बुटवल – बुटवलमा जारी मोफसलकै सर्वाधिक पुरस्कार राशिको तेस्रो मदन भण्डारी अन्तर्राष्ट्रिय आमन्त्रण गोल्डकप फुटबल प्रतियोगितामा आइतबार (आज) झापा ११ र सशस्त्र प्रहरी बलको एपिएफबीच प्रतिस्पर्धा हुँदैछ।

खेल दिउँसो २ बजेपछि बुटबलको रामनगरमा रहेको मानव ज्ञान माध्यमिक विद्यालयको खेल मैदानमा सुरु हुनेछ। शुक्रबारदेखि बुटवलमा सुरु भएको प्रतियोगितामा हिजो शनिबार भने कुनै पनि खेल भएन।

यसअघि शुक्रबार भएको उद्घाटन खेलमा मदन भण्डारी स्पोर्टस् एकेडेमी काठमाडौंले सुदूरपश्चिम ११ लाई ५–१ को फराकिलो गोल अन्तरले हराउदै प्रतियोगितामा विजयी सुरुवात गरेको थियो।

गोल्डकपको विजेताले १५ लाख ट्रफी,मेडल र उपविजेताले ७ लाख ५० हजारका साथै ट्रफी,मेडल प्राप्त गर्नेछन्। त्यस्तै सेमिफाइनलमा पुग्ने २ टोलीलाई पनि नगद १–१ लाख पुरस्कारको व्यवस्था गरिएको आयोजकले जनाएको छ।

यही चैत १९ गतेसम्म सन्चालन हुने प्रतियोगितामा १० टिम नेपाल आर्मी, नेपाल पुलिस, सशस्त्र प्रहरी, थ्री स्टार, मनाङ मर्स्याङ्दी, झापा ११, मदन भण्डारी स्पोर्टस एकेडेमी काठमाडौं,सुनौलो संगम युवा क्लब बुटवल, सुदूरपश्चिम ११ र मलेसियाको हिमालय फुटबल क्लबको सहभागीता रहेको छ।

प्रकाशित: ११ चैत्र २०७४ ०४:४९ आइतबार