पर्यटन प्रवद्र्धनका लागि होमस्टे बनाउने बढे

बुधबार, २७ बैशाख २०७४, ११ : ३६ अर्जुन तामाङ


काठमाडौं – सरकारले सन् २०२० मा २० लाख पर्यटक भित्र्याउने कार्ययोजना तयारी गरिरहेको अवस्थामा स्थानीय तहमा निजी र सामुदायिक होमस्टे बनाउनेको संख्या बढेको छ । पदयात्रामा आएका स्वदेशी तथा विदेशी पर्यटकलाई लक्षित गरेर ग्रामीण तहमा होमस्टे बनाउन थालेका हुन् । 

विभिन्न पर्यटकीय क्षेत्रको प्रवद्र्धन अभियान र पदमार्गको खोजी अभियानलाई प्रोत्साहन गर्ने नीति अनुरुप सरकारले ग्रामीण तहमा होमस्टेको अवधारणा ल्याएपछि २०६७ भदौ ७ गते ‘कपन होम स्टे भिलेज’ सामुदायिक होमस्टे सञ्चालनका लागि नेपाल पर्यटन बोर्डले अनुमति दिएको थियो । 

पर्यटन विभागको २०७३ चैत मसान्तसम्मको तथ्यांकमा दुई सय ४५ वटा होमस्टे दर्ता भएका छन् । यसमा ६७ वटा निजी होमस्टे दर्ता भएर सञ्चालनमा आएको पर्यटन विभागले जनाएको छ । विभागको तथ्यांक शाखाका प्रमुख रमा भण्डारीले दुई सय ४५ होमस्टेमा दुई सय ९७ वटा घर रहेको बताइन् । उनका अनुसार उक्त घरमा पाँच सय ६६ कोठा र नौ सय ७८ वटा बेड रहेका छन्। 

यस्तै, जनकपुर पर्यटन कार्यालयमा एक होमस्टे दर्ता भएको छ । विरगञ्ज पर्यटन कार्यालयमा तीन, भैरहवामा २४, पोखरामा ६५, कोहलपुरमा नौ र झापामा १७ वटा होमस्टे दर्ता भएर सञ्चालनमा आएको विभागले जनाएको छ । पछिल्लो समय ग्रामीण तहमा होमस्टे बनाउनेको संख्या बढ्दै गएको भण्डारीले बताइन् ।  

पदयात्राका लागि पदमार्ग रुटहरु धेरै भएकाले यस क्षेत्रमा बसोबास व्यवस्थापनका लागि सहज हुने आशाका साथ होमस्टेको अवधारणा सरकारले ल्याएको हो । ग्रामीण तहमा होमस्टे सञ्चालनले स्थानीय स्रोत साधनको परिचालन, स्थानीय कृषिको प्रवद्र्धनसँगै अर्गानिक खानाले स्थानीयको आर्थिक सुधार हुने छ । होमस्टे सञ्चालन गर्दा स्थानीय कला, संस्कृति र जीवन पद्धतिको समेत संरक्षण हुने होमस्टे सञ्चालक कमल तामाङको भनाइ छ । 

ट्रेकिङ एजेन्सिज् अफ नेपालका (टान) अध्यक्ष चन्द्रप्रसाद रिजालले गाउँगाउँमा होमस्टे बनाएपछि पदयात्रामा जाने स्वदेशी तथा विदेशीलाई सहज भएको बताए । होमस्टे सञ्चालनमा आएपछि पर्यटकलाई पाल टाँगेर बस्नु नपरे पनि स्थानीय संस्कृति र अर्गानिक खाना भने मुस्किलले पाउँने गरेको रिजालको भनाइ छ । ‘गाउँका होमस्टेमा स्थानीय कृषि उत्पादन, अर्गानिक खाना मुस्किलले पाउँछ । सहरकै पेयपदार्थ र चाउँचाउँ पाउँने हो भने होमस्टेको विशेषता हराउँछ ।’

