एसिया कप छनोट

अझै थालिएको छैन तयारी

बुधबार, २७ पुष २०७३, १० : ३३ कमल खत्री  | @kamalkc4


काठमाडौं–एएफसी एसिया कपको छनोट नेपालले भाग्यवश खेल्न पाएको प्रतियोगिता हो । नेपालले आफूलाई लायक सावित गरेर यो मौका पाएको होइन । एएफसी सोलिडारिटी कपको विजेता भएका कारण एसियाली फुटबल महासंघ (एएफसी) ले संयोग जुर्दा नेपाललाई एसियन कपको तेस्रो चरण छनोट खेल्ने अवसर प्रदान गरेको हो । तेस्रो चरणका लागि छानिएको ग्वामले सहभागिता फिर्ता लिएका कारण रिक्त स्थान पुर्ती गर्न एएफसीले नेपाललाई छानेको थियो ।

अखिल नेपाल फुटबल संघ (एन्फा) ले नाम दर्ता नगराइदिएका कारण छनोट चरण पार गरेको एएफसी कप प्लेअफ प्रतियोगितामा रुस्लान थ्री स्टार क्लबले भाग लिन पाएन । आफ्नै गल्तीमा देशको लिग च्याम्पियनलाई महादेशीय प्रतियोगिता खेल्नबाट बञ्चित गराएको एन्फाले भाग्यवश राष्ट्रिय टोलीले अर्को ठूलो मञ्चमा आफूलाई प्रस्तुत गर्न पाउने हुँदा पनि तयारी सुरु गरेको छैन ।

तथापि एन्फाका प्रमुख कार्यकारी अधिकृत इन्द्रमान तुलाधर अर्को साताबाट एसियन कपका लागि राष्ट्रिय टोलीको तयारी सुरु गर्ने योजना सुनाउँछन् । भन्छन्, ‘हामी छिटै तयारी सुरु गर्ने योजनामा छौं । राष्ट्रिय टोलीका प्रशिक्षक जापानमा छन् । उनी आएपछि एसिया कप छनोट तयारी सुरु गर्नेछौं ।’
नेपाली टोलीका प्रशिक्षक कोजी ग्वाटोकु एक÷दुई दिनमा काठमाडौं आइपुग्ने तुलाधरले बताए ।

तेस्रो चरणमा ग्वामको अनुपस्थिती हुने भएपछि एएफसीलेसोलिडारिटी कप विजेताका रुपमा नेपाललाई प्रस्ताव गरेको थियो । नेपालले डिसेम्बर २७ मा एएफसीको प्रस्ताव स्विकार्दै छनोटमा सहभागि हुने निर्णय गरेको थियो । विश्वकप र एसियन कपको संयुक्त रुपमा गरिएको छनोटमा नेपाल पहिलो चरणको प्लेअफमा भारतसँग निराश हुँदै छनोटबाट वाहिरिएको थियो ।

दोस्रो चरणको छनोटअन्तर्गत आठ समूहबाट चौथो स्थानमा रहने उत्कृष्ट ४ टोलीमा पर्दै ग्वामले तेस्रो तथा अन्तिम चरणमा स्थान सुरक्षित गरेको थियो । आठ समूहका विजेता र उत्कृष्ट चार उपविजेता सोझै विश्वकप छनोटको तेस्रो चरण तथा एसियन कपको अन्तिम चरणका लागि सोझै छनोट भएका थिए । त्यसवाहेक बाँकी चार उपविजेता, प्रत्येक समूहबाट तेस्रो हुने आठ तथा उत्कृष्ट चार चौथो हुने गरी कुल १६ टोली तेस्रो चरणका लागि छानिएका थिए ।

