ओखलढुंगा : साख जोगाउने टक्कर

मङ्गलबार, २८ कार्तिक २०७४, १२ : ४१ दमन राई


खोटाङ- आसन्न प्रदेशसभा र प्रतिनिधिसभा निर्वाचनका लागि ओखलढुंगामा कांग्रेस, एमाले–माओवादी गठबन्धन, संघीय समाजवादी, नेकपा माले, नयाँ शक्ति, राष्ट्रिय जनमोर्चा, मंगोल नेसनल अर्गनाइजेसनलगायतका ९ पार्टीका उम्मेदवार चुनावी मैदानमा छन् । विभिन्न पार्टीका दर्जनौं उम्मेदवार चुनावी मैदानमा भए पनि लोकतान्त्रिक गठबन्धन र वाम गठबन्धनबीचका उम्मेदवारबीचमै कडा प्रतिस्पर्धा हुने विश्लेषण छ । त्यसमा पनि राष्ट्रिय राजनीतिमा कहलिएका र जनताले आशा गरेका कांग्रेस नेता रामहरि खतिवडा र एमाले नेता यज्ञराज सुनुवारको प्रतिस्पर्धाले चर्चा पाएको छ ।

२०७० सालमा भएको संविधानसभाको दोस्रो निर्वाचनमा विजयी भएपछि राष्ट्रिय राजनीतिमा उदाएका प्रतिनिधिसभा सदस्यका दुवै उम्मेदवारले आसन्न निर्वाचनलाई साख र प्रतिष्ठाको विषय बनाएका छन् । उनीहरू त्यही प्रतिष्ठा जोगाउने रणनीति बनाएर चुनावी घरदैलोमा व्यस्त छन् ।
एक नगरपालिका र ७ गाउँपालिका रहेको ओखलढुंगामा प्रदेशसभा सदस्यका लागि कांग्रेसबाट प्रदेशसभा (क) मा मित्रसेन दाहाल र प्रदेशसभा (क) मा प्रदीप सुनुवारले प्रतिस्पर्धा गर्दैछन् । यस्तै, वाम गठबन्धनबाट प्रदेशसभा (क) मा एमालेका अम्बिरबहादुर गुरुङ र प्रदेशसभा (ख) मा माओवादी केन्द्रका मोहन खड्का चुनावी मैदानमा छन् ।

बलबहादुर राईले ओखलढुंगामा २००३ सालदेखि बनाएको कांग्रेसको गढ संविधानसभाको पहिलो निर्वाचनसम्म कायम रह्यो । २०६४ सालको पहिलो संविधानसभा निर्वाचनमा दुईवटै निर्वाचन क्षेत्रमा जित हासिल गरेर तत्कालीन नेकपा माओवादीले कांग्रेसको गढ भड्कायो । तर, २०७० सालको निर्वाचनमा आएपछि माओवादी दुवै क्षेत्रमा पराजित भयो । क्षेत्र नम्बर १ बाट सुनुवार र क्षेत्र नम्बर २ बाट खतिवडा विजयी भए । सुनुवारको विजय ओखलढुंगाको इतिहासमा एमालेको पहिलो जित थियो । अहिले सुनुवारमाथि त्यही साख बचाउने चुनौती छ । खतिवडामाथि २०७० सालमा भएको कांग्रेसको ‘कमब्याक’ को इतिहासलाई निरन्तरता दिनुपर्ने चुनौती छ । तर, दुवै उम्मेदवार एउटै पदमा लडेका कारण ओखलढुंगाको चुनावी प्रतिस्पर्धा रोचक बनेको हो । निर्वाचनमा आशालाग्दा र उस्ता–उस्तै उचाइ भएका नेता आमनेसामने भएका कारण सबैको ध्यान तानिरहेको छ ।
आसन्न निर्वाचनमा ओखलढुंगाका १ लाख २ हजार २५० मतदाताले मताधिकार उपयोग गर्दैछन् ।
 

