अर्बपति तथा टेस्लाका प्रमुख कार्यकारी (सिइओ) एलन मस्क चीन पुगेका छन्। विद्युतीय सवारीका लागि विश्वको सबैभन्दा ठूलो बजार चीनमा एक वर्षभन्दा कम समयमा यो उनको दोस्रो भ्रमण हो।

चिनियाँ सरकारी प्रसारक सिसिटिभीका अनुसार बेइजिङको डियाओयुताई स्टेट गेस्टहाउसमा विश्वका सबैभन्दा धनीमध्येका एक तथा एक्सका समेत मालिक मस्कको तस्बिर प्रकाशित गर्दै उनले एक शीर्ष व्यापार अधिकारीसँग छलफल गरेका हुन्।

मस्कको चीनमा व्यापक व्यापारिक चासो छ। उनको पछिल्लो भ्रमण गत वर्षको जुनमा भएको थियो। टेस्लाले मस्कको भ्रमणको पुष्टिका लागि एएफपीको अनुरोधलाई प्रतिक्रिया दिएन वा उनको भ्रमणको कार्यक्रम साझा गरेन।

‘चाइना काउन्सिल फर द प्रमोसन अफ इन्टरनेसनल ट्रेडको निमन्त्रणामा टेस्ला (अमेरिका) का सिइओ एलन मस्क आज दिउँसो बेइजिङ आइपुग्नुभएको छ’, सिसिटिभीले भनेको छ, ‘सहयोग र अन्य विषयमा आगामी कदमबारे छलफल गर्नका लागि मस्कले व्यापार परिषद्का प्रमुख रेन होङबिनसँग भेट गर्नुभयो।’

पश्चिममा पारा म्याग्नेटको विवादास्पद छवि भए पनि चीनमा टेस्लाको विद्युतीय सवारी मध्यमवर्गीय सहरी जीवनको प्रमुख हिस्सा बनेको छ। एक पटक चिनियाँ विद्युतीय सवारीको उपहास गरेपछि मस्कले यस वर्ष तिनीहरूलाई ‘विश्वको सबैभन्दा प्रतिस्पर्धी कार कम्पनी’ भनेर वर्णन गरेका छन्।

आइतवार सरकार समर्थित एउटा मिडिया आउटलेटले उनलाई उद्धृत गर्दै भनेको छ, ‘चीनमा विद्युतीय सवारीले प्रगति गरेको देख्न पाउँदा राम्रो लाग्यो, भविष्यमा सबै कारहरू विद्युतीय हुनेछन्।’ 

यद्यपि मस्कको आफ्ने कम्पनी विश्वको दोस्रो ठूलो अर्थतन्त्र चीनमा समस्यामा परेको छ। टेस्लाले आफ्नो स्टेयरिङ सफ्टवेयरलाई ठीक गर्न चीनमा १६ लाखभन्दा बढी विद्युतीय सवारी फिर्ता बोलाएको छ। चीनमा टेस्लाको आगमन तीव्र प्रतिस्पर्धात्मक विद्युतीय सवारी बजारमा अगाडि बढ्न उत्सुक फर्महरूबीचको मूल्य युद्धसँग मेल खान्छ।

चीनको स्थानीय कार कम्पनी बिवाईडी (बिल्ड योर ड्रिम्स) गत वर्षको चौथौ त्रैमासिकमा टेस्लालाई पछि पारेर विद्युतीय कारको संसारको शीर्ष बिक्रेता बनेको थियो। टेस्लाले यस वर्षको पहिलो त्रैमासिकमा उक्त उपाधि पुनः हासिल गर्यो तर बिवाइडी आफ्नो घरेलु बजारमा बलियोसँग शीर्ष स्थानमा कायम छ।

बेइजिङले विशाल अटो सो आयोजना गर्ने क्रममा मस्कको भ्रमण भएको छ।

यसअघि एलन मस्कको भारत भ्रमण गर्ने र त्यहाँ टेस्लाको उद्योग स्थापना गर्ने लगायतको विषयमा सम्झौता गर्ने कार्यक्रम तय भएको थियो। तर, उनकाले टेस्लाको ४ हजार सवारीमा समस्या आएपछि भारत भ्रमण स्थगित गरेका थिए। उनको आगामी भारत भ्रमणको मिति तय नहुँदै भारतविरोधी चीन भ्रमणले आशङ्का उत्पन्न गराएको छ। 

प्रकाशित: १७ वैशाख २०८१ ०७:३१ सोमबार