‘म पार्टी अध्यक्षसँग आन्द्रा जोडिएको मान्छे हुँ’

सोमबार, ०३ पुष २०७४, १४ : ३८ नागरिक


काठमाडौं महानगरपालिका पूर्वमेयर तथा काठमाडौं निर्वाचन क्षेत्र– ६ ‘क’ प्रदेशसभाका लागि विजयी केशव स्थापितसँग हिमाल लम्साल र खिलक बुढाथोकीले समसामयिक विषयमा गरेको कुराकानी:

धेरै पार्टीमा कुद्नुभयो, तर सांसद हुन एमालेबाटै जुरेको रहेछ । कस्तो अनुभूति भइरहेको छ ?

सांसद भएपछि निकै खुसी छु । यसअघि महानगरपालिकाको मेयर भएर पनि काम गरेँ । त्यसपछि काम गर्न पाउने निकायमा भइनँ । त्यसैले अहिले प्रदेश सांसद भएपछि चुनौती र अवसर दुवै पाएको छु । अब सपना देखाउने मात्रै होइन, काम गरेरै देखाउने गरी अघि बढ्नेछु । त्यसैले मुख्यमन्त्रीको दाबेदारमा छु ।

बजारमा त मुख्यमन्त्रीको चर्चा अरुकै छ, पार्टीले तपाईंलाई मुख्यमन्त्री बनाउला त ? 

म पार्टीका अध्यक्षसँग आन्द्रा जोडिएको मान्छे हुँ । पार्टीको अध्यक्षसँग जोडिएको मान्छेलाई नबनाउलान् जस्तो लाग्दैन । सिनियरहरूले सिनियर पोस्ट नै ताक्नुपर्छ । त्योभन्दा सभामुख भए के होला ? सम्मानचाहिँ मुख्यमन्त्रीभन्दा ठूलो सभामुख नै हो नि ! हिजो पार्टीले केही व्यक्तिलाई काम गर्न सक्छन् भनेर मेयरमा उठायो । उपयुक्त पात्र भनेर जिताइयो । तर उनीहरूले सोचेअनुसार काम गर्न सकेनन् भनेर अनौपचारिक रूपमा व्यापक छलफल भइरहेको छ । उपयुक्त ठाउँमा पुगेर काम गर्न नसकेपछि राष्ट्रिय बेइज्जती भयो भनेर पार्टीपंक्तिमा छलफल भइरहेको छ । पार्टीको नाम पनि गुम्यो अनि जनताले पनि दुःख पाए। त्यसैले मेरो महान् पार्टीले अब गल्ती गर्दैनजस्तो लाग्छ । हामीजस्तो काम गर्नेलाई अवसर दिनुप¥यो नि ! पार्टीभित्र सबैलाई मेरो क्षमता थाहा छ । म आफ्नो क्षेत्रमा मात्रै सीमित रहन्न । त्यसैले सबै निर्वाचन क्षेत्रमा खटिएरै लागेको हुँ ।

प्रदेश तीनको मुख्यमन्त्री भए के के गर्नुहुन्छ ?

तीन नम्बर प्रदेश प्रचुर सम्भावना बोकेको क्षेत्र हो । यो प्रदेशमा नपाइने भन्ने चिज नै छैन । अहिले व्यवस्थापन गर्न मात्रै नजानिएको हो । सही ढंगले व्यवस्थापन गर्न सके केही वर्षभित्रै काँचुली फेर्न सकिन्छ । त्यसमा योजनाबद्ध भएर लाग्नुपर्ने हुन्छ । चितवन, धादिङ, मकवानपुर, नुवाकोटका भू–भागलाई समेटेर पाँच लाख रोपनी क्षेत्रमा नयाँ अत्याधुनिक सहर बनाउने योजना बनाएको छु । त्यस आसपास पाँच–सात सय मिटरको दायाँ–बायाँ क्षेत्रमा ल्यान्डपुलिङ (जग्गा एकीकरण) मार्फत नै बस्ती बसाल्नेछु । त्यस्तै पानी, विद्युत्को अभाव हुनेछैन । भूकम्प प्रतिरोधात्मक भवन बनाउनेछु । जहाँ जातीय घुलनदेखि जातीय संहिष्णुतायुक्त क्षेत्र बनाउने लक्ष्य राखेको छु । दोलखालाई कृषि र पशुपालनको केन्द्रबिन्दुका रूपमा स्थापित गर्नेछु । रामेछापमा जलविद्युत्को प्रचुर सम्भावना छ । त्यसलाई समेटेर अघि बढ्ने योजना छ । बोधीचितको केन्द्रबिन्दुका रूपमा स्थापित गरिनेछ । त्यस्तै, सिन्धुलीगढी आसपास क्षेत्रलाई समेटेर रिङरोड बनाउने परिकल्पना गरेको छु । तीन नम्बर प्रदेश बहुमूल्य पत्थरदेखि प्राकृतिक रूपमा निकै धनी छ । ती प्रचुर सम्भावनालाई उचित व्यवस्थापन गरेर अघि बढ्ने हो । केरुङबाट नुवाकोटसम्म रेलमार्ग ल्याउनेछौँ । त्यस क्षेत्रमा सुक्खा बन्दरगाह बनाएर अर्थतन्त्रलाई सुधार्नेछौँ । धादिङमा पानीको प्रचुर सम्भावना छ । धादिङबाट खर्बौं रुपैयाँका निर्माण सामग्री नै बिक्री–वितरण गर्न सकिन्छ । रसुवा खानी क्षेत्र हो । जस्ता, युरेनियन लगायत खनिज पदार्थबाट धेरै फाइदा लिन सक्छौँ ।

