पाँच अर्बको रिसोर्ट भदौ ३० बाट सञ्चालन हुने

बिहिबार, १५ भदौ २०७४, ०९ : ४९ सुशील भट्टराई  | @sushbhattarai


काठमाडौं- मुलुकको पर्यटन उद्योगले विस्तारै गति लिइरहेका बेला ५ अर्ब रुपैयाँबराबरको विदेशी लगानीमा रुपन्देही तिलोत्तमा नगरपालिकामा पाँचतारे स्तरको एक रिसोर्ट सञ्चालनमा आउन लागेको छ । 

अस्ट्रेलियास्थित बहुराष्ट्रिय कम्पनी सिल्भर हेरिटेज ग्रुपको ५ अर्ब रुपैयाँ लगानीमा निर्माण भएको रिसोर्ट भदौ ३० बाट ‘सफ्ट ओपनिङ’ हुँदै छ । रिसोर्टको नाम ‘टाइगर प्यालेस रिसोर्ट’ राखिएको छ । पहिलो चरणमा १ सय कोठा सञ्चालनमा आउने छ भने दोस्रो चरण (आगामी कात्तिक दोस्रो सातादेखि मंसिर दोस्रो साता) मा थप ३ सय कोठा पाहुनाका लागि तयार हुनेछन् । यसका सबै कोठा ‘डिलक्स’ हुनेछन् ।

‘विनाशकारी भूकम्पपछि पर्यटन उद्योगले ठूलो क्षति बेहो¥यो तर विस्तारै यसले गति लिँदैछ । मुलुकको अर्थतन्त्रमा पर्यटन उद्योगको योगदान थप उच्च बनाउनुपर्छ भन्ने उद्देश्यले रिसोर्ट सञ्चालनमा ल्याउन लागेका हौं,’ उक्त ग्रुपको नेपालस्थित आधिकारिक कम्पनी सिल्भर हेरिटेज इन्भेस्टमेन्ट प्रालिका कार्यकारी अध्यक्ष राजेन्द्र बजगाईंले बुधबार नागरिकसँग भने, ‘आतिथ्य सत्कार उद्योगमा भिन्नै पहिचान दिने यो रिसोर्टबाट हामी धेरै हौसिएका छौं ।’
बजगाईंका अनुसार सकेसम्म स्थानीय र त्यसमा पनि अनुभव नभएकालाई प्राथमिकता दिएर रिसोर्टमा रोजगारी दिइएको छ । सबैलाई तालिम दिलाएर दक्ष बनाइएको छ । रिसोर्टको म्यानेजर तहमा ५० जना विदेशीले काम गर्नेछन् भने बाँकी सबै नेपाली र त्यसमा पनि स्थानीय हुनेछन् ।

उनका अनुसार रिसोर्टमा न्यूनतम १ हजार ५ सयदेखि १ हजार ८ सयजनाले प्रत्यक्ष रोजगारी पाउनेछन् । यसमध्ये ९५ प्रतिशत जनशक्ति स्थानीय नै हुनेछन् ।    रिसोर्ट भैरहवाबाट बुटवलतर्फ जाँदा करिब ८ किलोमिटरको दुरीमा रहेको छ । तिलोत्तमा नगरपालिकाको कटिहवामा निर्माण भएको रिसोर्टले १५ बिघा क्षेत्रफल ओगटेको छ । रिसोर्ट भवनले मात्र दुई बिघा क्षेत्रफल ओगट्छ । पहिलो चरणमा १ सय कोठा पूर्णरूपमा तयार भएका छन् । 

रिसोर्टमा ४ सय कोठाबाहेक दुईवटा ‘भिल्ला’ पनि निर्माण गरिएका छन् । प्रत्येक भिल्लामा ३ कोठा, भान्छादेखि सौना, ज्याकुजीलगायत सबै सुविधा उपलब्ध हुनेछन् । रिसोर्टको डिजाइनअनुसार २० वटा कोठा र पौडी पोखरी (स्विमिङ पुल) एकआपसमा जोडिएका छन् । पाहुनाले कोठाबाट सिधै स्विमिङ पुलमा ‘डाइभ’ हान्न सक्छन् । 

