संघर्षपूर्ण खेलमा नेपाल विजयी

शुक्रबार, २६ माघ २०७४, ०६ : ४४ नागरिक


काठमाडौं– स्पिनरद्वय वसन्त रेग्मी र सन्दीप लामिछानेको उत्कृष्ट प्रदर्शनमा नेपालले बिहीबार आइसिसी विश्व क्रिकेट लिग डिभिजन–२ मा घरेलु टोली नामिबियामाथि १ विकेटको विजय हासिल गरेको छ ।
हारको संघारमा रहेको नेपाललाई वसन्तको धैर्यपूर्ण ब्याटिङले जोगाउँदा नामिबियाका ब्याट्सम्यानलाई रोक्न सन्दीपले ४ विकेट लिएका थिए । वसन्तले पनि १ विकेट आफ्नो नाममा लेखाएका थिए ।

विन्डहोकस्थित अफिज पार्कमा नेपालका कप्तान पारस खड्काले टस जितेर नामिबियालाई ब्याटिङको निम्तो दिएपछि घरेलु टोलीले ३४.२ ओभरमा सबै विकेट गुमाएर १ सय ३८ रनको योगफल खडा गरेको थियो । जितका लागि नेपालले १ सय ३९ रनको लक्ष्य पाएको थियो । नेपालले ४३ ओभरमा ८ विकेट गुमाएर १ सय ११ बनाउँदा वर्षाले खेल अवरुद्ध बन्यो । झन्डै ४० मिनेट अवरुद्ध बनेपछि खेल पुनः सुचारु भएको थियो । क्रिजमा सोमपाल कामी र वसन्त रेग्मी थिए ।

सोमपाल १३ रन बनाएर आउट हुँदा नेपाललाई जितका लागि थप १८ रन चाहिएको थियो । अन्तिम ब्याट्सम्यानका रुपमा आएका सन्दीपले वसन्तलाई साथ दिएपछि नेपालले ४ बल बाँकी रहँदा लक्ष्य पूरा गरेको थियो । २४ बलमा २ चौका र १ छक्का प्रहार गरेका वसन्तले अविजित २४ रन बनाए । अन्तिम ओभरमा नेपाललाई जितका लागि ७ रन आवश्यक थियो । पहिलो बलमा २ रन लिएका वसन्तले दोस्रो बलमा चौका प्रहार गरेपछि नेपालको जित सुनिश्चित बनेको थियो ।

नामिबियामाथि नेपालको यो लगातार चौथो जित हो । यसअघि नेपालले कीर्तिपुरमा भएको आइसिसी विश्व क्रिकेट लिग च्याम्पियनसिपमा ३ र ५ विकेटले जितेको थियो भने २ वर्षअघि नामिबियामै भएको डिभिजन–२ मा ३ विकेटले विजयी भएको थियो ।अनुभवी खेलाडी कप्तान पारस खड्का (१९) र ज्ञानेन्द्र मल्ल (१५) ले लामो इनिङ खेल्न नसकेको दिन युवा खेलाडीले पनि आशातीत प्रदर्शन गर्न सकेनन् । ओपनर दिलीप नाथ र मध्यक्रममा मौका पाएका आरिफ शेख शून्यमा पवेलियन फर्किंदा दीपेन्द्रसिंह ऐरी पनि ६ रन बनाएर आउट भए ।

२३.६ ओभरमा ५६ रन जोड्दा ६ विकेट गुमाएको नेपाललाई शरद र रोहितकुमार पौडेले सातौं विकेटका लागि ३७ रनको साझेदारी गर्दै जितको आशा कायम राखेका थिए । टान्जेनी लुङ्गामेनीले शरदलाई विलियम्समार्फत क्याच गरे लगत्तै रोहितकुमार पनि बर्नान्ड स्कोल्जको बलमा एलबिडब्लु आउट भएपछि नेपालको सम्भावना लगभग कमजोर बनेको थियो । तथापि वसन्त रेग्मीको धैर्यपूर्ण ब्याटिङले नेपाललाई जिततर्फ डोर्यायो । शरदले २९ रन बनाउँदा रोहितले १७ रनको योगदान गरे ।

त्यसअघि बलिङमा युवा स्पिनर सन्दीप लामिछानेले उत्कृष्ट प्रदर्शन गरेपछि टस हारेर ब्याटिङका लागि निम्त्याइएको नामिबियाले ३४.२ ओभरमा सबै विकेट गुमाएर १ सय ३८ रन बनाएको थियो ।सन्दीप लामिछानेले ८.२ ओभरमा २ मेडन राख्दै १८ रन दिएर ४ विकेट लिँदा मध्यम गतिका बलर सोमपालले ७ ओभरमा १ मेडनसहित ३५ रन दिएर ३ विकेट लिए ।

सोमपालले ओपनरद्वयलाई पवेलियनको बाटो देखाएका थिए । पहिलो ओभरको पाँचौं बलमा ओपनर लुइस भान डे वेसथुइजेन (१) लाई बोल्ड गरेका सोमपालले आफ्नो तेस्रो स्पेलमा अर्का ओपनर स्टेफन वार्ड (१८) लाई विकेटकिपर दिलीप नाथमार्फत क्याच गरेका थिए । त्यसपछि जेन ग्रिन र क्रिग विलियम्सले घरेलु टोलीको इनिङ सम्हालेका थिए । ६४ रनको स्थितिमा ग्रिन घाइते भएपछि विलियम्सलाई जिन पिइरे कोट्जेले साथ दिएका थिए । नामिबियाले ११.४ ओभरमा ७५ रन बनाउँदा कोट्जे (९)लाई वसन्त रेग्मीले आरिफ शेखमार्फत क्याच गरे । त्यसपछि थप ६ रन जोड्दा नामिबियाले ३ विकेट गुमायो ।

