प्रतिनिधिलाई प्रश्न

‘पैसा कमाउन होइन, जनताको सेवा गर्न आएको हुँ’

सोमबार, २९ माघ २०७४, १२ : ५५ नागरिक



राजेन्द्रकुमार महर्जन
वडाध्यक्ष, कीर्तिपुर नगरपालिका– ५

जनप्रतिनिधि भएर आएपछि के–के काम गर्नुभयो ?
लामो समय स्थानीय तह जनप्रतिनिधिविहीन रह्यो । जनप्रतिनिधि नहुँदा स्थानीय तह अस्तव्यस्त र भद्रगोल रूपमै सञ्चालन हुँदै आयो । हामी निर्वाचित भएदेखि नै अस्तव्यस्त रहेको स्थानीय तहलाई सुधार्नेतर्फ लागेका छौँ । वडा कार्यालयका तर्फबाट जनतालाई दिने सेवा–सुविधामा कुनै कमी हुन दिएका छैनौँ । तर, विकास निर्माणको काम अति नै सुस्त गतिमा भइरहेको छ । जनप्रतिनिधि भएर आएसँगै पांगा जनसेवा स्कुलदेखि गाखासम्म चार सय मिटर क्षेत्रमा ढल निर्माण गरेर सम्पन्न गरिसकेका छौँ ।

भत्केको पार्टी–पांगा–गाखा हुँदै सुन्दरीघाटसम्म ढल निर्माणका लागि विस्तृत परियोजना प्रतिवेदन (डिपिआर) तयार भइसकेको छ । अब छिटै ढल निर्माणसँगै सुन्दरीघाटमा फोहोर प्रशोधनका लागि ‘ट्रिटमेन्ट प्लान्ट’ बनाउन लागिरहेका छौँ । असहाय, गरिब तथा आयस्रोत कम भएका एक सय ५० जनालाई जाडोबाट बच्न ब्ल्यांकेट समेत हस्तान्तरण गरेको छु । त्यसैगरी, भत्केको पाटीस्थित अधिकारी गाउँमा २० हजार लिटरको खानेपानी ट्यांकीको निर्माण सम्पन्न गरेर वितरण गर्ने तयारीमा जुटेका छौँ ।

जनप्रतिनिधि भएर काम गर्न कत्तिको सहज रहेछ ?
जनप्रतिनिधिको जिम्मेवारी र अधिकार क्षेत्र फराकिलो छ । तर, स्थानीय निकायको बजेट अत्यन्तै न्यून छ । जनताका आकांक्षा र चाहना धेरै छन् । जनप्रतिनिधिले ‘जादुको छडी’ले जस्तै एकैचोटि सबै काम गरिदिऊन् भन्ने जनचाहना देखिन्छ । जनताका तर्फबाट आएका चाहना जायज छन् । तर, हामीसँग बजेट साह्रै कम छ । जसकारण जनअपेक्षाअनुसार काम गर्न सकिरहेका छैनौँ । वडा कार्यालयले विभिन्न शीर्षकमा मासिक तीनदेखि चार लाख रुपैयाँसम्म कमाइ गर्दै आइरहेको छ । तर, वडाका लागि बजेट निकै कम छ । वडाले आम्दानी गरेको राजस्व वडामै खर्च गर्न पाइँदैन । कमाई गरेको सबै रकम नगरपालिकामा पेस गर्नुपर्ने बाध्यता रहँदै आएको छ ।

