सपनाको सहर

‘नेताको फाइदा हेरेर विकासका काम हुन्छन्’

शुक्रबार, २८ पुष २०७४, १४ : १३ नागरिक


राजेन्द्र खड्गी, अभिनेता

तपाईंलाई मनपरेको सहर कुन हो ?
मलाई हेटौँडा धेरै सुन्दर लाग्छ । मेरो जन्म पनि हेटौंडामै भएको हो । हेटौँडालाई मैले बाल्यकालदेखि नै चिन्न पाएँ । काठमाडौंको अस्तव्यस्तभन्दा हेटौँडा नै राम्रो छ, व्यवस्थित र प्रदूषणमुक्त छ । सडक पनि फराकिला छन् । 

नेपालबाहिर कुन–कुन देशका सहर घुम्नुभएको छ ?
मैले युरोपका धेरै सहर घुमेको छु । त्यहाँका सहर सुन्दर र व्यवस्थित छन् । जापान, अस्ट्रिया, जर्मन, पोर्चुगल, बेलायत, फ्रान्स, कोरियालगायत एक दर्जनभन्दा बढी देश पुगेको छु । यी देशका सहर धेरै व्यवस्थित लाग्यो । ती सहरमा फोहोर कतै देखिनँ । मलाई ज्यादै मनपरेको सहर हङकङ पनि हो । हङकङ सहर हेर्दै ऊर्जा मिल्ने खालको छ । 

नेपालका सहर कस्तो लाग्छ ?
नेपालका सहर विकासमा धेरै पछि छन् । आधुनिकता र व्यवस्थापनका रूपमा विदेशी सहर हामीभन्दा कैयौँ गुणा अघि छन् । यो हिसाबमा नेपालका सहर विदेशी मुलुकका भन्दा धेरै पछाडि छन् । विकसित देशका सहर आधुनिकताको अवधारणाअनुरूप विकास भइसकेका छन् । ऐतिहासिक, मौलिक र प्राकृतिक पक्षलाई नियाल्दा नेपाल धेरै अगाडि छ । यहाँका सहरमा पाइनेजस्तो अनुकूल मौसम कतै पाइँदैन । नेपालका सहरमा पुराना कलाकृति छन् । हाम्रा सहरका मौलिकता, प्राचीन सम्पदा, कलाकृति नियाल्न पाउँदा आनन्द लाग्छ । विकसित देशका सहरमा भने हाम्रोजस्तो प्राकृतिक हरियाली र ऐतिहासिक ठाउँ भेट्न मुस्किल हुन्छ ।

तपाईंको सपनाको सहर कस्तो होस् भन्ने लाग्छ ?
सहर सबै किसिमबाट व्यवस्थित हुनुपर्छ । विदेशका सहर हेर्दै रनभुल्ल पार्ने किसिमका छन् । हाम्रा सहर पनि त्यस्तै बन्ने हो भने पर्यटकको ओइरो लाग्थ्यो होला । मेरो सपनाको सहर यस्तो होस्– सहरमा बस्ने एकले अर्कोलाई अवरोध नगरून् । सहरको गल्लीमा कतै फोहोर नभेटियोस् । सडक व्यवस्थित होऊन् । सेवा–सुविधा लिन झन्झट नहोस् । 

हाम्रो देशका सहरको विकास कसरी होला ?
सत्तामा हुनेको सोच विकास नभएरै हो, सहरको विकास नभएको । माथिल्लो निकायमा बस्नेले काम नगर्ने र भ्रष्टाचार गर्न पल्केपछि सहरको विकास नभएको हो । सरकार बलियो र पारदर्शी भएको भए, जनताले यसरी दुःख खेप्नुपर्ने अवस्था आउँदैनथ्यो । यहाँ एउटा सानो सडक योजनामा पनि ठूलो धेरै राजनीति हुन्छ।