यो क्षेत्र प्राकृतिक र सांस्कृतिक दुवै हिसाबले सम्भाव्यता व्यापक रहे पनि बोलेजसरी व्यवहारमा उतार्न सकिएला ?

यो ईश्वरले वरदानस्वरूप दिएको क्षेत्र हो । त्यसैले प्रदेश ३ प्रशस्त सम्भावना बोकेको क्षेत्र हो । सम्भावना हुँदाहुँदै पनि उचित व्यवस्थापन गर्न नसक्दा अहिले हामी पछि परेका हौँ । अहिले केन्द्रमा एउटा सरकार, स्थानीय तहमा अर्काे पार्टीको सरकार भएर समन्वयका अभावले नै काम हुन नसकेको हो । अब त त्यस्तो वातावरण छैन । स्थानीय सरकार पनि वाम गठबन्धन नेतृत्वकै बहुमतको सरकार छ । अब प्रदेश सरकार र केन्द्रीय सरकार पनि हाम्रै नेतृत्वमा हुनेछ । त्यसैले अब हामीले अवरोधविनै काम गर्न सक्छौँ । अब प्रदेश सरकारले नै कन्स्ट्रक्सन कम्पनी, पूर्वाधार बैंक र इन्भेस्टमेन्ट खोल्नुपर्छ । सरकार मातहतकै निर्माण कम्पनी बनेपछि कमसल खालका संरचना बन्ने डर हुँदैन । पूर्वाधार बैंक र इन्भेस्टमेन्ट कम्पनीले सहजै लगानीको वातावरण बन्नेछ। जसकारण कार्यसम्पादन गर्न सहज हुनेछ । हाम्रो मुलुक कर्मचारी संयन्त्रले पनि अघि बढ्न नसकेको हो । त्यसैले अब राम्रो काम गर्ने कर्मचारीलाई ‘हायर’ र खराब चरित्रका कर्मचारीलाई ‘फायर’ गर्ने नीति लिएर नै अगाडि बढ्नुपर्छ ।

मुख्यमन्त्री बन्ने सपना साकार हुने सम्भावना कत्तिको देख्नुहुन्छ ?

पार्टीले मुख्यमन्त्री नबनाए मेरो एजेन्डामा प्रतिबद्ध भएरै लाग्नेछु । मुलुकलाई विकास र समृद्धिको बाटोमा अघि बढाउनु अहिलेको आवश्यकता हो । त्यो पूरा गर्न प्रदेश सांसद भएर पनि गर्न सकिन्छ । जुनसुकै नेतृत्वमा आए पनि जनताको आवश्यकता अनुसारको विकास निर्माणको काम नगरी सुखै छैन । त्यसैले सबैसँग मिलेर अघि बढ्नुपर्छ ।

तपाईं सपना मात्रै बाँड्नुहुन्छ, काम पूरा गर्नुहुन्न भन्छन् नि ?