त्यसमा बाँकी रहेका १२ टोलीबीच छुट्टै दुई चरणको प्लेअफबाट छानिएका ८ टोली समावेश गरी २४ टोलीबीच तेस्रो चरणको छनोट प्रतियोगिता गर्ने एएफसीको व्यवस्था छ । त्यसअनुसार २४ टोलीलाई ६ समूहमा विभाजन गरी होम एन्ड अवे पद्दतिमा राउन्ड रोबिन छनोट लिग गरिनेछ । जहाँबाट प्रत्येक समूहका शीर्ष दूई टोली २०१९ मा संयुक्त अरब इमिरेट्स (युएई) मा हुने २४ टोलीको एएफसी एसियन कपका लागि छानिन्छन् । २०१८ मार्च २७ सम्म छनोट चरण चल्नेछ ।

ग्वामले आर्थिक कारण देखाउँदै तेस्रो चरण नखेल्ने निर्णय गरेको एएफसीले जनाएको छ । ग्वामको अनुपस्थितीमा प्राप्त अवसरमा नेपालका प्रतिद्वन्द्वी जनवरी १८ मा हुने ‘ड्र’बाट चयन हुनेछन् । ‘ड्र’ का लागि जनवरीको फिफा विश्व वरियताका आधारमा टिमलाई वरियता दिइएको छ । त्यसमा नेपाल पट ४ मा परेको छ ।

नेपालसँगै पट ४ मलेसिया, सिंगापुर, कुवेत, कम्बोडिया र भुटान रहेका छन् । पोर्ट–१ मा जोर्डन, ओमन, फिलिपिन्स, बहराइन, किर्गिस्तान र उत्तर कोरिया पोर्ट–२ मा भारत, प्यालेस्टाइन, ताजिकिस्तान, भियतनाम, हङकङ र तुर्कमिनिस्तान छन् । पोर्ट–३ मा माल्दिभ्स, लेबनान, यमन, अफगानिस्तान, ताइनिज ताइपेइ र म्यानम्यार छन् ।

छनोट खेल्ने २४ मध्ये १२ टोलीले एसिया कपको फाइनल चरणमा प्रतिस्पर्धा गर्नेछन् । युएईमा हुने प्रतियोगिताका लागि यसअघि १२ टोली छनोट भैसकेका छन् । युनाइटेड अरब इमरेट्स आयोजकका रुपमा प्रतियोगिताका लागि स्वतः छनोट भैसकेको छ । छनोट भैसकेका अन्य टोलीमा कतार, दक्षिण कोरिया, जापान, थाइल्यान्ड, साउदी अरब, अस्टे«लिया, उज्वेकिस्तान, सिरिया, इराक, इरान र चीन छन् ।







यसमा तपाईको मत

तपाईंको रुचि अनुसारको समाचारको लागि खाता खोल्नुहोस् ।

अन्य समाचार

मिस वर्ल्डको उपाधी मिस इन्डिया मानुषीलाई

मिस वर्ल्डको उपाधी मिस इन्डिया मानुषीलाई

यस वर्षको मिस वर्ल्डको उपाधी मानुषी चिल्लरको जितेकी छिन् । शनिबार चीनको सान्यामा आयोजित ६७ औं मिस वर्ल्डको फाइनलमा गत...

धनगढी तताए हेमन्तले

धनगढी तताए हेमन्तले

डोट्याली कवि हेमन्त विवशका सृजनाबाट शनिबार धनगढीका साहित्यपारखी मन्त्रमुग्ध बनेका छन्। रुबस होटलमा दिउँसो भएको एकल रचना वाचन कार्यक्रममा उनले...

‘बडी सेमिङ’ विरुद्ध विद्या

‘बडी सेमिङ’ विरुद्ध विद्या

हरेक प्रश्नको निरासपूर्ण उत्तर दिने बलिउड अभिनेत्री विद्या वालनको सम्बन्ध पत्रकारहरूसँग सौहाद्र रहँदैन । आगामी फिल्म ‘तुम्हारी सुलु’को प्रमोसनका बेला...

‘भैरे’ बन्दै दयाहाङ

‘भैरे’ बन्दै दयाहाङ

अभिनेता दयाहाङ राई पछिल्ला केही फिल्ममा टिपिकल चरित्रमा देखिन थालेका छन् । रिलिज भइसकेको फिल्म ‘वीरविक्रम’मा ‘वीर’ बनेका उनी पोस्ट...