बडाहरूबाटै बिग्रेको देश

शुक्रबार, २६ माघ २०७४, ०९ : २० प्रजापति तिमिल्सिना


नयाँ संविधान २०७२ कार्यान्वयनको अन्तिम खुड्किलो प्रतिनिधि र प्रदेशसभाको आम निर्वाचन सम्पन्न भयो । नेपाली जनताले आमरूपमा सहभागिता जनाएर अनुमोदन गरिदिए । अब धेरै समस्याको निकास कसरी निस्किन्छ, विकास र समृद्धिले कसरी बाटो समाउँछ, के दलहरू सुध्रेलान्, के अब संक्रमण सकियो, यी र यस्ता प्रश्न यहाँ सबको अनुहारमा छन् । 

जीतमा घमण्ड र दम्भ नछाड्ने चरित्र यो अवस्थामा आइपुग्दा पनि पुरानो लुगा फालेझैँ फाल्न सकिरहेका छैनन् । जसरी भए पनि सत्तामा बसिरहनु पर्छ भन्ने मानसिकताको ऐँजेरु जनताले अझै चिरफार गर्न सकिरहेका छैनन् । यो आम निर्वाचन अगाडि राजनीतिका महापण्डितहरूले गरेको नतिजाको आँकलन र बडे बडे शक्तिकेन्द्रहरूले गरेको नतिजा ल्याउने कोसिसलाई जनताले धेरै पछाडि छाडिदिएका छन् । निर्वाचनको मुखमा आएर एकाएक दुई ठूला वाम दलले गठजोड गर्नु, निर्वाचन परिणाममा राम्रो सुविधाजन्य बहुमत ल्याउनुलाई कतिपयले अनौठो मानेका छन् ।

सबैभन्दा ठूलो पार्टी नेपाली कांग्रेसलाई धकेलेर भिरको डिलमा राखिदिए । जनताले गरेको यो निर्णयलाई कसले गलत भन्ने दुस्साहस गर्ने ? तर समानुपातिकतर्फको मत हेर्दा कांग्रेसका मतदाता कतै हराएका रहेनछन् । खालि मन नपरेका नेताहरूलाई हराएका मात्र रहेछन् । अरू नेता पनि थिए होलान्, जनताले नरुचाएका । 

स्वतन्त्रताको कहानी बोकेको लामै समय भइसक्यो, देशले । साधनस्रोतमा सम्पन्न छ, देश । दुर्भाग्य, संसारका अति विपन्न देशहरूको लाइनमा अगाडि उभिएको छ, देश । स्वतन्त्रताको अगुवाइ गरेको छ । राष्ट्रियताको पथमा लडिरहेको हुँ । समानताका लागि लडेको हुँ भन्छन्, तीन ठूला दल । तर देशको मुहारमा, जनताको जीवनमा कुनै तात्विक फरक परेको छैन । फरक पारेको छ भने केवल रेमिट्यान्सले । फरक प¥यो होला, पार्टीका ठूलाठूला नेताहरूको जीवनशैलीमा । उनीहरूका आफन्त अनि आसेपासेहरूको जीवनशैलीमा । गरिबीको रेखामुनि बाँचेकाहरूको जीवनमा कुनै परिवर्तन आएको छैन । जनताले कसलाई विश्वास गरून् ! पालैपालो पार्टीहरू सरकारमा बसेर जनतालाई अँध्यारो बेचेका हुन् सबैले । आफैँलाई भोट दिएर जिताउने जनतालाई अँध्यारो बेच्न संसारका कुनै पार्टी र सरकारले गर्दैनन् होला ।

सरदार भीमबहादुर पाँडेको भनाइलाई सही मान्ने हो भने २००७ सालमा तत्कालीन भारतीय राजदूतले एक जिप पैसा बाँडेर प्रजातन्त्र ल्याइदिएका हुन् । त्यसपछि पनि दलहरूले आन्दोलन गर्दा आन्दोलन भनेको परिवर्तन भन्थे । क्रान्तिमा सहभागी दलहरूले पालैपालो राज्य सञ्चालन गरे । तर गति उल्टो छ । देशलाई विखण्डन पार्न, उपनिवेश बनाउन, परमुखी बनाउन, नेपाल र नेपालीको इतिहास मेट्न विदेशमा दीक्षित कतिपय विद्वान्हरू पनि लागिपरेको भन्ने चर्चा पनि छ । कतिपय पर्दा पछाडि होलान्, कति त सबैको अगाडि छन् । लोभको लतमा फसेका त्यो लाइनमा बसेका ती शिक्षित दरिद्रहरू नै देश विकासको मुख्य बाधक हुन् भन्दा फरक नपर्ला । आफैँले बनाएको संविधानबाट शासित हुने लामो समयदेखिको जनताको चाहनाअनुरूपको संविधान धेरैपछि मात्र पाए । जनताले नै बनाएको भए तापनि केही विरोधका स्वरहरू गुञ्जिए । गुञ्जिनु कुनै अस्वाभाविक थिएन । शतप्रतिशतले समर्थन गरेको संविधान संसारका कुनै देशको पनि छैन । यो त गतिशील दस्तावेज हो । ती विरोधका स्वरहरूलाई बहाना बनाएर महाभूकम्पबाट क्षतविक्षत देश र जनताको आलो घाउमाथि नाकाबन्दीको नुनचुक लगाइयो । त्यो सरासर अन्तर्राष्ट्रिय कानुन र प्रचलन विपरीत थियोे । त्यो नाकाबन्दीबाट राष्ट्रले बेहारेको क्षति पचास वर्षमा पनि पूरा गर्न सक्तैनौँ । सिमानामा दैनिकजसो आँठो ताछिएको चोट, अन्तर्राष्ट्रिय कानुन विपरीत निर्माण गरिएका संरचनाले ल्याएको डुबानको पीडा, सीमामा हुने दैनिकजसो लुटपाट, ज्यादती र स्थुल सूक्ष्म हस्तक्षेपहरू दाँत किट्दै खपिरहेका थिए नेपालीले । त्यसमाथि नाकाबन्दीको पीडा थपिँदा धैर्यको बाँध फुटेछ । पानी पिएर भए पनि प्रतिकार गर्छाैं सरकार खुट्टा नकमाऊ भनेका लेखले सामाजिक सञ्जाल भरिएको थियोे । आफूले चुनेर पठाएका प्रतिनिधिले जनताको भावना नबुझिदिनुलाई जनताले मन पराएनन् । राष्ट्र पीडामा जलिरहँदा विरोधको एक शब्द पनि ननिकाल्नु, उल्टो त्यसैको समर्थन ?  जनताले निगरानी गरिरहेकै रहेछन् । मतदानमा हराइदिए । हारेर पनि आफ्नो गल्ती स्वीकार गरेको स्वर सुनिएको छैन । उल्टै मतदातालाई दोष दिइरहेका छन् ।