दुर्गम तथा स्थानीय क्षेत्रमा सञ्चालन रहेको होमस्टेमा हरेक प्रकारको खानादेखि बसोबास गर्ने रुममा समेत स्थानीय झल्को आउनु पर्ने रिजालको भनाइ छ । गाउँले जीवनसँग गाँसिएको होमस्टे भए आन्तरिक पर्यटकलाई मात्र नभएर विदेशी पर्यटकलाई समेत नयाँ उत्सुकता हुने उनको तर्क छ। 

विभिन्न पर्यटकीय पदमार्गमा सञ्चालन भएको होमस्टेले स्थानीय रुपमा रोजगार, अर्थ विकास र समृद्धि गाउँसम्म पुग्छ । अर्गानिक पर्यटन, जिरो कार्बन पर्यटन र जीवित संस्कृतिको थलोका रूपमा ग्रामीण पर्यटनको विकासमा होमस्टेले फड्को मार्ने टानका अध्यक्ष रिजालको भनाइ छ ।






यसमा तपाईको मत

अन्य समाचार

घरमा मोर्डन लाइटिंग

घरमा मोर्डन लाइटिंग

सही लाइटिंगको प्रयोगबाट घरलाई मोडर्न र नयाँ रुप दिन सकिन्छ । लाइटिंग मिलेको घर हेर्दामा साह्रै राम्रा हुन्छन । ...

वाशिंग मेसिन खरिद गाइड

वाशिंग मेसिन खरिद गाइड

वाशिंग मेसिन खरिद गर्दा ख्याल गर्नुपर्ने थुप्रै कुराहरु हुन्छन् | यस गाइड मार्फत तपाईले आफ्नो परिवारको लागि कस्तो फ्रिज खरिद...

घरेलु उपकरण सम्बन्धि सुरक्षा टिप्स

घरेलु उपकरण सम्बन्धि सुरक्षा टिप्स

घरेलु उपकरण सुरक्षित शैलीमा प्रयोग नगर्नाले ठूला ठूला दुर्घटना हुन सक्छ। यी सुझावहरु पालाना गर्नाले यस्तो दुर्घटना न्यून हुन्छ ।

फ्रिजको हेरचाह कसरी गर्ने?

फ्रिजको हेरचाह कसरी गर्ने?

फ्रिजको औसत आयु १३ वर्ष मानिन्छ | तर यी कुराहरु ध्यानमा राखेर फ्रिजलाई कथित औसत आयुभन्दा धेरै समयसम्म प्रयोग गर्न...

मिस नेपाल इन्टरनेशनल २०१८को पहिलो भिडियो सार्वजनिक

मिस नेपाल इन्टरनेशनल २०१८को पहिलो भिडियो सार्वजनिक

मिस नेपाल इन्टरनेशनल २०१८ रोनाली अमात्य अभिनित म्युजिक भिडियो ‘सुन’ सार्वजनिक भएको छ।  र्‍यापर निर्णय श्रेष्ठको एल्बम ‘एक नेपाल’ समावेश...

राष्ट्रिय ललितकला प्रदर्शनी सुरु

राष्ट्रिय ललितकला प्रदर्शनी सुरु

राजधानीमा बुधबारबाट ‘आठौं राष्ट्रिय ललितकला प्रदर्शनी’ सुरु भएको छ । नेपाल ललितकला प्रज्ञा प्रतिष्ठानको आयोजनामा राजधानीको बबरमहलस्थित नेपाल कला परिषद्मा...

‘लिलिबिली’लाई चार करोड

‘लिलिबिली’लाई चार करोड

नायक प्रदीप खड्का र नवनायिका जसिता गुरुङ अभिनित प्रेमकथाको फिल्म ‘लिलि बिली’को पाँच दिने कलेक्सन सार्वजनिक भएको छ । फिल्म...

प्रेमलाई लाइफटाइम अचिभमेन्ट

प्रेमलाई लाइफटाइम अचिभमेन्ट

लिम्बु भाषा र संस्कृतिमा बनेका फिल्म तथा संगीतमा पुर्‍याएको योगदानको कदर गर्दै संगीतकार प्रेम पन्धाकलाई ‘एफएलएफ लाइफटाइम अचिभमेन्ट अवार्ड’ प्रदान...

Fixed Ad