अंकको अन्तर
२०७० सालको संविधानसभाको दोस्रो निर्वाचनमा कांग्रेसले ओखलढुंगाको दुवै निर्वाचन क्षेत्रबाट कुल २३ हजार ८४७, एमालेले २१ हजार ४५३ र तत्कालीन नेकपा माओवादीले ६ हजार ५९९ मत पाएको थियो । कांग्रेसका क्षेत्र नम्बर १ बाट बालकृष्ण दाहालले ९ हजार ९४३ र क्षेत्र नम्बर २ बाट खतिवडाले १३ हजार ९०४ मत ल्याएका थिए । यस्तै, एमालेका क्षेत्र नम्बर १ बाट सुनुवारले १२ हजार ९४३ र क्षेत्र नम्बर २ बाट नानीबाबु बुढाथोकीले ८ हजार ५१० मत तथा माओवादीका क्षेत्र नम्बर १ बाट केशव राईले २ हजार ९६३ र क्षेत्र नम्बर २ का पेशल खतिवडाले ३ हजार ६३६ मत ल्याएका थिए । उसबेला एमाले र माओवादी केन्द्रले पाएको मत जोड्दा २८ हजार ५२ हुन पुग्छ ।

तर, स्थानीय तहको निर्वाचनलाई आधार मान्ने हो भने कांग्रेसको पकड अन्यको तुलनामा बलियो देखिएको छ । ८ स्थानीय तहमध्ये कांग्रेसले ४, एमालेले ३ र माओवादी केन्द्रले १ तहमा विजयी भएको थियो । एमाले र माओवादी केन्द्र एक ठाउँमा आएपछि मात्र स्थानीय तहमा लोकतान्त्रिक र वाम गठबन्धनको जितको स्थिति बराबरको अवस्थामा पुग्छ ।

सिद्धिचरण नगरपालिका, मोलुङ गाउँपालिका र लिखु गाउँपालिकामा एमाले, चिसंखुगढी गाउँपालिकामा माओवादी केन्द्र तथा चम्पादेवी गाउँपालिका, खिजीदेम्बा गाउँपालिका, मानेभन्ज्याङ गाउँपालिका र सुनकोसी गाउँपालिकामा कांग्रेसले जितेको थियो । स्थानीय तहको निर्वाचनमा जिल्लाका ७५ वडामध्ये कांग्रेसले ३८ वडा, एमालेले २६ र माओवादी केन्द्रले ११ वडामा बाजी मारेको थियो । यस हिसाबले पनि ओखलढुंगामा लोकतान्त्रिक र वाम गठबन्धनको कडा टक्कर हुने देखिएको हो ।

प्रतिनिधिसभा सदस्यमा खतिवडा र सनुवारबीच कडा प्रतिस्पर्धा हुने सम्बद्ध नेताहरु बताउँछन् । उनीहरुको हारजित असन्तुष्टि व्यवस्थापन, अतिरिक्त मेहनत, कार्यकर्ता परिचालन, जनताले गर्ने विश्वासलगायतमा निर्भर रहनेछ ।
 

कांग्रेसको बागी चुनौती
ओखलढुंगामा आधिकारिक उम्मेदवारविरुद्ध परेको बागी उम्मेदवारी पनि कांग्रेसका लागि चुनौतीको विषय छ । प्रदेशसभा (क) का प्रदीप सुनुवारलाई प्रदेशसभा (ख) बाट टिकट दिइएको भन्दै तरुण दलका जिल्ला सभापति ज्ञानेन्द्र रुम्दालीले बागी उम्मेदवारी दिएपछि कांग्रेसलाई असर पर्ने आकलन गरिएको हो । फरक भूगोलका नेतालाई उम्मेदवार बनाएको विरोधमा २०६४ सालमा बागी उम्मेदवारी खेपेको ओखलढुंगा कांग्रेसले प्रदेशसभा र प्रतिनिधिसभा निर्वाचनमा पनि बागी उम्मेदवारी बेहोर्नुपरेको छ । २०६४ सालको निर्वाचनमा रुम्दालीले नै आधिकारिक उम्मेदवार बालाराज कार्कीविरुद्ध उम्मेदवारी दिएका थिए ।

