खोटाङ– अज्ञात समूहले खोटाङमा एमाले वडाध्यक्षका उम्मेदवारको घरमा सुतली बम बिष्फोट गराएको छ। रुपाकोट मझुवागढी नगरपालिका–८ दोर्पाचिउरीडाँडाको वडाध्यक्षका उम्मेद्वार लिला चौहानको घरमा मंगलबार राती बम बिष्फोट गराएको हो । बिष्फोटमा वडाध्यक्षका प्रत्यासी चौहानकी बुहारी शकुन्तला चौहान घाईते भएकी छन् । उनको दुबै खुट्टा डढ्नुका साथै चोट लागेको छ । शकुन्तलाको दाहिने खुट्टाको फिलामा समेत चोट लागेको उम्मेद्वार चौहानका भतिज दानबहादुर चौहानले बताए। घरको सामुन्ने रहेको भान्छा कोठामा उम्मेद्वार चौहानका दाजु टेकबहादुर, बुहारी शकुन्तला र ८ महिने भतिज किस्मत बसेर खाना खाइरहेको अवस्थामा दुई वटा सुतली बम बिष्फोट गराइएको हो । पहिलोपल्ट हानिएको बम बिष्फोट नभएपछि तत्काल दोश्रो बम हानिएको चौहान परिवारले बताएको छ । पहिलो बम नपड्केपछि अत्तालिएर भाग्दाभाग्दै अर्को बम हानिएको जानकारी आएको एमाले खोटाङका अध्यक्ष बबी चामलीङले बताए । घाईतेको स्थानीय स्वास्थ्य संस्थामा उपचार भइरहेको छ।

चौहान परिवारका अनुसार अपरिचित दुई युवकले स्थानीय कृष्ण खत्रीको घर सोधेर गएको आघा घण्टापछि बम बिष्फोट भएको हो । विष्फोटबाट किचनमा जमिन फाटेको छ । उम्मेद्वार चौहान चुनावी घरदैलो अभियानमै रहेका समयमा विष्फोट गराइएको हो । बिष्फोटकाबेलामा उम्मेद्वार चौहानकी आमा भने घरको माथिल्लो तलामा सुतीरहेकी थिईन् । प्रमुख जिल्ला अधिकारी प्रल्हाद पोखरेलले भने भान्छा घर नजिक सुतली बम बिष्फोट गराइएको बताए । ‘दुई वटा सुतली बम हानिएको जानकारी आएको छ,’ प्रजिअ पोखरेलले भने, ‘विष्फोटमा एक जना घाईते भएको छ। विस्तृत जानकारी आउन बाँकी छ।’

विष्फोटमा संलग्नको पहिचान हुन सकेको छैन । बिष्फोट नभएको सुतली बम निष्क्रिया पार्नका लागि दिक्तेलस्थित नेपाली सेनाको बिस्फोजल टोली बुधबार बिहान घट्नास्थल पुगेको छ।

प्रकाशित: ७ असार २०७४ ०३:३६ बुधबार