भ्यालेन्टाइन विशेष

आकाश अधिकारी–क्लाउडीया फाजियोः प्रेमिल र बुझ्झकी जोडी

बुधबार, ०२ फागुन २०७४, १६ : ०५ अनिल यादव


ग्ल्यामर दुनियाँमा रमाइरहेको नेपाली ठिटोको इटालियन युवतीसँग कसरी सम्बन्ध जोडियो ? कसरी प्रेम फक्रियो ? कसरी बिहे भयो ? आकाश र क्लाउडीयाको प्रेम कहानी कम रोचक छैन । 

सुटिङमा जुरेको भेट 
सन् १९९९ तिर आकाश आफ्नो दोस्रो फिल्म ‘दाग’को सुटिङमा व्यस्त थिए । फिल्ममा आकाशले जस्मिन गुरुङलाई बाल कलाकार राखेका थिए जसको अध्ययनमा क्लाउडीयाले आर्थिक सहयोग पुर्याइरहेकी थिइन् । विश्वभाषा क्याम्पस (काठमाडौं) मा नेपाली भाषा पढिरहेकी क्लाउडीया एक दिन कलंकीनजिकै ‘दाग’को सुटिङस्थलमा गएकी थिइन्, जस्मिनलाई भेट्न । त्यहीँनेर उनको भेट भयो– आकाशसँग । चिनजानको क्रममा विदेशी अनुहार भएकाले आकाशले थोरै अंग्रेजी टोन निकाल्न खोजे, ‘हेलो’ । जवाफ आयो नेपालीमा– ‘नमस्ते’ ।  क्लाउडीयाको नेपाली सुनेर पहिलो भेटमै आकाश लोभिएछन् । ‘मैले एक्सन–कट भनिरहँदा त्यतिबेला क्लाउडीयाले खुब घुरेर हेरेकी थिइन्, मैले पनि खुब ख्याल गरेको थिएँ,’ आकाशले अझै बिर्सेका छैनन् त्यो पहिलो प्रेमिल भेट । 

 फिल्म निर्माता/निर्देशक आकाश अधिकारीले इटालीकी क्लाउडीया फाजियोसँग बिहे गरेको १६ वर्ष पुगिसक्यो । धर्मले आकाश हिन्दु र क्लाउडीया क्रिस्चियन हुन् तर उनीहरुको प्रेमअघि देश, धर्म, संस्कार, संस्कृति सबै फिक्का लाग्छन् । सफल दाम्पत्यसम्बन्धी उनीहरुको एउटै सूत्र छ– इगो कम, प्रेम ज्यादा। 

पहिलो डेटिङ 
उनीहरुको पहिलो भेट जति नै प्रेमिल भए पनि त्यसपछिको केही महिनासम्म उनीहरुको भेट भएन । आकाशलाई लाग्छ, त्यसमा दुवैको ‘रिजर्भ’ स्वभाव पनि एउटा कारण हो । ‘हामी दुवै हत्तपत्त कसैसँग नभेट्ने÷नबोल्ने टाइपका परेछौं । कसैले नराम्रो पो सोचिहाल्छ कि भन्ने डर मनमा राख्थ्यौँ,’ उनले भने, ‘त्यसैले लामो समय भेट भएन । पछि फिल्मको डबिङको बेला जस्मिनलाई भेट्न क्लाउडीया आइन् । त्यहीँनेर ल्यान्डलाइन टेलिफोन नम्बर आदानप्रदान भयो । फोनमा कुराकानी हुन थाल्यो । अनि तय भयो हाम्रो पहिलो डेटिङ ।’ कहाँ र कसरी ? ‘मैले भेटेर कफी खाऊँ भन्दै उनलाई डेटको अफर गरेको थिएँ । दरबारमार्गको नाङ्लो रेस्टुराँको चाइनिज रुममा बसेका थियौं । त्यतिबेला भएको ‘सुगर एक्सिडेन्ट’ म कहिल्यै बिर्सन्नँ ।’ 