यो मेरा विपक्षी र इष्र्या गर्नेले भन्ने कुरा मात्रै हो । मेरो बुवा अस्पतालमा छटपटाइरहेका बेला समेत माइतीघर मण्डला विस्तार गरेको हुँ । मेरो कर्म नै काम गर्ने हो, जे गर्दा जनता खुसी हुन्छन् । राजा महेन्द्रले ताकेको सोल्टीमोडदेखि कलंकीको बाटो मैले नै तोडेको होइन ? मलाई त्यो बेला तीन हजार मान्छेले हमला गरे । त्यो बेला बाटोमै कुस्ती खेलेको मान्छे हुँ । मलाई सप्पैले प्रशंसा गर्छन् । केही मान्छे मबाट आतंकित छन्, किनभने मैले राजनीति समाप्त पारिदिन्छु भन्ने उनीहरुलाई डर छ । उनीहरूले नानाथरीका प्रोपगान्डा मात्रै मच्चाउने गरेका हुन् । नयाँबजारमा जग्गा एकीकरण गर्दा ममाथि नै सांघातिक आक्रमण नै भयो । तर, अहिले जग्गा एकीकरणमार्फत बस्ती बसाल्ने कार्य संसारभर नै प्रख्यात भइराखेको छ ।

तपाईंले बाँडेका सपना व्यावहारिक रूपमा कार्यान्वयन गर्न कतिको अप्ठेरो छ ?

मैले बाँडेका सपना पूरा गर्न केही अप्ठेरो छैन । त्यो काम गर्ने अवसर मलाई दिनुप¥यो, सहजै कार्यान्वयन गरेर देखाइदिन्छु । अबको विकास ल्यान्ड पुलिङ (जग्गा एकीकरण) र हाउस पुलिङमार्फत नै गर्नुपर्छ । तत्कालका लागि जग्गा एकीकरणमार्फत काम गर्दा जग्गाधनीको जग्गाको लागत घट्छ । किनकि यहाँ सबै प्रकारका व्यवस्थित पूर्वाधार निर्माण गर्नुपर्ने हुन्छ । अन्ततः जग्गाधनीलाई फाइदा नै पुग्ने हो । त्यो कुरा हामीले जनतालाई बुझाउन मात्रै नसकेको हो । आनाको ५० लाख पर्ने जग्गा एकीकरणमार्फत सोही जग्गा दुई करोड पर्ने हुन्छ ।

तीन नम्बर प्रदेशको राजधानी कहाँ हुनुपर्ला ?

हाललाई तीन नम्बर प्रदेशको राजधानी काठमाडौं उपत्यकामै हुनुपर्छ । किनकि अन्य जिल्लामा तत्कालै नयाँ संरचना बनाउन अप्ठेरो छ । केही समयभित्रै चितवन, धादिङ, मकवानपुर, काभ्रेलगायत क्षेत्र समेटेर नयाँ सहरीकरण गरेर अत्याधुनिक सहर बनाइन्छ । त्यसैले सोही पायक पर्ने क्षेत्रमै प्रदेशको स्थायी राजधानी बनाउन उपयुक्त हुन्छ ।

प्रदेशसभा र सरकारसँग खासै अधिकार रहँदैनन्, तपाईंका सपना कसरी पूरा गर्नुहुन्छ ?

प्रदेश सरकारको छुट्टै अधिकार र क्षेत्राधिकार रहेका छन् । प्रदेश सरकारले धेरै ठाउँमा राम्रो काम गरेर देखाउने अवसर पाएका छन् । यसैको ज्वलन्त उदाहरण हो– भारतको गजुरातका मुख्यमन्त्री नरेन्द्र मोदीले प्रदेश सरकारबाट उत्कृष्ट काम गरेरै भारतको नेतृत्व सम्हाल्ने मौका पाए । पार्टीमा उनीभन्दा कैयौँ ठूला व्यक्ति थिए । अवसर त उनैले पाए नि । त्यसैले प्रदेश सरकारले राम्रो काम गर्न सके मुलुक हाँक्ने नै जिम्मेवारी प्रदेश सरकारकै प्रमुखले पाउने रैछन् । त्यसैले आशावादी भएरै अघि बढ्नुपर्छ । प्रदेश सरकारको खुबी नभएको खण्डमा कारिन्दा मात्रै हुन्छ । खुबी भयो भने त ऊ सरकार तथा शासक नै भयो नि । यो प्रदेश ‘इनलाइट हाउस’ हो । यहाँ राम्रो जे हुन्छ, त्यो सबै अन्य प्रदेशले सिक्ने गर्छन् ।

तपाईंले विदेशी पर्यटकलाई रारातालमा पौडी खेलाउने भन्नुभएको छ, यो कसरी सम्भव छ ?

