डा. केसीले अनशन तोडे

‘दायाँबायाँ भए फेरि लड्छु’

आइतबार, ३० पुष २०७४, ०७ : ५३ नागरिक


काठमाडौं– अदालतमा हुने भ्रष्टाचारमाथि छानबिन हुनुपर्नेलगायतका माग राखेर ६ दिनदेखि आमरण अनशनमा रहेका त्रिवि शिक्षण अस्पतालका डा. गोविन्द केसीले शनिबार अनशन तोडेका छन्। 

१४ औं पटक अनशन बसेकोे पाँचौं दिन शुक्रबार राति अबेर सरकारसँग सहमति भएपछि केसीले शनिबार अनशन तोडेका हुन् । डा.केसी र सरकार पक्षबीच पाँचबुँदे सहमति भएको छ।

त्रिवि शिक्षण अस्पतालको गेटमा विगत २५ वर्षदेखि जुत्ता सिलाउँदै आएका सिरहाका नथुनिया मोचीको हातबाट जुस खाएर डा. केसीले अनशन अन्त्य गरे । यसअघि बिरामी वा सामान्य मानिसका हातबाट जुस खाएर अनशन तोड्दै आएका केसीले यसपटक मोचीलाई अनशन तोडाउने व्यक्तिका रूपमा रोजेका थिए । डा. केसीले आफू स्वास्थ्य सेवाबाट वञ्चित तीन करोड नेपालीका लागि लड्दै आएको भन्दै नथुनियालाई वास्तविक नेपालीको प्रतिनिधिका रुपमा रोजेको बताए । अनशन तोड्नेबित्तिकै त्रिवि शिक्षण अस्पतालमा उनको उपचार सुरु भएको छ। 

चिकित्सा शिक्षा आयोगलाई पूर्णता दिन ७ दिनभित्र समिति
आइओएम डिनमा डा. अग्रवाललाई नै निरन्तरता 
त्रिवि विनियमावली संशोधनका लागि सिनेट बोलाइने

केसीको मागबमोजिम सरकार चिकित्सा शिक्षा अध्यादेशको दफा २३ अनुसारको चिकित्सा शिक्षा आयोग गठन गर्न ७ दिनभित्रै सिफारिस समिति बनाउन सहमत भएको छ । लोकसेवा आयोगका उपाध्यक्षको नेतृत्वमा बन्ने यस्तो समितिको सिफारिसअनुसार मन्त्रिपरिषद्ले आयोगको कार्यकारी उपाध्यक्षमा नियुक्तिको सिफारिस गर्नेछ । आयोगका अधिकांश सदस्य पदेन हुनेछन् । अन्य मनोनीत सदस्य उपाध्यक्षको सिफारिस अध्यक्ष एवं प्रधानमन्त्रीले गर्ने व्यवस्था छ । 
१३ औं अनशनको प्रमुख मागका रुपमा रहेको चिकित्सा शिक्षा ऐन जारी हुन नसकेपछि सरकारले अध्यादेशमार्फत उक्त ऐन जारी गरेको थियो । सरकार अध्यादेशअनुसारको आयोग गठनका पक्षमा सहमत देखिएको छ। 

त्यस्तै सरकार चिकित्साशास्त्र अध्ययन संस्थानको डिनमा डा. जगदीशप्रसाद अग्रवाललाई नै निरन्तरता दिन सहमत भएको छ । सहमतिमा सर्वाेच्चको आदेशमा ‘जहाँसम्म हाल नियुक्त भएका प्रा.डा जगदीशप्रसाद अग्रवालको नियुक्ति छ, सो नियुक्तिलाई गैरकानुनी हो भन्ने पुष्टि गर्ने आधार नभएको’ भनी गरिएको आदेशअनुसार नै अग्रवालको नियुक्ति वैध भएको उल्लेख छ। 