 कस्तो सुगर एक्सिडेन्ट ? आकाश खुल्दै गए, ‘कफीमा सुगर (चिनी) हाल्नै लागेको थिएँ, अत्तालिएर हातमा लागेर चम्चा सुइय उड्यो, चिनी पोखियो । उनी मुसुक्क हाँसिन् । उनको हाँसोले मलाई खुल्न सहज बनायो । प्रस्टसँग भनौं न, प्रेमको संकेत गर्यो ।’ 

आकाशले यति भनेपछि क्लाउडीया फेरि मुस्कुराइन् । अनि उनकै कुरामा सहमति जनाउँदै बोलिन्, ‘त्यतिबेला भेट भा’को अहिलेसम्म छुटेका छैनौं ।’ उनले त्यतिबेला आफूहरुबीच पारिवारिक र व्यक्तिगत गफ बढी भएको बताइन् । भेट भएको ६ महिनापछि उनीहरुको प्रेम सम्बन्ध सुरु भएको रहेछ । ‘लभ परेको दुई वर्षपछि बिहे भएको हो हाम्रो,’ क्लाउडीयाले भनिन् । उनीहरुको सन् २००२ मा बिहे भएको थियो ।

पहिलो भेटको ६ महिनापछि आकाश–क्लाउडीया नजिकिए । नजिक बनाउन आकाशको नयाँ फिल्म ‘पक्षी’ले पनि मद्दत गर्यो । कसरी ? आकाश भन्छन्, ‘उनलाई पनि पर्दा पछाडिको काममा रुचि थियो । ‘पक्षी’को स्क्रिप्टदेखि सुटिङसम्म मसँग सहकार्य गरिन् । मेरो गाउँ (नवलपरासी)तिर सुटिङ थियो । त्यहाँ मेरो फेमिलीसँग पनि उनको भेट भयो । सामीप्य बढ्दै गयो ।’ 

अफेयरमा रहेको २ वर्षपछि आकाशबाटै बिहेको प्रस्ताव भयो । ‘एकदिन मैले उनलाई ‘अब हामी बिहे गर्यौ भने के हुन्छ ?’ भनेर सोधेँ,’ आकाशले सम्झिए, ‘त्यसपछि उनी बेस्कन हाँसिन्। किन हाँसिन् भनेर मलाई कौतुहलता भयो । ’ त्यसपछि के भयो ? क्लाउडीयाले मुन्टो मात्रै हल्लाइन्, जवाफ आकाशले नै दिए, ‘घर सल्लाह गर्छु अनि गरौँला भनेर उनले टेबलबाटै प्रस्ताव स्वीकार गरिन्।’ अहिले उनीहरुको १३ वर्षकी छोरी छिन्– आरजुइशा अधिकारी ।

केले लोभ्यायो ? 
क्लाउडीयालाई त्यतिबेला आकाशको केले लोभ्यायो होला जसका कारण उनी उनलाई निःसर्त प्रेम गर्न थालिन् ? ‘दुइटा कुराले लोभ्यायो,’  क्लाउडीया सम्झिन्छन्, ‘उहाँको धैर्य गर्ने स्वभावले लोभ्याएको हो । जतिसुकै प्रेसरमा काम भइरहेका बेला पनि सुटिङ सेटमा उहाँ एकदमै धैर्य र नरम भएर मान्छेहरुसँग कुरा गर्नुहुन्थ्यो । म हेरेको हे¥यै हुन्थेँ ।’ यति भनेर एकछिन रोकिइन् उनी अनि आकाशलाई हेरेर फेरि बोलिन्, ‘तर उहाँ अहिले पहिलेजस्तो धैर्य हुनुहुन्न ।’ आकाश गलल हाँसे । ‘रिस त अहिले पनि उठ्दैन है मलाई,’ क्लाउडीयाको कुरामा असहमति जनाउन खोजे आकाशले । क्लाउडीयालाई पर्दापछाडि हुने काममा पहिल्यैदेखि रुचि रहेछ । त्यसैले आकाशको फिल्म निर्देशन गर्ने शिल्प पनि उनलाई मनपर्दो रहेछ । 

