछु । महिलाका लागि रोजगार सिर्जना गर्ने कामलाई पनि मैले मुख्य स्थानमा राखेको छु । अर्को कुरा मलाई जुन काम गर्नु भनेर जनताले जिताउनुभयो, मैले अब त्यही काम गर्नुपर्छ । 

तपाईंले शिक्षा र संस्कृतिको मात्रै कुरा गर्नुभयो, भक्तपुर जोड्ने मुख्य सडकको अवस्था बिजोग छ, यसको जिम्मा कसले लिने ? 
हामी सबैले गर्ने हो । सबैले आ–आफ्नो भूमिका निभाउने हो भने हरेक कुरा समाधान हुन्छ । भक्तपुर सहर अहिले भीडभाड हुन थालेको छ । १० वर्षपहिले यहाँ सुनसान थियो, अहिले जनसंख्या चापले गर्दा सहर अस्तव्यस्त हुन थालेको छ । अब यहाँका सडक फराकिला बनाउन जरुरी छ । त्यसका निम्ति नयाँ योजना बनाउँछौँ । स्थानीय तहसँग मिलेर काम गर्छौं । मैले आफ्नो घोषणापत्रमा सडक निर्माण कार्यलाई पनि मुख्य स्थानमा राखेको छु ।

एक वर्षदेखि कमलविनायक नगरकोट मूल सडक लथालिंग छ, आजसम्म तपाईंको ध्यान त्यहाँ किन पुगेन ?
हामीले यो सडक मर्मतका लागि कैयौँपल्ट सम्बन्धित निकायसँग झगडा गरेका छौँ । सडकको अवस्था नाजुक भएपछि यहाँका जनप्रतिनिधिसँग पटक–पटक बैठक पनि बसेका छौँ । अहिले काम अघि बढेको छ । भत्केको पार्टी साइटमा कालोपत्र पनि सुरु भएको छ । त्यस्तै, अब यो सडकखण्डलाई काठमाडौं जोड्ने वैकल्पिक मार्ग बनाउने कुरा पनि मैले पटक–पटक उठाएको छु । तर, सबै पक्षले नमानेकाले काम शून्य छ । 

तपाईंले कृषि उत्पादनलाई मुख्य चुनावी अजेन्डा बनाउनुभएको थियो, तपाईंको क्षेत्रमा खेतीयोग्य जमिन धमाधम मासिएर क्रंकिट बन्दै गएको छ नि ?
यो कुरा साँचो हो । यहाँका जग्गा अति नै खेतीयोग्य मानिन्छ । तर, अहिले प्लटिङ गर्ने र घर बनाउने कार्यले गर्दा खाली जग्गा सकिन लागेको छ । यसमा खास कमजोरी सरकारकै देखिन्छ । सरकारको कमजोर नीतिका कारण यस्तो अवस्था आएको हो । जग्गाको खण्डीकरणले कृषियोग्य जमिनलाई मासिरहेको छ । यो विषयमा कडा नीति ल्याएर जग्गाका दलाललाई कस्न आवश्यक छ । 

प्रदेशसभा र सरकारसँग खासै अधिकार रहँदैन, आफ्ना सपना कसरी पूरा गर्नुहुन्छ ?
प्रदेश सरकारको आफ्नै क्षेत्राधिकार छन् । हामीले आफ्नो अधिकारभित्र पर्ने काम गर्ने हो । अन्य सरकारी निकायसँग पनि सहकार्य गरी अघि बढ्ने हो । अरु देशमा प्रदेश सरकारले धेरै काम गरेका उदाहरण पनि छन् । आफ्नो प्रदेशलाई कस्तो बनाउने भन्ने विषय प्रदेश सरकारमै निर्भर हुन्छ । सरकारको नियमअनुसार विकासका काम अघि बढाउँछौँ ।