टिकट वितरणमा असन्तुष्टि जनाउँदै महासमिति सदस्य कुमार लुइँटेल र बाला अधिकारी, महाधिवेशन प्रतिनिधि बालकृष्ण दाहाल, रामजी बाँस्तोला, लीलाबल्लभ दाहाल, कमल तामाङलगायतले पार्टीको जिम्मेवारीबाट हटेको बताएपछि रुम्दालीको बागी उम्मेदवारी परेको हो । कांग्रेसभित्रको यही कहल व्यवस्थापन नगर्दाको असर प्रतिनिधिसभाका उम्मेदवार रामहरि खतिवडालाई समेत पर्ने वाम गठनबन्धको बुझाइ छ ।
 

वाम गठबन्धनलाई पनि सहज छैन
आसन्न निर्वाचनमा ओखलढुंगामा एमाले र माओवादी केन्द्रको गठबन्धनलाई पनि सहज छैन । विगतमा पटकपटक विवादको घटना हुँदा दुई पार्टीबीचमा तिक्ततापूर्ण सम्बन्ध छ । विगतका कुरालाई लिएर एमाले–माओवादी तल्ला तहका कार्यकर्तालाई मिलाउन वाम गठबन्धनलाई सकस देखिन्छ । माओवादी कार्यकर्तालाई एमालेको चुनाव चिह्नमा भोट हाल्न तत्पर बनाउने र एमालेका कार्यकर्तालाई माओवादीको चुनाव चिह्नमा भोट हाल्न तयार तयार पार्नु वाम गठनबन्धनको मुख्य चुनौती हो ।






यसमा तपाईको मत

अन्य समाचार

घरमा मोर्डन लाइटिंग

घरमा मोर्डन लाइटिंग

सही लाइटिंगको प्रयोगबाट घरलाई मोडर्न र नयाँ रुप दिन सकिन्छ । लाइटिंग मिलेको घर हेर्दामा साह्रै राम्रा हुन्छन । ...

वाशिंग मेसिन खरिद गाइड

वाशिंग मेसिन खरिद गाइड

वाशिंग मेसिन खरिद गर्दा ख्याल गर्नुपर्ने थुप्रै कुराहरु हुन्छन् | यस गाइड मार्फत तपाईले आफ्नो परिवारको लागि कस्तो फ्रिज खरिद...

घरेलु उपकरण सम्बन्धि सुरक्षा टिप्स

घरेलु उपकरण सम्बन्धि सुरक्षा टिप्स

घरेलु उपकरण सुरक्षित शैलीमा प्रयोग नगर्नाले ठूला ठूला दुर्घटना हुन सक्छ। यी सुझावहरु पालाना गर्नाले यस्तो दुर्घटना न्यून हुन्छ ।

फ्रिजको हेरचाह कसरी गर्ने?

फ्रिजको हेरचाह कसरी गर्ने?

फ्रिजको औसत आयु १३ वर्ष मानिन्छ | तर यी कुराहरु ध्यानमा राखेर फ्रिजलाई कथित औसत आयुभन्दा धेरै समयसम्म प्रयोग गर्न...

‘शत्रु गते’ र ‘लिलीबिली’को भिडन्त

‘शत्रु गते’ र ‘लिलीबिली’को भिडन्त

निर्देशक प्रदिप भट्टराई निर्देशित फिल्म ‘शत्रु गते’ एनएफडीसी पुरस्कारको सर्वाधिक ८ विधामा मनोनयन भएको छ। ...

मनीषाले सार्वजनिक गरिन्‘मिसिगन ब्लुज’

मनीषाले सार्वजनिक गरिन्‘मिसिगन ब्लुज’

अभिनेत्री मनीषा कोइरालाले लेखक अरुण शर्माको उपन्यास ‘मिसिगन ब्लुज’को लोकार्पण गरेकी छिन्। ...

ज्योति कविता वाचन

कविता वाचनको श्रृंखला ‘ज्योति कविचा वाचन’मा आधा दर्जन कविले कविता सुनाएका छन्। ...

दीपिकालाई रिप्लेस गर्दै आलिया

दीपिकालाई रिप्लेस गर्दै आलिया

छोटो समयमै धाँशु अभिनयको बलले निर्देशकको रोजाइमा पर्दै आएकी अािलया अब सञ्जयलिला भन्सालीको नजरमा परेकी छिन्। ...