उपत्यका कस्तो लाग्छ ?
म ३५ वर्षपहिले काठमाडौं पस्दा सहर अति नै व्यवस्थित थियो । अहिले जनघनत्व बढी भएपछि सहर अस्तव्यस्त भएको छ । हिजोआज उपत्यकाका मुख्य चोकमा खुट्टो राख्ने ठाउँ हुन्न । सबैतिर मानिस र सवारीसाधनको चाप देखिन्छ । सडक निर्माणले गर्दा सवारी आवागमनमा अवरोध परेको छ । सडकको धुलोले उपत्यकामा प्रदूषण बढेको छ । यस्तै कारण सम्झँदा उपत्यकामा बस्नै मन लाग्दैन ।

सहर यति धेरै कुरूप हुनुको कारण के होला ?
सरकारी निकायमा बस्ने कर्मचारी र नेताको भ्रष्ट मनोवृत्तिका कारण सहर कुरूप भएको हो । सबै पक्ष आफ्नो पेसामा जिम्मेवार भएर लागिपरेको भए सहर यति धेरै कुरूप हुँदैनथ्यो । यहाँ जनताको फाइदाभन्दा पनि नेताको फाइदा हेरेर विकास निर्माणका काम सञ्चालन हुन्छन् । यस्तै–यस्तै मानसिकता र प्रवृत्तिका कारण सहर बिग्रिएको हो । 

सहर कसरी सफा राख्न सकिएला ? 
सहर तब मात्रै सफा हुन्छ, जब सहरवासीको सोच सफा हुन्छ । हाम्रा सहरवासी अनुशासित नभएकै कारण फोहोर भएको छ । सबैले आफ्नो ढोकाअगाडि फोहोर थुपार्छन् । तर, सम्बन्धित ठाउँमा फोहोर फाल्नुपर्छ भन्ने चेतना छैन । आफ्नो मात्रै हेर्दा हाम्रो सहरको रूप बिग्रिएको छ । जताततै फोहोर र प्रदूषण बढेको छ। 

अर्को कुरा, सहर सफा र सुन्दर राख्न सरकार पनि लाग्नुपर्छ । भइरहेका विकास निर्माणका काम सरकारी निकायले छिटो सक्नुपर्छ । सडकआसपास रूख–बिरुवा रोप्नुपर्छ । धुवाँधुलो, ट्राफिक जाम हुनुहुँदैन । पार्किङको राम्रो व्यवस्था हुनुपर्छ । यसमा जिम्मेवार निकायले काम गर्नुपर्छ । यति भयो भने सहर केही व्यवस्थित हुन सक्छ । 

उपत्यकाको मनपर्ने पक्ष के हो ?
यहाँको मौसम सदावहार लाग्छ । काठमाडौंको जाडो र गर्मी हाम्रो शरीरले पचाउने खालको हुन्छ । यहाँका सम्पदा, मठ–मन्दिर राम्रो लाग्छ । काठमाडौंमा सबैखाले सेवा–सुविधा पाइने भएकाले पनि यो ठाउँलाई धेरैले रोजेका हुन् । 

काठमाडौंको मननपर्ने पक्ष ?
यहाँका मननपर्ने पक्ष धेरै छन् । भीडभाड, धुवाँधुलो, ट्राफिक जाम र अव्यवस्थित पार्किङ नै उपत्यकाका मुख्य समस्या हुन् । यी समस्या झन्झन् चुनौतीपूर्ण बन्दै गएका छन् । अब पनि सरकारले यसतर्फ नसोच्ने हो भने उपत्यका बस्नै नमिल्ने सहर नबन्ला भन्न सकिन्न । 

काठमाडौंमा घुमघाम कत्तिको गर्नुहुन्छ ?
खासै मनपर्दैन । एक त सहरमा घुम्न र आनन्दको सास लिने एकान्त ठाउँको अभाव छ, अर्को कुरा काममा व्यस्त भइन्छ। 
काठमाडौंको मनपर्ने खानेकुरा ?
यहाँका सबैखाले खानेकुरा मीठो लाग्छ।

