चुलियो कतार संकट : फोन वार्तापछि साउदी आक्रोशित

आइतबार, २५ भदौ २०७४, ०९ : ३१ नागरिक


रियाद- लामो समयदेखि जारी रहेको कतार संकट समाधानका लागि कतारका नरेश र साउदीका राजकुमारबीच टेलिफोन वार्ता भएको केही समयपछि साउदी अरबले कतारसँगको वार्ता स्थगित गरेको बताएको छ । कतार र उसका छिमेकी साउदी अरब, बहराइन, इजिप्ट र संयुक्त अरब इमिरेट्सबीच लामो समयदेखि विद्यमान कूटनीतिक समस्या समाधानका लागि वार्ता गर्ने विषयमा कतारका नरेश सेख तामिम बिन हमाद अल–थानी र साउदीका राजकुमार मोहम्मद बिन सलमानबीच टेलिफोन वार्ता भएको थियो ।  दुई पक्षबीच टेलिफोनमा संकट समाधानका विषयमा छलफल भएको केही सयमपछि कतारले फोन वार्ताबारेका तथ्य तोडमोड गरेको साउदी अरबले आरोप लगाउँदै दोहासँगको वार्ता अन्त्य गरेको बताएको छ ।

साउदी अरब, बहराइन, इजिप्ट र संयुक्त अरब इमिरेट्सले आतंकवादलाई समर्थन र सहयोग गरेको आरोप लगाउँदै जुन ५ देखि कतारसँगका सम्पूर्ण कूटनीतिलगायतका सम्बन्ध विच्छेद गरेका छन् । यति मात्रै नभई कतारसँगको नजिकको छिमेकी साउदीले जमिन, हवाई र सामुद्रिक नाका सबै बन्द गरेको छ भने अन्य तीन देशले पनि हवाई र सामुद्रिक नाका बन्द गरेका छन् । कतारले भने आफूले आतंकवादलाई सहयोग गरेको भन्ने छिमेकीको आरोपलाई  अस्विकार गर्दै आएको छ ।

जारी संकट समाधान गर्ने विषयमा अमेरिकी राष्ट्रपति डोनाल्ड ट्रम्पले शुक्रबार दुवै पक्षसँग अलग अलग कुराकानी गरेपछि उनीहरुबीच फोन वार्ता भएको थियो । शुक्रबार ट्रम्पले खाडी क्षेत्रमा स्थायित्व कायम गर्न र इरानको चुनौतिलाई सामना गर्नका लागि संयुक्त राज्य अमेरिका र अरब राष्ट्रबीच एकता हुनुपर्ने विषयमा जोड दिएको अमेरिकी राष्ट्रपति कार्यालय ह्वाइट हाउसले जारी गरेको विज्ञप्तिमा जनाइएको छ । राष्ट्रपति ट्रम्पले आतंकवादलाई परास्त गर्न, उनीहरुलाई आर्थिक सहयोग बन्द गर्न र अतिवादी विचारलाई समर्थन नगर्न सबै राष्ट्रले प्रतिबद्धता व्यक्त गर्नुपर्ने विषयमा जोड दिएको ह्वाइट हाउसले जनाएको छ ।

कतारी नरेश र साउदीका राजकुमारको फोनमा कुराकानी भएपछि जारी संकट समाधानमा महत्वपूर्ण कदम हुने ठानिएको थियो । उनीहरुबीचको टेलिफोन कुराकानी जुन महिनाबाट सुरु भएको खाडी संकटपछि पहिलो पटक रियाद र दोहाबीच भएको औपचारिक कुराकानी थियो । साउदी अरबले एक्कासी कतारसँगको वार्ता स्थगित गरेको घोषणा गरेपछि भने दुई देशबीचको सम्बन्ध थप बिग्रिएजस्तो देखिएको बिबिसीले जनाएको छ ।

दुवै देशका राज्य सञ्चालित सञ्चारमाध्यमले कतारका नरेश सेख तामिम बिन हमाद अल–थानी र साउदीका राजकुमार मोहम्मद बिन सलमानले टेलिफोन कुराकानीमा कतार संकट समाधानका लागि वार्ताको आवश्यकता रहेको विषयमा कुराकानी भएको जनाएका थिए ।