 पालो आकाशको आयो । ‘उनी मन पर्नुको मुख्य कारण चाहिँ विदेशी भएर पनि नेपाल, नेपाली भाषा र नेपाली संस्कृतिप्रति उनले देखाएको प्रेम नै हो,’ आकाशले भने, ‘कतिले मलाई सोध्थे– ‘फरेनरसँग बिहे ? मलाई भने कहिल्यै ऊ सात समुन्द्रपारिको भन्ने महसुस भएन । नेपालमै हुनेहरु नेपालीभन्दा बढी विदेशी कल्चर पछ्याइरहेको बेला उनी त मेरो कल्चर पछ्याइरहेकी थिइन् । इटालीबाट ट्रेकिङ गर्न आएकी थिइन्, नेपाल र नेपाली कल्चर मन परेर यतै पढ्न बसिन् । उनको यस्तै कुराले मलाई भुतुक्कै बनायो ।’  

आकाश–क्लाउडीयाको त्यतिबेला बढी नेपाली र अंग्रेजी भाषा मिसाएर गफ गर्थे । ‘अहिले त उनले धेरै नेपाली जानिसकिन्, बरु मैले इटालियन भाषा सिकेको छैन, छोरीले त दुवैको सिकिसकिन्,’ आकाशले सुनाए । त्यसो त क्लाउडीयाले नेपाली भाषा सिकेको कुरा त त्यतिबेलाको माहोलले पनि पुष्टि गरिसकेकै थियो । 

अन्तरदेशीय बिहे कति सहज? 
आकाशले क्लाउडीयालाई जतिबेला बिहे गरे, त्यतिबेला स्वदेशभित्रै अन्तरजातीय प्रेमको हिम्मत कमैले गर्थे । झन् उनको प्रेम त अर्कै देशकी युवतीसँग थियो, त्यो पनि अर्कै धर्म मान्ने थिइन् । बिहे गर्न कति कठिन भयो होला ? सुरुमा क्लाउडीयाले जवाफ दिइन्, ‘मलाई त त्यति गाह्रो भएको थिएन । श्रीमान्–श्रीमतीबीच प्रोब्लम त जुनसुकै देशमा पनि हुन्छ, संघर्ष त जहाँ पनि हुन्छ । मुख्य कुरा मान्छेको क्यारेक्टर (चरित्र) कस्तो छ भन्ने हो । हाम्रो खास समस्या धर्ममा हुन सक्थ्यो । म क्रिस्चियन, ऊ हिन्दु तर हामी दुवै एकअर्काको धर्मप्रति नरम रुपमा प्रस्तुत भयौँ । एकअर्काको धर्मलाई सधैँ उच्च सम्मान ग¥यौँ, दुवैको धर्मलाई मान्न मिल्नेसम्म मान्यौँ ।’

आकाशको नजरमा क्लाउडीया 

  • एकदमै राम्री छिन् । 
  • समझदार छिन । 
  • जिम्मेवार छिन् । 
  • जेलियस हुने र ठुस्स रिसाउने बानी मनपर्छ
  • एकदमै केयर गर्छिन् मेरो । 
  • झडंग रिसाउने बानी सुधारे हुन्थ्यो । 

अर्को कुरा, क्लाउडीयाको सुरुदेखि नै ससुरासँग खुब ग्रह मिल्छ रे ! सुनाउँदै थिइन्, ‘नवरपरासी जाँदा पहिलो भेटमै उहाँसँग ग्रह मिलेको थियो । सुटिङको पहिलो दिन नै बुबाले ‘तपाईं आकाशलाई हेर्नुस्, तपाईं राम्रो हुनुहुन्छ’ भनेर प्रशंसा गर्नुभएको अझै याद छ । अहिले उहाँ ८० वर्ष पूरा भइसक्नुभयो । हामीसँगै बस्नुहुन्छ । मलाई छोरीजस्तै व्यवहार गर्नुहुन्छ ।’ 