इन्डियन प्रिमियर लिग (आइपिएल)को दिल्ली डियरडेभिल्ससँग अनुबन्धित भएका सन्दीप लामिछानेले विलयम्स (४१) र सरेल बर्गर (०) एलबिडब्लु आउट गर्दा गेरहार्ड इरसमसलाई कप्तान पारस खड्काले बोल्ड गरेका थिए । ८१ रन जोड्दा ६ विकेट गुमाएको नामिबियालाई जान फ्रेलिङ्क (२२) र योहानेस जोनाथन स्मित (१८) ले १ सय १६ रनसम्म डोर्याएका थिए । फ्रेलिङ्कलाई शरद भेषावकरले आउट गरे भने स्मितलाई सन्दीपले पारसमार्फत क्याच गरे ।

बिहीबारै क्यानडाले ओमानलाई ८ विकेटले पराजित गर्यो । विन्डहोकस्थित युनाइटेड क्रिकेट क्लबको मैदानमा टस हारेर ब्याटिङका लागि निम्त्याइएको ओमानले २७.४ ओभरमा सबै विकेट गुमाएर १ सय ६ रन बनाएको थियो । नीतिश कुमारले अर्धशतक बनाएपछि क्यानडाले १ सय ७ रनको लक्ष्य २ विकेट गुमाएर १५.४ ओभरमा पूरा गरेको थियो । नीतिश कुमारले अविजित ५३ रन बनाउँदा क्यानडाका लागि रुविन्दु गुनसेकराले ४६ रन जोडे ।

युनाइटेड अरब इमिरेट्स (युएई) ले केन्यालाई २ सय १८ रनले पराजित गरेको छ । वान्डेरर क्रिकेट मैदानमा टस हारेर ब्याटिङ गरेको युएईले निर्धारित ५० ओभरमा ८ विकेट गुमाएर ३ सय ९ रन बनाएको थियो । ३ सय १० रनको लक्ष्य पछ्याएको केन्याले ३२.४ ओभरमा ९१ रन बनाउँदा सबै विकेट गुमायो । युएईका रोहन मुस्तफा र अस्फाक अहमदले समान ७३ रन बनाउँदा रामिज शहजादले ६३ रन बनाए ।अन्तिम ओभरमा नेपाललाई जितका लागि ७ रन आवश्यक थियो । पहिलो बलमा २ रन लिएका वसन्तले दोस्रो बलमा चौका प्रहार गरेपछि नेपालको जित सुनिश्चित बनेको थियो ।

 






यसमा तपाईको मत

तपाईंको रुचि अनुसारको समाचारको लागि खाता खोल्नुहोस् ।

अन्य समाचार

घरमा मोर्डन लाइटिंग

घरमा मोर्डन लाइटिंग

सही लाइटिंगको प्रयोगबाट घरलाई मोडर्न र नयाँ रुप दिन सकिन्छ । लाइटिंग मिलेको घर हेर्दामा साह्रै राम्रा हुन्छन । ...

वाशिंग मेसिन खरिद गाइड

वाशिंग मेसिन खरिद गाइड

वाशिंग मेसिन खरिद गर्दा ख्याल गर्नुपर्ने थुप्रै कुराहरु हुन्छन् | यस गाइड मार्फत तपाईले आफ्नो परिवारको लागि कस्तो फ्रिज खरिद...

घरेलु उपकरण सम्बन्धि सुरक्षा टिप्स

घरेलु उपकरण सम्बन्धि सुरक्षा टिप्स

घरेलु उपकरण सुरक्षित शैलीमा प्रयोग नगर्नाले ठूला ठूला दुर्घटना हुन सक्छ। यी सुझावहरु पालाना गर्नाले यस्तो दुर्घटना न्यून हुन्छ ।

फ्रिजको हेरचाह कसरी गर्ने?

फ्रिजको हेरचाह कसरी गर्ने?

फ्रिजको औसत आयु १३ वर्ष मानिन्छ | तर यी कुराहरु ध्यानमा राखेर फ्रिजलाई कथित औसत आयुभन्दा धेरै समयसम्म प्रयोग गर्न...

‘मंगलम्’लाई पाँच अवार्ड

‘मंगलम्’लाई पाँच अवार्ड

डिजिटल मोडलमा बनेका फिल्मलाई प्रोत्साहित गर्न राजधानीमा बिहीबार आयोजना गरिएको १० औं संस्करणको ‘डि सिने अवार्ड २०७५’ फिल्म ‘मंगलम्’ले प्रतिस्पर्धामा...

प्रहरी र अपराधीबीचकोे ‘चक्कर’

प्रहरी र अपराधीबीचकोे ‘चक्कर’

अपराधको विषयबस्तु समेटेर तयार पारिएको फिल्म ‘चक्कर’को ट्रेलर र फस्टलुक सार्वजनिक भएको छ। राजधानीमा बिहीबार फिल्म युनिटले पत्रकारमाझ फस्टलुक र...

एकै स्टेजमा तीन विजेता

एकै स्टेजमा तीन विजेता

एउटै स्टेजमा एकसाथ तीन विजेता छानिने भएका छन्। ग्ल्याम वल्र्ड इन्टरटेनमेन्टले आगामी असार १ गते राजधानीमा आयोजना गर्न लागेको ‘मिस...

भ्यान गगलाई सृष्टिको सम्मान

भ्यान गगलाई सृष्टिको सम्मान

नेदरल्यान्डमा जन्मिएका महान् चित्रकार भिन्सेन्ट भ्यान गगलाई समर्पण गर्दै फिल्म ‘रोमियो एन्ड मुना’ले गीत सार्वजनिक गरेको छ। फिल्मले भ्यान गगका...