गणेश हिमालको फेदमा हाइअल्टिच्युट ट्रेनिङ सेन्टर बनाउने मेरो योजना हो । टे«निङ सेन्टर बनेसँगै खेलाडी उत्पादन मात्रै होइन, यसलाई विदेशी पर्यटक आकर्षणको केन्द्रबिन्दु बनाउन समेत सकिन्छ । हाई अल्टिच्युट टे«निङ सेन्टरबाट खेलाडी उत्पादन गर्न सके अन्तर्राष्ट्रिय पदक ल्याउने सम्भावना उत्तिकै हुन्छ । त्योसँगै पर्यटनमार्फत आम्दानीको स्रोत समेत बढाउन सकिन्छ । रारामा स्पोर्टस फेस्टिभल मनाउन सकिने पर्याप्त आधार रहेका छन् । अहिले रारा पुग्दा जो–कोहीलाई रिंगटा लाग्ने अवस्था छ । त्यसैले त्यहाँका स्थानीय युवायुवतीले सहजै रारातालमा पौडी खेल्न सक्छन् । विदेशी पर्यटकलाई बोलाएर पौडी प्रतियोगिता सञ्चालन गर्न सकिन्छ । हामीसँग जे खुबी छ, त्यसैलाई नै सदुपयोग गर्न सकिन्छ । त्यहाँका मान्छेले गर्न सक्छन्, त्यसैले सोहीअनुसारको खेल प्रवद्र्धन गर्न सकिन्छ ।

कामनपा मेयरका सय दिनको एक सय एक कार्यक्रमको डिजाइनर समेत हुनुहुन्थ्यो, तर सम्पूर्ण काम हुन सकेन नि ?

मेयरसाप नयाँ पर्नुभयो । केन्द्रीय सरकारले स्थानीय तहलाई काम गर्ने वातावरण नै बनाइदिएन । उपत्यकामा भएका सडक निर्माण र मर्मत–सम्भारको जिम्मेवारी अर्कै संयन्त्रको छ । महानगरको जिम्मेवारीभित्र नपर्ने भएकाले पनि काम गर्न असहज भएको हो । यहाँ समन्वयको अभाव जताततै छ । त्यसैले काम गर्न अप्ठेरो भएको होला । त्यस्तै, कानुनी जटिलताले समेत द्रूत गतिमा काम अघि बढ्न नसकेको हुनुपर्छ । सय दिनमा गर्नुपर्ने एक सय एक कामको ड्राफ्ट मैरे हो । उहाँले के कारणले काम गर्न सक्नुभएन, त्यो मलाई थाहा भएन ।

‘गगन थापाको राजनीतिक भविष्य नै सिध्याइदिन्छु’ भन्दै हराउन लाग्नुभयो ? उनले निर्वाचन त जितिछाडे नि ?

गगन थापा हारेकै हो । किनभने प्रधानमन्त्री शेरबहादुर देउवासँग त्यो विषयमा कुरा गरेँ । थापाले अहिले पनि हिसाब (प्याक्ट नामक संस्थाबाट अनुदान  रकम लिएको)  बुझाउनुभएको छैन । अहिले उहाँले रकम लिएकै छैन भन्नुभयो । यसमा भनेर मात्रै हुँदैन, कागजात पेस गर्नुपर्छ, त्यो उहाँको काम हो । पैसा लिएकै छैनन् भनेर प्याक्ट किन आयो ? त्यसैले प्रधानमन्त्री देउवाले प्याक्टलाई दबाब दिएको बुझिन्छ ।

यसमा थापाले कागज पेस गर्नुपर्ने हो । तर, प्याक्टलाई किन अघि सार्नुप¥यो ? त्यो भनेकै अधिनायकवाद हो । जनताले हिसाब मागेपछि मैले पनि मागेको हुँ । गगनको कुरामा राज्य किन अघि आयो ? अवश्य नै प्रधानमन्त्री देउवाको निर्देशनमा प्याक्टले विज्ञप्ति गरेर प्रतिरक्षा ग¥यो । त्यो प्याक्टले गर्ने होइन नि । मुख्यमन्त्री भए पनि हिसाबकिताब त खोजिन्छ । बम पड्केपछि सहानूभूति भोट आएर उहाँले जित्नुभयो । तर, सरकारले त्यो पटका बम हो कि साँच्चिकै बम हो भन्ने पत्ता लगाउनुपर्दैन ? निर्वाचन अभियान नै रोकेर विशेष छानबिन गर्नुपथ्र्यो नि होइन ? उनीहरूले गरेनन्, त्यसैले उक्त घटना रहस्यात्मक नै छ ।

उपत्यकाको सडक विस्तार किन अघि बढ्न नसकेको होला ?