क्लाउडीयाको नजरमा आकाश 

  • नरम दिलको (सफ्ट हार्टेड) हुनुहुन्छ ।
  • एकदमै क्रिएटिभ हुनुहुन्छ ।
  • ह्यान्डसम् त भनिरहनु नपर्ला !
  • टाइममै नखाने, टाइममै नसुत्ने बानी सुधारे हुन्थ्यो ।
  • जति नै बिजी भए पनि फेमिलीलाई अलि बढी टाइम दिए हुन्थ्यो । 
  • तनाव कम लिए हुन्थ्यो ।

आकाश पनि अन्तरदेशीय बिहे गर्दा आफूले कुनै कठिन अवस्था खप्नु नपरेको बताउँछन् । ‘मलाई लाग्छ संसारमा सबैभन्दा ठूलो कुरा भनेकै मानवता हो,’ उनले भने, ‘स्वभाविक रुपमा म हिन्दु हुँ, उनी क्रिस्चियन हुन् तर पनि सबैभन्दा ठूलो कुरा मानवता हो । हामी दुवै एकअर्काको धर्मप्रति कठोर भएनौँ । अझ भन्नुपर्दा म भन्दा राम्रोसँग क्लाउडीयालाई पूजा गर्न आउँछ । तिहारमा उनी लक्ष्मीपूजा धेरै भव्य तरिकाले गर्छिन् । बिहे गर्नुअघि लक्ष्मीपूजाको दिन उनले मलाई घर बोलाएकी थिइन् । उनले जसरी लक्ष्मीलाई सजाएकी थिइन्, जुन भव्य दिपावली गरेकी थिइन्, त्यो देखेर म त चकितै भएको थिएँ । बाहिरको मान्छेले मेरो धर्म, मेरो पर्व, मेरो संस्कृति यसरी मनाएको देख्दा को चकित हुन्न र ?’ 

क्लाउडीया हाँसिन् अनि सहमति जनाउँदै बोलिन्, ‘हो, त्यतिबेला हि वाज भेरी इम्प्रेस्ड विद मी ।’ 
यो जोडी दुवैको धर्मलाई उत्तिकै सम्मान गर्छ । दुवै चर्च र मन्दिर जान्छन् । ‘हामी दुवैलाई चर्चको शान्त संगीत र मन्दिरको घन्टीको आवाज दुवै प्यारो लाग्छ,’ आकाश सुनाउँदै थिए । 

आकाशसँग बिहे गरेपछि क्लाउडीयाको मनमा खड्किएको एउटै मात्र कुरा छ– समय । यत्तिकैमा घुमघामको कुरा निस्कियो र क्लाउडीयाले एकछिन सुनाउँ कि नसुनाउँझैँ गरिन् । त्यसपछि सबै राम्रोमात्रै के भन्नु, केही त मनमा लागेर कुरा पनि भन्नुप¥यो भन्दै उनले गुनासो पोखिन्, ‘यहाँ र त्यहाँको अलिकति फरक कुरा भनेको घुमघाम हो । हाम्रो युरोपतिर विकेन्ड कल्चर अनिवार्य हुन्छ । हप्तामा दुइ दिन फेमिलीलाई टाइम जोसुकैले निकालेको हुन्छ । वर्षमा दुइचोटी होलिडे गएकै हुन्छ, नत्र माइन्ड रिफ्रेस हुँदैन भन्ने मान्यता राखिन्छ । यहाँ भने त्यस्तो छैन ।’ 

आकाशले उनको कुरामा आधा सहमति जनाएजस्तो गरे र भने, ‘त्यति साह्रो पनि होइन । भ्याएसम्म घुमेकै छाँै । तीन वर्ष भयो उनलाई अमेरिका जाउँ भनेको मान्दै मान्दिनन् । म केही काम पनि लिएर जान खोज्छु उनी बिना काम मात्रै जान चाहन्छिन् ।’