वडा कार्यालयमा सेवाग्राही कस्ता–कस्ता समस्या बोकेर आउँछन् ?
सडक कालोपत्रे हुनुपर्यो, खानेपानीको व्यवस्था हुनुपर्यो, भूकम्पपीडित राहत रकम पाउनुप¥यो भनेर सेवाग्राही आउने गर्छन् । योसँगै नागरिकताको सिफारिस गर्न, जग्गाको साँध विवाद लगायत समस्या लिएर पनि आउँछन्् । केहीले त घुस दिने कुरा पनि गर्छन् । एउटा व्यक्तिको जग्गा अर्कैको नाममा सिफारिस गरिदिनुस्, लाखौँ पैसा दिन्छौँ भनेर बार्गेनिङ गर्न समेत आएका छन् । त्यस्तालाई पुलिस बोलाएर कारबाही गर्छु भनेर पठाएको छु । कसैलाई सम्झाइबुझाइ गरेर पठाएको छु । म स्वच्छ राजनीति गर्न आएको हुँ । त्यसैले कसैको दबाब र प्रभावमा परेर गलत निर्णय गरेको छैन । म राजनीतिमा पैसा कमाउन आएको होइन, जनताको सेवा गर्न आएको हुँ ।वडा कार्यालयबाट तलबबापत २२ हजार रुपैयाँ आउने गर्छ । त्यसको ५० प्रतिशत रकम वडाका गरिब, दुःखी, असहाय तथा अपांगता भएका व्यक्तिलाई वितरण गर्दै आएको छु । मैले आफ्नै तीनवटा घरेलु उद्योग सञ्चालन गरेको छु । मलाई त्यसैबाट दालभात खान पुग्छ । त्यसैले गलत क्रियाकलाप गर्नेविरुद्ध कडा रूपमा उत्रँदै आइरहेको छु ।

तपाईंको वडामा अधिकांश सडक कच्ची छन्, कालोपत्रे कहिले गर्नुहुन्छ ?
मेरो वडामा अधिकांश सडक कच्ची छन् । करिब १० किलोमिटर सडकमध्ये मुस्किलले एक किलोमिटर सडक मात्रै कालोपत्रे भएको छ । वर्षात्का बेला घुँडाघुँडासम्म हिलो जम्ने गर्छ । त्यसैले वडा कार्यालयले अहिले अधिकांश कच्ची सडकलाई कालोपत्रे गर्ने अभियान चलाएको छ । एक किलोमिटर सडक कालोपत्रे गर्न एक करोड रुपैयाँ लाग्ने रहेछ । वडा कार्यालयको वर्षभरिको बजेट नै ५० लाख रुपैयाँ छ । त्यसैले बजेट नहुँदा सडक कालोपत्रे गर्न सकिरहेका छैनौँ । अब वडाका सडकलाई राष्ट्रिय योजना तथा संसद्को विकास कोषमार्फत भए पनि कालोपत्रे गराउने योजना बनाएको छु । सकभर मेरो कार्यकालभित्रै सबै सडक कालोपत्रे गर्ने योजना बनाएको छु । हेरौँ, कति सफल भइन्छ । जनसेवा स्कुलदेखि भत्केको पार्टीसम्मका सात सय मिटर सडक केन्द्रीय योजनाअन्तर्गत परे पनि अझैसम्म कालोपत्रे हुन सकिरहेको छैन । त्यसलाई कालोपत्रे गर्न सडक विभाग तथा डिभिजन सडक कार्यालयसँग पहल कदमी गरिरहेको छु ।

तपाईंको वडामा ढल समेत व्यवस्थित हुन सकेका छैनन् नि ?
खानेपानी तथा ढल निर्माण गर्ने स्थानीय तह रहेको छ । जनताबाट महसुल उठाउने काम भने ढल तथा खानेपानी विभागले गरिरहेको छ । वडा कार्यालयले भर्खरै पांगा जनसेवा स्कुलदेखि गाखासम्म चार सय मिटर क्षेत्रमा ढल निर्माण गरेर सम्पन्न गरिसकेका छौँ । भत्केको पार्टी–पांगा–गाखा हुँदै सुन्दरीघाटसम्म ढल निर्माणका लागि विस्तृत परियोजना प्रतिवेदन (डिपिआर) तयार भइसकेको छ । अब छिटै ढल निर्माण सँगै सुन्दरीघाटमा फोहोर प्रशोधनका लागि ‘ट्रिटमेन्ट प्लान्ट’ बनाउन लागिरहेका छौँ । त्यो बनेसँगै वडामा ढलको स्थायी समस्या समाधान हुनेछ ।