प्रभुको चाहानामा मन्त्री बन्दा उसकै अनुकूल मात्र हुनुपर्छ । सधैँ अनुकूल बन्न सम्भव हँुदैन । देश र जनताको चाहनालाई आत्मसात् गर्न सके जनताले सधैँ विजयी भवःको आशीर्वाद दिइरहनेछन् । नेपाली जनताले जीवित स्वाभिमान बोकेका रहेछन् । कुनै कुनै क्षेत्रका जनताबाहेक सबै नेपालीमा जीवन रहेछ । त्यो स्वाभिमान अमर रहोस् । देश बनाउन नेताहरूले केही गर्न होइन, केही नगर्न जरुरी छ।






यसमा तपाईको मत

अन्य समाचार

घरमा मोर्डन लाइटिंग

घरमा मोर्डन लाइटिंग

सही लाइटिंगको प्रयोगबाट घरलाई मोडर्न र नयाँ रुप दिन सकिन्छ । लाइटिंग मिलेको घर हेर्दामा साह्रै राम्रा हुन्छन । ...

वाशिंग मेसिन खरिद गाइड

वाशिंग मेसिन खरिद गाइड

वाशिंग मेसिन खरिद गर्दा ख्याल गर्नुपर्ने थुप्रै कुराहरु हुन्छन् | यस गाइड मार्फत तपाईले आफ्नो परिवारको लागि कस्तो फ्रिज खरिद...

घरेलु उपकरण सम्बन्धि सुरक्षा टिप्स

घरेलु उपकरण सम्बन्धि सुरक्षा टिप्स

घरेलु उपकरण सुरक्षित शैलीमा प्रयोग नगर्नाले ठूला ठूला दुर्घटना हुन सक्छ। यी सुझावहरु पालाना गर्नाले यस्तो दुर्घटना न्यून हुन्छ ।

फ्रिजको हेरचाह कसरी गर्ने?

फ्रिजको हेरचाह कसरी गर्ने?

फ्रिजको औसत आयु १३ वर्ष मानिन्छ | तर यी कुराहरु ध्यानमा राखेर फ्रिजलाई कथित औसत आयुभन्दा धेरै समयसम्म प्रयोग गर्न...

‘मंगलम्’लाई पाँच अवार्ड

‘मंगलम्’लाई पाँच अवार्ड

डिजिटल मोडलमा बनेका फिल्मलाई प्रोत्साहित गर्न राजधानीमा बिहीबार आयोजना गरिएको १० औं संस्करणको ‘डि सिने अवार्ड २०७५’ फिल्म ‘मंगलम्’ले प्रतिस्पर्धामा...

प्रहरी र अपराधीबीचकोे ‘चक्कर’

प्रहरी र अपराधीबीचकोे ‘चक्कर’

अपराधको विषयबस्तु समेटेर तयार पारिएको फिल्म ‘चक्कर’को ट्रेलर र फस्टलुक सार्वजनिक भएको छ। राजधानीमा बिहीबार फिल्म युनिटले पत्रकारमाझ फस्टलुक र...

एकै स्टेजमा तीन विजेता

एकै स्टेजमा तीन विजेता

एउटै स्टेजमा एकसाथ तीन विजेता छानिने भएका छन्। ग्ल्याम वल्र्ड इन्टरटेनमेन्टले आगामी असार १ गते राजधानीमा आयोजना गर्न लागेको ‘मिस...

भ्यान गगलाई सृष्टिको सम्मान

भ्यान गगलाई सृष्टिको सम्मान

नेदरल्यान्डमा जन्मिएका महान् चित्रकार भिन्सेन्ट भ्यान गगलाई समर्पण गर्दै फिल्म ‘रोमियो एन्ड मुना’ले गीत सार्वजनिक गरेको छ। फिल्मले भ्यान गगका...