ती भ्यालेन्टाइन्स डे
प्रेमको सम्मानमा विश्वभर फेब्रुअरी १४ मा भ्यालेन्टाइन्स डे मनाइन्छ । यो दिनसँग आकाश–क्लाउडीयाको ठूलो सम्बन्ध छ अनि धेरै सम्झनाहरु छन् । उनीहरुले पहिलो भ्यालेन्टाइन्स डे काठमाडौं, दरबारमार्गको याक एन्ड यती होटलमा मनाएका थिए । जहाँ थाहै नपाई, बेन्ट डान्स कपलका रुपमा पुरस्कृत भएका थिए । कसरी ? क्लाउडीयाले सुनाइन्, ‘प्रोगाममा ढिलोगरी पुगेका थियौँ । डिस्को पार्टीमा राम्रैगरी नाचिरहेका थियौँ । एकाएक स्टेजबाट घोषणा भयो– ‘द विनर इज ड्याट कपल इन द कर्नर ।’ हामी भएको कर्नरतिर देखाएपछि हामीले पछाडि फर्केर हे¥यौँ । कोही थिएनन् । खासमा विनर त हामी नै पो रहेछौँ ! एकछिन त हाँसेको हाँसेकै भइयो । अनि प्राइज थापियो ।’

बिहे गरेको दुई वर्षपछि बैंकक गएर मनाएको भ्यालेन्टाइन्स डे पनि उनीहरु कहिल्यै बिर्सन्नन् । किन त ? ‘हामी त्यतिबेला दुई तीन वटा टापु पार गरेर एउटा एकान्त आइल्यान्ड (द्विप)मा गएर बसेका थियौँ जहाँ केही पनि पाइँदैनथ्यो,’ आकाशले सम्झिए, ‘त्यो दिन आज भ्यालेन्टाइन्स डे भन्ने थाहा पाएपछि म बिहानै उठेर क्लाउडीयालाई एक्लै छाडेर बोट चढेर अर्को आइल्यान्ड पुगेँ । मलाई नदेखेर क्लाउडीयाले ठूलो खोजिनिती गरिछन् मात्र होइन, रुवाबासी नै चलेछ । चार घण्टापछि फर्कंदा त उनी रिसाएर बमबम भइन् । इभिनिङ पार्टी सुरु भएपछि जब मैले ‘ह्याप्पी भ्यालेन्टाइन्स डे’ भन्दै गुलाबको गुच्छा झिकेर हातमा थमाइदिएँ उनी त छक्कै परिन् । उनको आँखाभरि आँसुको झझल्को अझैसम्म छ । त्यो क्षण हाम्रो जीवनकै एउटा मीठो क्षण हो किनभने म एउटा गुलाबका लागि चार घण्टा गायब भएको थिएँ ।’

‘मेरो दाहिने हात’ 
आकाश अहिले नेपाल चलचित्र निर्माता संघका अध्यक्ष छन् । नेपाल उद्योग वाणिज्य महासंघको केन्द्रीय सदस्य पनि हुन्, उनी । रेड स्टुडियो पनि चलाउँछन् । फिल्म निर्देशन÷निर्माण पनि गर्छन् । एकदमै व्यस्त हुन्छन् । उनको यो व्यस्ततामा भरपुर साथ दिएकी छन्, श्रीमती क्लाउडीयाले । आकाश यो कुरा खुलेर स्वीकार्छन् । भन्छन्, ‘म सुटमा हुँदा अफिसमा केही समस्या हुँदैन । अफिसको व्यवस्थापन पूरै हेर्ने गर्छिन् । ऊ बिना म अधुरो छु । ऊ नभएको भए म चाहेर पनि अहिलेजस्तो ‘स्पिरिट’मा काम गर्न सक्दिनँ थिएँ । मेरो दाहिने हात नै उही हो । त्यसैले म प्राउड्ली भन्छु, मेरो सफलतामा उनको ठूलो हात छ ।’

‘इगो कम गर्नुपर्छ’
आकाश–क्लाउडीयाको १६ वर्षदेखिको वैवाहिक सम्बन्धको अनुभवले उनीहरुलाई के सिकायो त ? क्लाउडीया भन्छिन्, ‘सम्बन्ध बलियो बनाउन एकअर्काको इगो कम गर्नुपर्छ, एकअर्कालाई बुझ्नुपर्छ अनि शंका फिटिक्कै गर्नुहुन्न ।’ उता आकाशलाई पनि त्यस्तै लाग्छ । भन्छन्, ‘हो, एकअर्कालाई बराबर सम्मान गर्नुपर्छ, इगो कम गर्नुपर्छ । उसको सफलता मेरो हो, मेरो सफलता उसको हो भन्ने ठान्नुपर्छ ।’