‘पाँचतारे होटलमा हुने सबै सुविधा हाम्रो रिसोर्टमा उपलब्ध हुनेछन्,’ बजगाईंले भने, ‘पहिलो चरणमा ५० कोठा बुक भएका छन् । यसबाट पनि हामी थप उत्साही छौं । बुद्ध जन्मस्थल लुम्बिनी र त्यस क्षेत्रमात्र नभई मुलुककै पर्यटन उद्योगमा उत्कृष्ट हुने विश्वास छ ।’

रिसोर्टमा क्यासिनो र कन्भेन्सन सेन्टर पनि हुनेछन् । क्यासिनो भने दोस्रो चरणदेखि सञ्चालनमा आउने छ । रिसोर्टले बढी पैसा खर्च गर्ने गुणस्तरीय पर्यटक लक्ष्य गरेको छ । प्रतिरात प्रतिकोठा २ सय अमेरिकी डलरमा बिक्री गर्ने योजना रिसोर्ट व्यवस्थापनको छ । यो मूल्य १० प्रतिशत सेवा शुल्क र १३ प्रतिशत मूल्य अभिवृद्धि कर (भ्याट) बाहेक हो । रिसोर्टको पूर्णरूपमा तयार भएपछि कोठाको मूल्य अझ यकिन हुने बजगाईंले बताए ।

‘हामीले गत वर्षबाटै रिसोर्ट सञ्चालनमा ल्याउने गरी काम गरिरहेका थियौं,’ उनले भने, ‘तर, भूकम्प र लगत्तै भारतको अघोषित नाकाबन्दीका कारण निर्माण कार्य सुस्त हुन पुग्यो र त्यसमाथि हामीले रिसोर्टको डिजाइन पनि परिवर्तन गरेपछि झन् ढिला हुन पुग्यो ।’

रिसोर्टले गर्ने कूल आम्दानीको दुई प्रतिशत संस्थागत सामाजिक उत्तरदायित्वअन्तर्गत बाघ संरक्षणका लागि खर्च गर्ने उद्देश्य लिएको छ । ‘हाम्रो रिसोर्टले वार्षिक जति कमाउँछ त्यसको दुई प्रतिशत हिस्सा संरक्षण सूचीमा रहेको जंगली जनावर बाघको संरक्षणमा खर्च गर्छौं,’ उनले भने, ‘त्यही भएर रिसोर्टको नाम टाइगर प्यालेस राखेका हौं ।’   

रिसोर्टसँगै रहेको सामुदायिक वनसँग सहकार्य गरी केही सामाजिक काम गर्ने योजना पनि रिसोर्टले बनाएको छ । रिसोर्टमा स्पा, टेनिस कोर्ट, चिल्ड्रेन पार्क, वाटर फन पार्कलगायत विभिन्न आकर्षण रहनेछन् ।

बजगाईंका अनुसार रिसोर्ट सिल्भर हेरिटेज चेनअन्तर्गत सञ्चालन हुनेछ । यो चेनले हाल लाओस, फिलिपिन्स, भियतनाम, कम्बोडिया, गुआम आइल्यान्डलगायत देशमा ३३ वटा रिसोर्ट सञ्चालन गरिरहेको छ । रिसोर्ट निर्माणको काम अमेरिकाको हार्वर्ड बिजनेस स्कुलका स्कलर ह्यु होल्म्सले हेरेका थिए । 

‘यस किसिमको रिसोर्ट सञ्चालनमा आएपछि नेपालको पर्यटन उद्योगमा नयाँ विशेषता थपिने छ भने अन्तर्राष्ट्रिय पर्यटन बजारमा पनि छुट्टै सकारात्मक सन्देश जाने छ,’ उनले भने, ‘विदेशी कम्पनीको वृहत लगानीमा निर्माण हुने र उनीहरूकै व्यवस्थापनमा सञ्चालन हुने भएका कारण नेपालमा थप विदेशी लगानी आकर्षित गर्न यसबाट पनि उल्लेख्य मद्दत पुग्ने विश्वास छ ।’