बालकुमारी स्वास्थ्यचौकीमा औषधिको अभाव देखिएको छ, कसरी व्यवस्थापन गर्दै आउनुभएको छ ?
हाम्रो वडामा रहेको स्वास्थ्यचौकीमा केही समयदेखि औषधिको समस्या देखिएको हो । केही समयअघिसम्म स्वास्थ्यचौकी केन्द्रीय सरकार मातहत नै हुन्थ्यो । अहिले स्थानीय तह मातहत ल्याएको छ । त्यसैले केही समयका लागि व्यवस्थापन गर्न समस्या देखिएको हो । नगरपालिकाले स्वास्थ्यचौकीमा आवश्यक औषधिका लागि जिल्ला जनस्वास्थ्य कार्यालयसँग समन्वय गरिरहेको छ । त्यस्तै, वडा कार्यालयले स्वास्थ्यचौकीमा चाहिने खानेपानी, विद्युत् टेलिफोन लगायत महसुल तिर्दै आइरहेको छ । नगरपालिकाले स्वास्थ्यचौकीका लागि हालसालै ५० हजार रुपैयाँ बजेट लिएर औषधि व्यवस्थापन गर्न लगाएका छौँ । त्यसैगरी, हाम्रो वडामा आयुर्वेदिक औषधालय समेत रहेको छ । त्यसलाई पनि व्यवस्थित रूपमा चलाउँदै आइरहेका छौँ ।

महिला तथा ज्येष्ठ नागरिकका लागि कस्तो योजना अघि सार्नुभएको छ ?
कीर्तिपुर नगरपालिकाको नगरपरिषद् बैठकले ७० वर्ष पुगेका मधुमेह र प्रेसरका बिरामी ज्येष्ठ नागरिकलाई एक हजार पाँच सय स्वास्थ्योपचार खर्च उपलब्ध गराउँदै आएको छ । स्वास्थ्यभत्ता अहिले वडामा टाठाबाठा रोगीले मात्रै पाउँदै आइरहेको जनगुनासो आएको छ । त्यसैले वडाका ७० वर्ष नाघेका गरिब, असहाय रोगीको पहुँचमा भत्ता नपुगेको भान भइरहेको छ । वडा कार्यालयले स्वास्थ्यभत्ता आर्थिक हैसियत कम हुनेलाई मात्रै दिने पहलकदमी गरिराखेका छौँ । महिलाको आर्यआर्जनमूलक तालिम दिएर आत्मनिर्भर बनाउने प्रयत्न गरिराखेको छु ।

सार्वजनिक जग्गा अतिक्रमण भइराखेका छन्, रोक्ने कस्ता योजना छन् ?
वडाका केही स्थानमा सार्वजनिक जग्गा मिचिएको गुनासा आएका छन् । लामो समय जनप्रतिनिधि नहुनुको फाइदा उठाउँदै केही भूमाफियाले सार्वजनिक जग्गा हडपेर घर बनाएका छन् । वडा कार्यालयले सार्वजनिक जग्गा मिचेर घर बनाउनेलाई वडाले दिने सेवाबाट वञ्चित गराएको छ । सार्वजनिक जग्गा संरक्षण गर्न उपभोक्ता समिति नै गठन गरिसकेका छौँ । वडामा सार्वजनिक जग्गा मिचेर घर बनाएका भूकम्पपीडितले राहत रकमबाट समेत वञ्चित गराएका छौँ ।

नगरपरिषद्बाट कस्ता योजना अघि सार्नुभएको छ ?
नगरपरिषद्बाट ५० करोड रुपैयाँ बजेट विनियोजन भएको छ । वडा कार्यालयले ४४ लाख रुपैयाँ कच्ची सडक ग्राभेल गर्न बजेट विनियोजन गरेको छ । त्यस्तै, खानेपानी, सडक मर्मतसम्भार, ढल निर्माण र महिला सशक्तीकरण लगायत योजनालाई मुख्य प्राथमिकतामा राखेर काम गरिरहेका छौँ ।