प्रदेश ३ को राजधानी कहाँ हुनुपर्छ ?
म त भन्छु ३ नम्बर प्रदेशको राजधानी काठमाडौंभन्दा बाहिर हुनुपर्छ । काठमाडौंलाई राजधानी बनाइयो भने काठमाडौं झनै अस्तव्यस्त हुन्छ । यसको भूगोलले थाम्न सक्दैन । अरु जिल्लाका मानिस पनि यहीँ भरिन्छन् । बरु उपत्यका बाहिर बनाइयो भने काठमाडौं खुकुलो पनि हुन्छ । अर्को कुरा राजधानी भनेको सबैको सहज पहुँच हुने ठाउँमा हुनुपर्छ । सबैले सजिलै सेवा पाउनुपर्छ । 
 प्रस्तुति : शिवहरि घिमिरे 






यसमा तपाईको मत

तपाईंको रुचि अनुसारको समाचारको लागि खाता खोल्नुहोस् ।

अन्य समाचार

सेल्फि र सेल्फि फोनको लहर

सेल्फि र सेल्फि फोनको लहर

सेल्फि फोनको ट्रेन्डलाई नियालेर हेर्दै र सेल्फि क्यामरा राम्रो हुनलाई केको आवश्यकता पर्छ भन्ने विषयमा टिप्पणी । ...

ट्याब्लेट रोज्दा खोज्नुपर्ने उत्तरहरु

ट्याब्लेट रोज्दा खोज्नुपर्ने उत्तरहरु

सानदार स्क्रिन हुने, बोक्न गाह्रो नहुने र चलाउन सजिलो हुने भएकाले ट्याब्लेट छोटो समयमा नै अत्यधिक लोकप्रिय भएको छ ।...

ल्यापटप छान्न सरल

ल्यापटप छान्न सरल

गाह्रोभन्दा गाह्रो कामहरु पनि सजिलै गर्न मिल्ने तर जता पनि सजिलै बोकेर हिंड्न मिल्ने भएकाले ल्यापटप अहिले पुराना शैलीका डेस्कटप...

टिभीको नयाँ रुपलाई नियाल्दा

टिभीको नयाँ रुपलाई नियाल्दा

टिभी हेर्न सजिलो छ । किन्न भने त्यति सरल नहुन सक्छ । अहिले पुराना शैलीका सिआरटि टिभीहरु उत्पादन हुन छोडिसके...

पद्मावतीलाई चार राज्यमा प्रतिबन्ध, अदालत पुगे निर्माता

पद्मावतीलाई चार राज्यमा प्रतिबन्ध, अदालत पुगे निर्माता

राजपूत समुदायको विरोधपछि फिल्मको नाम परिवर्तन (पद्मावत) र दृश्य परिमार्जनसहित सेन्सर बोर्डबाट प्रदर्शनको अनुमति पाएको ‘पद्मावती’लाई राजसंस्थान, हरियाणा, गुजरात र...

साली बन्दै मरिस्का

साली बन्दै मरिस्का

नेपाली कथानक चलचित्र ‘साली कसको भेनाको’ मंगलबार चितवनमा शुभमुहूर्त गरिएको छ । मुभिङ पिक्चर्सद्वारा निर्मीत फिल्ममा वरिष्ठ कलाकार ऋद्धिचरण श्रेष्ठले...

‘शेरबहादुर हलिउडबाट प्रभावित’

‘शेरबहादुर हलिउडबाट प्रभावित’

फिल्म ‘शेरबहादुर’को ट्रेलर सार्वजनिक हुँदा यो फिल्म हलिउडको फिल्म ‘डन्ट ब्रिथ’बाट प्रभावित भएको आरोप लागेको थियो । फिल्म प्रभावित भएको...

लघुकथा वाचन तथा विमोचन

लघुकथा वाचन तथा विमोचन

शब्दपथको आयोजनामा लघुकथा सर्जक महेश प्रसार्इंको लघुकथा ‘अतिरिक्त स्वरहरू’को विमोचन ललितपुरको सिद्धेश्वर मन्दिर प्राङ्गण, लेलेमा सम्पन्न गरिएको छ । ...