गालीगलौज होेइन, अजेन्डा बताऊ

आइतबार, २५ भदौ २०७४, ०८ : ४६ सम्पादकीय


प्रमुख राजनीतिक दलले प्रदेश नम्बर २ को स्थानीय तह निर्वाचनलाई जेजसरी आ–आफ्नो प्रतिष्ठासँग जोड्दै प्रचारमा लागेका छन्, त्यसक्रममा एकअर्काप्रति गालीगलौजको तहमा उत्रिने काम गरिरहेका छन् जुन राजनीतिक दल र तिनका नेताका लागि सुहाउने विषय होइन । अझ उदेकलाग्दो विषय त के छ भने विपक्षीमाथि प्रहार गर्ने कार्य स्थानीय नेता तथा कार्यकर्ताभन्दा पनि शीर्ष नेतृत्वबाटै बढी भएको छ । राजनीतिक दलको चुनावी प्रचार हेर्दा लाग्छ, उनीहरूसँग अजेन्डाको खडेरी छ । त्यसैले त चुनाव प्रचारप्रसारका क्रममा राजनीतिक दलका शीर्ष नेताले आफ्नो पार्टीको अजेन्डा, नीति र कार्यक्रम बताउँदैनन् बरु प्रतिस्पर्धी दलहरूप्रति कटाक्षमात्रै गर्छन् । उनीहरुले बुझ्नुपर्ने तथ्य के हो भने प्रतिस्पर्धी दल र तिनका नेतालाई गाली गरेर मात्रै चुनाव जितिँदैन र राजनीतिलाई मर्यादित बनाउन पनि सकिँदैन । उल्टै नेताहरुको एकअर्काप्रतिको कटाक्षले राजनीतिप्रति सर्वसाधारणमा वितृष्णा उत्पन्न हुन सक्छ । त्यसैले राजनीतिक दलका शीर्ष नेताले चुनावी अभियानलाई सम्बोधन गर्ने क्रममा यस पक्षमा ध्यान पु¥याउन आवश्यक छ ।

मधेस केन्द्रित राजनीति गर्दै आएका राष्ट्रिय जनता पार्टी नेपाल, संघीय समाजवादी फोरम र नेपाल लोकतान्त्रिक फोरमजस्ता दलका सबै शीर्ष नेता यति बेला प्रदेश नम्बर २ को चुनावी अभियानमा सक्रिय छन् । उनीहरुमात्र होइन, प्रमुख दलका शीर्ष नेतृत्व पनि प्रदेश नम्बर २ को निर्वाचनमा सक्रिय छन् । नेपाली कांग्रेसका सभापति एवं प्रधानमन्त्री शेरबहादुर देउवा, वरिष्ठ नेता रामचन्द्र पौडेल, महामन्त्री शशांक कोइराला, कोषाध्यक्ष सीतादेवी यादवसमेत अन्य वरिष्ठ नेता पनि चुनावी प्रचारमा जाने भएका छन् । यता एमालेका वरिष्ठ नेता माधवकुमार नेपाल, उपाध्यक्ष वामदेव गौतम र महासचिव ईश्वर पोखरेल प्रदेश नम्बर २ को स्थानीय तहमा खटिएका छन् भने अध्यक्ष केपी शर्मा ओली पनि चुनावी सभालाई सम्बोधन गर्न मधेस झर्ने तयारीमा छन् । नेकपा माओवादी केन्द्रका अध्यक्ष पुष्पकमल दाहाल, उपाध्यक्ष नारायणकाजी श्रेष्ठलगायतका नेता मधेसमा खटिइरहेका छन् । एक हिसाबले भन्ने हो भने यतिखेर सबै राजनीतिक दलदेखि सिंगो राज्यसंयन्त्र, नागरिक समाज सबैको ध्यान प्रदेश नम्बर २ को स्थानीय तह निर्वाचनमा केन्द्रित छ । यसरी निर्वाचनप्रति चासो बढ्नु आफैंमा सकारात्मक हो । जसरी निर्वाचनप्रति प्रमुख दलको चासो देखिन्छ, त्यसैगरी चुनावी प्रचारलाई आफ्नो अजेन्डा जनतासमक्ष लैजाने अवसरका रुपमा दलहरुले उपयोग गरेको भने देखिँदैन ।

मधेसकेन्द्रित राजनीतिक दलको निरन्तरको आग्रह र दबाबका कारण सरकारले संसद्मा संविधान संशोधनको प्रस्ताव दर्ता गराए पनि त्यो अस्वीकृत भएलगत्तै तराई–मधेसमा स्थानीय निर्वाचन हुन लागेको हो । सुरुमा निर्वाचन बहिष्कार गर्दै आएको राजपा अहिले तेस्रो चरणको निर्वाचनमा सहभागी हुन राजी भएको हो । यस हिसाबले निर्वाचनमा संविधान संशोधनको विषय प्रमुख मुद्दाका रुपमा उठ्नु अस्वाभाविक होइन । तर संविधान संशोधनको मुद्दालाई नै केन्द्रमा राख्ने बहानामा राजनीतिक दल एकअर्काप्रति गालीगलौजमा उत्रिनुलाई भने कुनै हिसाबले पनि जायज मान्न सकिँदैन । फेरि राजनीतिक  दलले संविधान संशोधनको विषयमा पनि आफ्नो पार्टीको धारणा जनतालाई बुझाउने प्रयास गरेका छैनन्, प्रतिस्पर्धी दललाई गालीगलौज गर्ने काममात्रै गरेका छन् । शनिबार कलैयाको चुनावी सभालाई सम्बोधन गर्ने क्रममा नेकपा माओवादी केन्द्रका अध्यक्ष पुष्पकमल दाहालले अधिकांश समय एमालेलाई गाली गर्न खर्चिनु एउटा उदाहरणमात्रै हो । माओवादी केन्द्रमात्र होइन, नेपाली कांग्रेस, एमालेदेखि मधेस केन्द्रित राजनीतिक दल सबैले चुनावी अभियानलाई गालीगलौजमा परिणत गर्नु चिन्ताको विषय हो ।