सिल्भर हेरिटेज ग्रुपले यो रिसोर्टसहित राजधानीको लाजिम्पाटस्थित पाँचतारे होटल सांग्रिला परिसरमा क्यासिनो सांग्रिला सञ्चालन गरिरहेको छ । बजगाईंका अनुसार ग्रुपको सञ्चालक समितिले नेपालमा पहिलो चरणमा १० अर्ब रुपैयाँ लगानी गर्ने निर्णय गरिसकेको छ । यसमा क्यासिनो सांग्रिला, भैरहवामा टाइगर प्यालेस रिसोर्ट, विभिन्न ठाउँमा पाँचतारे होटल, जलविद्युत आयोजनासम्म छन् । लगानी वृद्धि गर्दै ३० अर्बसम्म पु¥याउने ग्रुपको लक्ष्य छ । सिल्भर हेरिटेज ग्रुप अस्ट्रेलियाको सिड्नी स्टक एक्सचेन्जमा सूचीकृत कम्पनी हो । 






यसमा तपाईको मत

तपाईंको रुचि अनुसारको समाचारको लागि खाता खोल्नुहोस् ।

अन्य समाचार

घरमा मोर्डन लाइटिंग

घरमा मोर्डन लाइटिंग

सही लाइटिंगको प्रयोगबाट घरलाई मोडर्न र नयाँ रुप दिन सकिन्छ । लाइटिंग मिलेको घर हेर्दामा साह्रै राम्रा हुन्छन । ...

वाशिंग मेसिन खरिद गाइड

वाशिंग मेसिन खरिद गाइड

वाशिंग मेसिन खरिद गर्दा ख्याल गर्नुपर्ने थुप्रै कुराहरु हुन्छन् | यस गाइड मार्फत तपाईले आफ्नो परिवारको लागि कस्तो फ्रिज खरिद...

घरेलु उपकरण सम्बन्धि सुरक्षा टिप्स

घरेलु उपकरण सम्बन्धि सुरक्षा टिप्स

घरेलु उपकरण सुरक्षित शैलीमा प्रयोग नगर्नाले ठूला ठूला दुर्घटना हुन सक्छ। यी सुझावहरु पालाना गर्नाले यस्तो दुर्घटना न्यून हुन्छ ।

फ्रिजको हेरचाह कसरी गर्ने?

फ्रिजको हेरचाह कसरी गर्ने?

फ्रिजको औसत आयु १३ वर्ष मानिन्छ | तर यी कुराहरु ध्यानमा राखेर फ्रिजलाई कथित औसत आयुभन्दा धेरै समयसम्म प्रयोग गर्न...

जापानी फिल्म कान्समा उत्कृष्ट

जापानी फिल्म कान्समा उत्कृष्ट

गरिबीको चेपटामा जीवनयापन गर्दै आएको एक परिवारको कथा समेटिएको जापानी फिल्म ‘सपलिफ्टर्स’ले कान्सको ७१ औं संस्करणमा उत्कृष्ट फिल्मले पाउने ‘पाम...

लोक गायन प्रतियोगितामा पर्शुराम पहिलो

लोक गायन प्रतियोगितामा पर्शुराम पहिलो

खोटाङ सदरमुकाम दिक्तेलमा आयोजित खुला लोकगीत गायन प्रतियोगीतामा पर्शुराम गजमेर प्रथम भएका छन् । राष्ट्रिय लोक तथा दोहोरी गीत प्रतिष्ठानको...

ज्योतिमा कवितावाचन

ज्योति साहित्य प्रतिष्ठानको १ सय ४१ औं कविता वाचन श्रृंखला राजधानीमा सम्पन्न भएको छ । डा. रामदयाल राकेशको प्रमुख आतिथ्यतामा...

वैवाहिक समारोहमा किन रोए ह्यारी ?

वैवाहिक समारोहमा किन रोए ह्यारी ?

बेलायतका राजकुमार ह्यारीले शनिबार अमेरिकी पूर्वअभिनेत्री मेगन मार्कलसँग विहे गरे। विहे गर्दा उनी खुसी हुनुपर्ने हो, तर केही भावुक देखिए।