पछिल्लो समय पुगेको सहर ?
तीन महिनापहिले म कोरिया गएको थिएँ । कोरिया अति नै विकसित भइसकेको रहेछ । हामीलाई त्यो स्थानमा पुग्नका लागि अझै हजार वर्ष लाग्छ । कोरिया मेहनेती मान्छे बस्ने ठाउँ हो । यहाँ खेतीपाती पनि राम्रो हुँदो रहेछ।

मन भएर पनि घुम्न नपाएको सहर कुन हो ? 
मलाई तिब्बत जाने मन छ । कसै गर्दा पनि यो ठाउँ जाने साइत जुरेको छैन । हेरौँ, एक न एक दिन समय मिल्ला नि। 
प्रस्तुति : शिवहरि घिमिरे






यसमा तपाईको मत

तपाईंको रुचि अनुसारको समाचारको लागि खाता खोल्नुहोस् ।

अन्य समाचार

सेल्फि र सेल्फि फोनको लहर

सेल्फि र सेल्फि फोनको लहर

सेल्फि फोनको ट्रेन्डलाई नियालेर हेर्दै र सेल्फि क्यामरा राम्रो हुनलाई केको आवश्यकता पर्छ भन्ने विषयमा टिप्पणी । ...

ट्याब्लेट रोज्दा खोज्नुपर्ने उत्तरहरु

ट्याब्लेट रोज्दा खोज्नुपर्ने उत्तरहरु

सानदार स्क्रिन हुने, बोक्न गाह्रो नहुने र चलाउन सजिलो हुने भएकाले ट्याब्लेट छोटो समयमा नै अत्यधिक लोकप्रिय भएको छ ।...

ल्यापटप छान्न सरल

ल्यापटप छान्न सरल

गाह्रोभन्दा गाह्रो कामहरु पनि सजिलै गर्न मिल्ने तर जता पनि सजिलै बोकेर हिंड्न मिल्ने भएकाले ल्यापटप अहिले पुराना शैलीका डेस्कटप...

टिभीको नयाँ रुपलाई नियाल्दा

टिभीको नयाँ रुपलाई नियाल्दा

टिभी हेर्न सजिलो छ । किन्न भने त्यति सरल नहुन सक्छ । अहिले पुराना शैलीका सिआरटि टिभीहरु उत्पादन हुन छोडिसके...

पद्मावतीलाई चार राज्यमा प्रतिबन्ध, अदालत पुगे निर्माता

पद्मावतीलाई चार राज्यमा प्रतिबन्ध, अदालत पुगे निर्माता

राजपूत समुदायको विरोधपछि फिल्मको नाम परिवर्तन (पद्मावत) र दृश्य परिमार्जनसहित सेन्सर बोर्डबाट प्रदर्शनको अनुमति पाएको ‘पद्मावती’लाई राजसंस्थान, हरियाणा, गुजरात र...

साली बन्दै मरिस्का

साली बन्दै मरिस्का

नेपाली कथानक चलचित्र ‘साली कसको भेनाको’ मंगलबार चितवनमा शुभमुहूर्त गरिएको छ । मुभिङ पिक्चर्सद्वारा निर्मीत फिल्ममा वरिष्ठ कलाकार ऋद्धिचरण श्रेष्ठले...

‘शेरबहादुर हलिउडबाट प्रभावित’

‘शेरबहादुर हलिउडबाट प्रभावित’

फिल्म ‘शेरबहादुर’को ट्रेलर सार्वजनिक हुँदा यो फिल्म हलिउडको फिल्म ‘डन्ट ब्रिथ’बाट प्रभावित भएको आरोप लागेको थियो । फिल्म प्रभावित भएको...

लघुकथा वाचन तथा विमोचन

लघुकथा वाचन तथा विमोचन

शब्दपथको आयोजनामा लघुकथा सर्जक महेश प्रसार्इंको लघुकथा ‘अतिरिक्त स्वरहरू’को विमोचन ललितपुरको सिद्धेश्वर मन्दिर प्राङ्गण, लेलेमा सम्पन्न गरिएको छ । ...