मधेसमा परम्परागत शक्तिका रुपमा दाबी गर्दै आएको नेपाली कांग्रेस आफूलाई त्यही अवस्थामा फर्काउने दाउमा छ भने एमाले आफ्नो दलमाथि लाग्दै आएको मधेसविरोधी आरोपको जबाफ निर्वाचनमार्फत नै दिने अभियानमा जुटेको देखिन्छ । माओवादी केन्द्र पनि पहिलो संविधानसभामा पाएको ‘पोजिसन’ फर्काउने रणनीतिमा लागेको देखिन्छ । २०६२÷६३ को आन्दोलनपछि उदाएका मधेस केन्द्रित दलहरू त्यहाँको प्रतिनिधित्व गर्ने राजनीतिक शक्ति आफूहरु भएको जुन दाबी गर्दै आएका थिए, त्यसलाई प्रमाणित गर्नुपर्ने चुनौतीपूर्ण अवस्थामा छन् । त्यसमाथि मधेस केन्द्रित राजनीति गर्दै आएका राष्ट्रिय जनता पार्टी नेपाल, संघीय समाजवादी फोरम र  नेपाल लोकतान्त्रिक फोरमबीच आफ्नै खालको दलीय प्रतिस्पर्धा छ । यस हिसाबले पनि राजनीतिक दलबीच प्रदेश नम्बर २ को निर्वाचनमा बढी प्रतिस्पर्धा देखिएको हो । लोकतन्त्रमा राजनीतिक दलबीच प्रतिस्पर्धा हुनु सकारात्मक हो तर त्यस्तो प्रतिस्पर्धा स्वस्थ, शिष्ट र मर्यादित हुनुपर्छ । प्रदेश नम्बर २ को चुनावी सभालाई सम्बोधन गर्ने क्रममा होस् वा अन्य चुनावी प्रचारकै क्रममा किन नहोस्, राजनीतिक दल र तिनका नेताकार्यकर्ताको ध्यान यसतर्फ केन्द्रित होस् ।






यसमा तपाईको मत

तपाईंको रुचि अनुसारको समाचारको लागि खाता खोल्नुहोस् ।

अन्य समाचार

घरमा मोर्डन लाइटिंग

घरमा मोर्डन लाइटिंग

सही लाइटिंगको प्रयोगबाट घरलाई मोडर्न र नयाँ रुप दिन सकिन्छ । लाइटिंग मिलेको घर हेर्दामा साह्रै राम्रा हुन्छन । ...

वाशिंग मेसिन खरिद गाइड

वाशिंग मेसिन खरिद गाइड

वाशिंग मेसिन खरिद गर्दा ख्याल गर्नुपर्ने थुप्रै कुराहरु हुन्छन् | यस गाइड मार्फत तपाईले आफ्नो परिवारको लागि कस्तो फ्रिज खरिद...

घरेलु उपकरण सम्बन्धि सुरक्षा टिप्स

घरेलु उपकरण सम्बन्धि सुरक्षा टिप्स

घरेलु उपकरण सुरक्षित शैलीमा प्रयोग नगर्नाले ठूला ठूला दुर्घटना हुन सक्छ। यी सुझावहरु पालाना गर्नाले यस्तो दुर्घटना न्यून हुन्छ ।

फ्रिजको हेरचाह कसरी गर्ने?

फ्रिजको हेरचाह कसरी गर्ने?

फ्रिजको औसत आयु १३ वर्ष मानिन्छ | तर यी कुराहरु ध्यानमा राखेर फ्रिजलाई कथित औसत आयुभन्दा धेरै समयसम्म प्रयोग गर्न...

राष्ट्रकवि घिमिरेलाई थप उपचारका लागि भारत लगियो

राष्ट्रकवि घिमिरेलाई थप उपचारका लागि भारत लगियो

राष्ट्रकवि माधवप्रसाद घिमिरेलाई आज थप उपचारका लागि भारतको नयाँ दिल्ली लगिएको छ। ...

रणवीर र आलिया प्रेममा

रणवीर र आलिया प्रेममा

बलिउडमा पछिल्लो समय रणवीर कपुर र आलिया भट्टको डेटिङको चर्चा छ। दुबैका परिवारबीच भइरहेको सन्देश आदान प्रदानले आलिया कपुर खान्दानको...

राजेश हमालले भेटे राष्ट्रकवि

राजेश हमालले भेटे राष्ट्रकवि

महानायक राजेश हमालले राष्ट्रकवि माधव प्रसाद घिमिरेसँग भेट गरेका छन्। हमालले आन्तरिक रक्तश्राव भई ग्राण्डी अस्पतालमा उपचाररत राष्ट्रकवि घिमिरेलाई मंगलबार धापासीस्थित...

नायिका निता ढुंगानासहित ४ सम्मानित

नायिका निता ढुंगानासहित ४ सम्मानित

नेपाली फिल्मकी नायिका निता ढुंगाना चलचित्र पत्रकारिता दिवसको अवसरमा गृहनगर हेटौंडामा सम्मानित भएकी छिन्। चलचित्र पत्रकार संघ मकवानपुरले उनीसहित २...