आदेशका आधारमा डिनमा अग्रवाललाई नै निरन्तरता दिन त्रिवि कुलपतिमार्फत सम्बन्धित निकायलाई निर्देशन दिने सहमतिसमेत सरकारले गरेको छ । त्रिविका कुलपति प्रधानमन्त्री हुने व्यवस्था छ।

त्यसैगरी डा. केसीका मागको स्थायी बुँदाजस्तै बनेको चिकित्साशास्त्र अध्ययन संस्थान (आइओएम) को खोसिएको अधिकार फिर्ता गर्ने विषयमा पनि सहमति भएको छ । उक्त बुँदा कार्यान्वयनका लागि त्रिविका कुलपतिले उपकुलपतिलाई यथाशीघ्र निर्देशन दिने भएका छन् । ‘आइओएमको अधिकार फिर्तासम्बन्धी त्रिवि नियमावली संशोधन गर्नका लागि तत्काल त्रिविसभा (सिनेट) विशेष बैठक बोलाउने’ सम्झौतामा उल्लेख छ।

त्रिवि शिक्षण अस्पतालको पूर्वाधार एवं जनशक्ति वृद्धिसहित सेवासुविधा विस्तारका लागि आइओएम डिन कार्यालयले राख्ने विस्तारित प्रस्तावमा स्वास्थ्य मन्त्रालयले आर्थिक व्यवस्था गर्ने सहमति भएको छ।

अनशन तोडेपछि डा. केसीले सत्य कुरा बोल्ने सत्याग्रहीलाई सत्याग्रहमा राख्ने तर अदालतलाई ढाँट्नेहरु खुलेआम हिँडिरहेको भन्दै आक्रोश व्यक्त गरे । उनले आफूले पहिलो अनशनदेखि नै राजनीतिक भागभन्डाका आधारमा नभई वरिष्ठताका आधारमा आइओएम डिन नियुक्तिको माग राख्दै आएको भन्दै यसपटक पनि दायाँबायाँ भए आफू फेरि लड्ने बताए । ‘कानुनी रुपमा डा.अग्रवाल नै डिन हुन् । न्याय बिक्री भए म फेरि लड्छु,’ उनले भने । उनले मानहानिको हतियार देखाएर कोही नडराउने भन्दै उपयुक्त समयमा फेरि पनि लड्ने बताए। 

चार वर्षअघि डिनबाट बर्खास्त भएका  डा. शशि शर्मालाई पुनर्बहाली गरेपछि गत सोमबारदेखि डा. केसीले अनशन थालेका थिए । अनशन बसेपछि सोही दिन सर्वोच्चमा मानहानि मुद्दा दायर भएको थियो । सर्वोच्चको आदेशबमोजिम उनी पक्राउ परेका थिए । डा. केसीले दुई रात हिरासतमै बसेर अनशनलाई निरन्तरता दिएका थिए । उनी बुधबार तारेख रिहा भएका थिए। 

केसी पक्षसँगको वार्तामा सरकारका तर्फबाट स्वास्थ्यमन्त्री दिपक बोहोरा, योजना आयोगका उपाध्यक्ष डा. स्वर्णिम वाग्ले र पुनर्निर्माण प्राधिकरणका पूर्वप्रमुख कार्यकारी अधिकृत गोविन्द पोखरेल केसी खटिएका थिए । शुक्रबार साँझदेखि सुरु भएको वार्ता अबेर राति टुंगिएको थियो । दुवै पक्ष सहमति नजिक पुगेपछि केसीका तर्फबाट डा. अभिषेक सिंह, डा. सुमन आचार्यलगायतले डा. केसीलाई सहमतिका बुँदा सुनाएका थिए । त्यसमा डा. केसी सहमत भएसँगै राति नै सम्झौतामा हस्ताक्षर भएको थियो। 

