काठमाडौं– काठमाडौंको भृकुटीमण्डपमा जारी ‘सुबिसु क्यान इन्फोटेक २०१७ इन एसोसिएसन विथ सामसुङ’ मेलामा शनिबार व्यवसायीहरुले नगद छुट, निःशुल्क जडान, फ्री सर्भिस, उपहार लगायत विभिन्न अफर ल्याएका छन् । यस्ता अफरले मेला अवलोकनकर्तालाई थप सहुलियत मिलेको छ ।

प्रदर्शनीको पहिलो दिन ३४ हजार एक सय ५४ जनाले अवलोकन गरेका थिए भने दोस्रो दिन ३६ हजार १ सय १८ र शनिबार तेस्रो दिन ६९ हजार ४ सय ७८ जनाले अवलोकन गरेको आयोजकले जानकारी दिए ।
इन्फोटेकको प्रायोजक सुबिसु केबलनेटले प्रदर्शनीमा ल्याएको इन्टरनेट र क्लियर टिभीको जम्बो अफरमा अवलोकनकर्ताको आकर्षण देखिएको छ । सुबिसुले मात्र ७ हजार ९ सय ९९ मा यो जम्बो अफर ल्याएको छ ।
त्यसैगरी नेपाली उपभोक्ताका लागि लक्षित गरी ल्याइएका सामसुङका स्मार्टफोनमा पनि अवलोकनकर्ताको भीड लागेको छ । सामसुङले इन्फोटेकमा ६ जिबी ¥याम भएको सी ९ प्रो र ग्यालेक्सी अन सेमेन प्रो र जे २ एस मोबाइलको पनि विशेष छुटसहित प्रदर्शनी गरिरहेको छ ।
यस्तै, हुवावे, ओप्पो, मेइजु, लेनोभो, माइक्रोम्याक्स, वानप्लस, एमआई, ब्लाकभ्यूलगायतका स्टलमा शनिबार अवलोकनकर्ताको भीड थियो । त्यस्तै इन्टरनेट सेवाप्रदायक कम्पनी तथा वेबसर्फरका साथमा नेपाल टेलिकमको फोरजी अफरमा पनि अवलोकनकर्ताको विशेष आकर्षण देखियो ।
मेलामा सोनीले नेपालमै पहिलोपटक सार्वजनिक गरेको पावर बैंक टिभीमा पनि अवलोकनकर्ताको आकर्षण बढेको छ । यसमा सोनीले १५ प्रतिशत छुट उपलब्ध गराएको छ । त्यस्तै संसारकै सबैभन्दा सानो स्टिक कम्प्युटर मेला अवधिभर मात्रै ११ हजार ५ सय रुपैयाँमा उपलब्ध गराइएको पनि आयोजकले जनाएका छन् ।
मेलाकै अवसरमा नेपालका लागि नयाँ मोबाइल वालेट खल्ती पनि सार्वजनिक गरिएको छ । त्यस्तै फोटोकपी, प्रिन्टर, प्रोजेक्टर, स्क्यानर, एटेन्डेन्स मेसिन, राउटर, सिसिटिभी लगायत सामग्री विशेष अफरसहित उपलब्ध छन् ।
प्रदर्शनीमा हार्डवेयर सेल्स तथा मेन्टिनेन्स्, पावर सोलुसन्स्, मोबाइल एसेसोरिज, डिलर र डिस्ट्रिब्युटर्स, इन्टरनेट सेवा प्रदायक, टेलिकम्युनिकेसन्स्, आइसिटी कलेज तथा ट्रेनिङ इन्स्टिच्युट्स, सफ्टवेयर सोलुसन्स्, पेमेन्ट सोलुसन्स् लगायत गरी १ सय ५८ कम्पनीका २ सय २२ स्टल रहेका छन् ।
रेडक्रसको रक्तदान कार्यक्रम

इन्फोटेकस्थलमै रेडक्रस सितापाइला उपशाखाको आयोजनामा रक्तदान कार्यक्रम पनि आयोजना भएको छ । शनिबारसम्म ९८ पिन्ट रगत संकलन भएको रेडक्रसले जनाएको छ । १८ गतेसम्म सञ्चालन हुने इन्फोटेक अवलोकनका लागि सरकारी विद्यालयबाट अग्रिम रुपमा लिखित अनुरोधसहितको नामावलीका आधारमा निःशुल्क प्रवेशको व्यवस्था मिलाइएको बताइएको छ ।

सोमबार बिजनेस डे

क्यान इन्फोटेकमा आज आइतबारलाई बिजनेस डे घोषणा गरिएको छ । आजलाई प्रदर्शनीस्थल प्रवेश शुल्क १ सय रुपैयाँ तोकिएको छ । उक्त दिन विशेषगरी बिजनेस हाउसेजहरुले आफ्नो व्यापार प्रवद्र्धनको लागि विभिन्न डिलर र भेन्डरसँग प्रत्यक्षरुपमा बिजनेस डिल गर्न सक्ने आयोजकको भनाइ छ । यो दिनको टिकट मूल्य सबैका लागि  १ सय रुपैयाँ तोकिएको छ । मेला माघ १८ गतेसम्म चल्ने आयोजकले जानकारी दिएको छ ।

प्रकाशित: १६ माघ २०७३ ०५:१३ आइतबार