साउदी अरबको सरकारी समाचार एजेन्सी साउदी प्रेस एजेन्सीले कतारका नरेशले चार राष्ट्रले राखेको मागका बारेमा छलफल गर्न वार्ताको टेबलमा बस्न इच्छा व्यक्त गरेको उल्लेख गरेको थियो । यस विषयमा साउदी अरबले बहराइन, इजिप्ट र संयुक्त अरब इमिरेट्ससँग थप छलफल गरेपछि विस्तृत जानकारी दिने विषयमा कुराकानी भएको जनाइएको थियो । यसैबीच कतार समाचार एजेन्सीले भने साउदीका राजकुमारले दुवै देशको सार्वभौमिकतालाई प्रभावित नपार्ने गरी विवादित विषयमा समाधान गर्नका लागि दुई जना विशेष दूत नियुक्त गर्ने प्रस्ताव गरेको उल्लेख गरेको थियो । तर केही समयमा नै साउदी अरबले वार्ताका लागि कतार गम्भीर नभएको आरोप लगाउँदै दुई देशबीचको सम्पर्क तत्कालका लागि स्थगित गरेको घोषणा गरेको थियो । कतारी सञ्चारमाध्यमले कतारी नरेश र साउदीका राजकुमारबीच भएको टेलिफाने कुराकानी दोहाको पहलमा भएको प्रष्ट नपारेको भन्दै रियाद रुष्ट भएको विभिन्न पर्यवेक्षकले अनुमान गरेको बिबिसीले जनाएको छ ।

कतारमाथि नाकाबन्दी लगाइरहेको साउदी अरब, बहराइन, इजिप्ट र संयुक्त अरब इमिरेट्सले समस्या समाधानका लागि कतारसमक्ष १३ बुँदे शर्त अगाडि सारेका छन् । जसमा कतारको आर्थिक सहयोगमा सञ्चालन भइरहेको अल–जजिरा टेलिभिजन बन्द गराइनुपर्ने र इरानसँगको उसको कूटनीतिक सम्बन्ध खारेज गरिनुपर्ने लगायतका छन् ।







यसमा तपाईको मत

तपाईंको रुचि अनुसारको समाचारको लागि खाता खोल्नुहोस् ।

अन्य समाचार

गीत गाउँदा गाउँदै अस्ताए जनवादी गायक खुसीराम पाख्रिन

गीत गाउँदा गाउँदै अस्ताए जनवादी गायक खुसीराम पाख्रिन

बाम गठबन्धनले मंगलबार भरतपुरमा आयोजना गरेको सभामा ‘युवाहरु हो’ भन्ने जोशीलो गीत गाएका प्रशिद्ध जनवादी गायक तथा पूर्व सांसद खुसीराम...

लिलीबिलीको सुटिङ लण्डन र स्कटल्याण्डमा

लिलीबिलीको सुटिङ लण्डन र स्कटल्याण्डमा

मिलन चाम्सको निर्देशनमा बन्न लागेको नेपाली फिल्म ‘लिलीबिली’ को सुुटिङ लण्डन तथा स्कटल्याण्डमा भइरहेको छ । पछिल्लो समयका चर्चित नायक...

बोलचालमा प्रतिबन्ध

बोलचालमा प्रतिबन्ध

बलिउड अभिनेत्री परिणीति चोपडा र अर्जुन कपुर चाँडै नै फिल्म ‘सन्दीप और पिंकी फरार’मा देखिँदैछन् । अघिल्लो फिल्म ‘इशकजादे’मा पनि...

एकादेशमा ‘डेथ अफ साउण्ड म्यान’ उत्कृष्ट

एकादेशमा ‘डेथ अफ साउण्ड म्यान’ उत्कृष्ट

ध्वनिको महत्वलाई समेटिएको शर्ट फिल्म ‘डेथ अफ साउण्ड म्यान’ले यस वर्षको एकादेशमा अन्तराष्ट्र्रिय शर्ट फिल्म फेस्टिभल अवार्ड जितेको छ। थाईल्याण्डका...