‘प्रेमिल र बुझ्झकी जोडी’ 
आकाश र क्लाउडीया आफ्नो जोडीलाई ‘लभ्ली एन्ड अन्डस्टेन्डिङ –प्रेमिल र बुझ्झकी जोडी)’ भन्न रुचाउँछन् । ‘जति नै टेन्सन भए पनि हामी एकअर्काप्रति निःसर्त प्रेम गरिरहन्छौं, साथ छोड्दैनौँ,’ आकाशले भने । उता क्लाउडीयाले पनि थपिन्, ‘हो, हामी बाहिरको कुरा धेरै सुन्दैनौ । कहिलेकाहीँ बाहिरको मान्छेले नै कुरा बिगार्दिन्छन् । त्यसैले हाम्रा कुरामा भएका मतभेद पनि दुईबीच नै सल्लाह गर्छौं, बाहिर गर्दैनौँ ।’ 





यसमा तपाईको मत

अन्य समाचार

नयाँ सवारी दर्ता गर्ने प्रक्रिया

नयाँ सवारी दर्ता गर्ने प्रक्रिया

नयाँ सवारी खरिद गरिसके पछि सो सवारी सडकमा चलाउनु अगाडी नै दर्ता गरिसकेको हुनुपर्छ | ग्राहकलाइ सजिलो होस् भनेर दर्ता...

कस्तो किसिमको गाडी किन्नु ठीक होला त ?

कस्तो किसिमको गाडी किन्नु ठीक होला त ?

गाडीको बनावटमा आधारित गाइड ...

किन गर्ने गाडीको बिमा?

किन गर्ने गाडीको बिमा?

भविष्यमा हुन सक्ने दुर्घटनाको बारे हामी अनविज्ञ छौं । तेस्रो पक्षको सवारी विमा गरेर यस्तो दुर्घटनाको क्षति कसरी न्यूनीकरण गर्न...

जाडो मौसममा गाडीमा आउन सक्ने समस्याहरुको समाधान

जाडो मौसममा गाडीमा आउन सक्ने समस्याहरुको समाधान

जान्नुहोस् केहि रोचक जुक्ति र ह्याकहरु जसबाट तपाइले गाडीमा आइपर्ने जाडो सम्बन्धि समस्याहरुबाट छुटकारा पाउन सक्नुहुन्छ ...

अनुप र वर्षाको ‘जय शम्भु’

अनुप र वर्षाको ‘जय शम्भु’

निर्माता तथा निर्देशक अशोक शर्माले निर्देशन गरिरहेको फिल्म ‘जय भोले’को झापामा धमाधम छायांकन भइरहँदा उस्तै लाग्ने नाममा ‘जय शम्भु’को घोषणा...

सरोजका ‘यादहरु’ सार्वजनिक

गीतकार सुदन डोटेल तथा संगीतकार सरोज प्याकुरेलको एकल संगीत रहेको गीति संग्रह ‘यादहरू’ काठमाडौंमा लोकार्पण गरिएको छ। ...

दुई स्रष्टालाई भोजपुरको सम्मान

बेलायतमा रहेका भोजपुरे स्रष्टा–सर्जकहरूद्वारा एक दशकअघि स्थापित भोजपुर प्रतिभा प्रतिष्ठान, बेलायतले वरिष्ठ स्रष्टा गणेश रसिक र युवा स्रष्टा तथा समालोचक...

‘भुइयाँ’लाई ‘पहिचान पुरस्कार’

‘भुइयाँ’लाई ‘पहिचान पुरस्कार’

लेखक, अनुवादक तथा सञ्चारकर्मी यज्ञशको पछिल्लो कृति ‘भुइयाँ’ले ‘पहिचान पुरस्कार २०७४’ प्राप्त गरेको छ । राजधानीमा आइतबार नेपाल प्रज्ञा प्रतिष्ठानका...