कस्तो वडा बनाउने सपना बोक्नुभएको छ ?
म जनतालाई दुःख होइन, सुख दिन राजनीतिमा होमिएको हुँ । त्यसैले मेरोतर्फबाट जनतालाई कुनै पनि हालतमा दुःख दिन्न । वडामा एक रुपैयाँ समेत भ्रष्टाचार र हिनामिना हुन्न दिन्नँ । वडामा आवश्यक पर्ने सबै पूर्वाधार जुटाएर जनतालाई सुख र शान्तिपूर्वक बाँच्ने वातावरण बनाउने कोसिसमा जुटेको छु ।
प्रस्तुति : हिमाल लम्साल





यसमा तपाईको मत

तपाईंको रुचि अनुसारको समाचारको लागि खाता खोल्नुहोस् ।

अन्य समाचार

नयाँ सवारी दर्ता गर्ने प्रक्रिया

नयाँ सवारी दर्ता गर्ने प्रक्रिया

नयाँ सवारी खरिद गरिसके पछि सो सवारी सडकमा चलाउनु अगाडी नै दर्ता गरिसकेको हुनुपर्छ | ग्राहकलाइ सजिलो होस् भनेर दर्ता...

कस्तो किसिमको गाडी किन्नु ठीक होला त ?

कस्तो किसिमको गाडी किन्नु ठीक होला त ?

गाडीको बनावटमा आधारित गाइड ...

किन गर्ने गाडीको बिमा?

किन गर्ने गाडीको बिमा?

भविष्यमा हुन सक्ने दुर्घटनाको बारे हामी अनविज्ञ छौं । तेस्रो पक्षको सवारी विमा गरेर यस्तो दुर्घटनाको क्षति कसरी न्यूनीकरण गर्न...

जाडो मौसममा गाडीमा आउन सक्ने समस्याहरुको समाधान

जाडो मौसममा गाडीमा आउन सक्ने समस्याहरुको समाधान

जान्नुहोस् केहि रोचक जुक्ति र ह्याकहरु जसबाट तपाइले गाडीमा आइपर्ने जाडो सम्बन्धि समस्याहरुबाट छुटकारा पाउन सक्नुहुन्छ ...

अब्बल अभिनेत्री दीपिका, निर्देशकले दिए पुरस्कार

अब्बल अभिनेत्री दीपिका, निर्देशकले दिए पुरस्कार

दीपिका पादुकोणले पाँच सय रुपैयाँ पुरस्कार पाएकी छन्। उनीद्वारा अभिनित चलचित्र ‘पद्मावत’ ले राम्रो सफलता पाएको छ। उक्त सफलताबाट खुशी...

१०७ भत्किए, तीन मात्रै बने

काठमाडौं महानगरपालिका क्षेत्रमा भूकम्पले भत्किएका १०७ सम्पदामध्ये तीन मात्रै पुनर्निर्माण सम्पन्न भएका छन् । भूकम्प गएको तीन वर्ष बित्न लाग्दा...

‘पञ्चेबाजा’ लाई ‘साढे ७’

‘पञ्चेबाजा’ लाई ‘साढे ७’

स्वेता खड्काको निर्माणमा बनेको फिल्म ‘कान्छी’ प्रदर्शन भइरहँदा शुक्रबारबाट हलमा दुई नेपाली फिल्म ‘पञ्चेबाजा’ र ‘साढे ७’ थपिएका छन् ।...

सुविनको ‘फूलबारी’ लोकार्पण

सुविनको ‘फूलबारी’ लोकार्पण

सुविन रिमाल ‘प्रशान्त’द्वारा लिखित ‘फूलबारी’ बालकविता संग्रहको लोकार्पण गरिएको छ । नुवाकोट साहित्य प्रतिष्ठानले १२ वर्षे रिमाल अध्ययन गर्दै आएको...