सम्झौतामा डा. केसीले सोमबार अनशन थाल्दा प्रमुख मागका रुपमा रहेको प्रधानन्यायाधीशले राजीनामा दिनुपर्ने विषयमा केही उल्लेख छैन । प्रधानन्यायाधीश गोपाल पराजुलीको नागरिकता र शैक्षिक प्रमाणपत्रसहित डा. शशि शर्माको विषयमा भएको फैसलासमेत झिकाउन सर्वोच्चबाट आदेश भएपछि केसीले त्यसको स्वागत गरिसकेका छन् । ती विषय अदालतमा विचाराधीन भएको भन्दै सम्झौतामा उल्लेख नभएको हो। 






यसमा तपाईको मत

तपाईंको रुचि अनुसारको समाचारको लागि खाता खोल्नुहोस् ।

अन्य समाचार

सेल्फि र सेल्फि फोनको लहर

सेल्फि र सेल्फि फोनको लहर

सेल्फि फोनको ट्रेन्डलाई नियालेर हेर्दै र सेल्फि क्यामरा राम्रो हुनलाई केको आवश्यकता पर्छ भन्ने विषयमा टिप्पणी । ...

ट्याब्लेट रोज्दा खोज्नुपर्ने उत्तरहरु

ट्याब्लेट रोज्दा खोज्नुपर्ने उत्तरहरु

सानदार स्क्रिन हुने, बोक्न गाह्रो नहुने र चलाउन सजिलो हुने भएकाले ट्याब्लेट छोटो समयमा नै अत्यधिक लोकप्रिय भएको छ ।...

ल्यापटप छान्न सरल

ल्यापटप छान्न सरल

गाह्रोभन्दा गाह्रो कामहरु पनि सजिलै गर्न मिल्ने तर जता पनि सजिलै बोकेर हिंड्न मिल्ने भएकाले ल्यापटप अहिले पुराना शैलीका डेस्कटप...

टिभीको नयाँ रुपलाई नियाल्दा

टिभीको नयाँ रुपलाई नियाल्दा

टिभी हेर्न सजिलो छ । किन्न भने त्यति सरल नहुन सक्छ । अहिले पुराना शैलीका सिआरटि टिभीहरु उत्पादन हुन छोडिसके...

पद्मावतीलाई चार राज्यमा प्रतिबन्ध, अदालत पुगे निर्माता

पद्मावतीलाई चार राज्यमा प्रतिबन्ध, अदालत पुगे निर्माता

राजपूत समुदायको विरोधपछि फिल्मको नाम परिवर्तन (पद्मावत) र दृश्य परिमार्जनसहित सेन्सर बोर्डबाट प्रदर्शनको अनुमति पाएको ‘पद्मावती’लाई राजसंस्थान, हरियाणा, गुजरात र...

साली बन्दै मरिस्का

साली बन्दै मरिस्का

नेपाली कथानक चलचित्र ‘साली कसको भेनाको’ मंगलबार चितवनमा शुभमुहूर्त गरिएको छ । मुभिङ पिक्चर्सद्वारा निर्मीत फिल्ममा वरिष्ठ कलाकार ऋद्धिचरण श्रेष्ठले...

‘शेरबहादुर हलिउडबाट प्रभावित’

‘शेरबहादुर हलिउडबाट प्रभावित’

फिल्म ‘शेरबहादुर’को ट्रेलर सार्वजनिक हुँदा यो फिल्म हलिउडको फिल्म ‘डन्ट ब्रिथ’बाट प्रभावित भएको आरोप लागेको थियो । फिल्म प्रभावित भएको...

लघुकथा वाचन तथा विमोचन

लघुकथा वाचन तथा विमोचन

शब्दपथको आयोजनामा लघुकथा सर्जक महेश प्रसार्इंको लघुकथा ‘अतिरिक्त स्वरहरू’को विमोचन ललितपुरको सिद्धेश्वर मन्दिर प्राङ्गण, लेलेमा सम्पन्न गरिएको छ । ...