यसमा मेरो सूत्र लागू नभएर सडक विस्तार हुन नसकेको हो । जग्गा एकीकरणमार्फत नै हरेक विकास निर्माणको काम गर्नुपर्छ । तब मात्रै सहज रूपमा काम गर्न सकिन्छ । नागढुंगा–त्रिपुरेश्वर सडकखण्डको मापदण्ड दायाँ–बायाँ २५–२५ मिटर मापदण्ड तोकियो । तर, सरकारले स्थानीयलाई चलनचल्ती अनुसारको क्षतिपूर्ति र मुआब्जा उपलब्ध गराएन । यसमा दायाँ–बायाँ गरे ५० मिटरको होइन, ७० मिटरको बाटो बनाउनुपथ्र्यो । त्यो क्षेत्रमा बाटोको पाँच सयदेखि सात सय मिटर वरपर बस्ती भत्काएरै एकीकृत बस्ती बसाल्नुपथ्र्यो । तर, त्यो हुन सकेन । बाटोछेउका घरधनी सबै विस्थापित हुनुपर्ने भयो, उनीहरूलाई राज्यले चलनचल्ती अनुसारको मुआब्जा दिएन । त्यसैले स्थानीय आक्रोशित भएका हुन् । त्यो ठाउँमा जग्गा एकीकरणमार्फत नै व्यवस्थित गर्नुपथ्र्यो । कोही विस्थापित हुँदैनथे । त्यो हुन नसक्दा अहिले समस्या उब्जिएको हो । जनतालाई दुःख दिएर मात्रै समस्या समाधान हुँदैन । चलनचल्तीमा ५० लाख आना पर्ने जग्गालाई सरकारी नियमअनुसार ६ लाख उपलब्ध गराउँदा समस्या भएको हो।

तपाईंले आफ्नो कार्यकालमा नयाँ बसपार्क र धरहराको स्वामित्व, भोगचलन निजी क्षेत्रलाई दिनुभयो, तर उनीहरूले कमाइखाने भाँडो मात्रै बनाए नि ?

सरोकारवाला निकाय काठमाडौं महानगरपालिकाले यसलाई हेर्नुपर्ने हो । पहिला धरहरा र नयाँ बसपार्क क्षेत्रमा चोरी लुटपाट र अस्तव्यस्त हुन्थ्यो । यहाँ विभिन्न प्रकारका उच्छृंखल तथा आपराधिक क्रियाकलाप हुन्थ्यो । त्यो बेला बसपार्क क्षेत्रमा सवारीसाधनभित्रै एउटी महिलाको बलात्कार समेत भयो । त्यसको नैतिक जिम्मेवारी समेत मेयरले लिनुप¥यो भनेर दोषजति ममाथि थुपारेर अराजक राजनीति गर्न थालियो । त्यसपछि बसपार्क र धराहराको रेखदेख, सञ्चालनको जिम्मेवारी निजी क्षेत्रलाई दिइएको हो । अब ती निजी क्षेत्रलाई नियम–कानुनमा बाँध्ने काम महानगरको हो । अब म मुख्यमन्त्री भएँ भन्ने त्यसको जिम्मेवार लिएर नै अघि बढ्नेछु ।

तपाईंले काठमाडौंमा ‘लभ पार्क’ बनाउने भन्नुहुन्थ्यो ?

अहिले पनि लभ पार्कको आवश्यकता उत्तिकै छ । प्रेम भन्नाले युवायुवतीको उच्छृंखल गतिविधि मात्रै होइन । प्रकृतिसँग नजिकिने, चराचुरुंगीको आवाज सुन्ने, विभिन्न थरीका जनावर हेर्ने, घुलमिल गर्ने कुरा हो । बालाजुमाथि लभ पार्क बनाउन २७ सय पृष्ठको योजना बनाइसकेको छु । मुख्यमन्त्री हुनेबित्तिकै लभ पार्कको योजना अघि बढाउनेछु । प्रदेशमा सयौँभन्दा धेरै स्थानमा लभ पार्क बनाएर प्रेमिल वातावरण बनाउनेछौँ ।

पाँच वर्षभित्रै उपत्यकामा मोनोरेल ल्याउनुहुन्छ त ?

मोनोरेल त होइन, ‘सस्पेन्सन्स’ रेल–वे भने पक्कै ल्याउनेछु । यो एक प्रकारको केबल कारजस्तै हुन्छ ।

असरल्ल र भद्रगोल काठमाडौं उपत्यकालाई सुधार्ने योजना के छ ?

अब कम्तीमा दुई वर्षभित्रै उपत्यकाको भद्रगोल अन्त्य हुनेछ । उपत्यकामा अबको डेढ वर्षपछि धुलोको अन्त्य हुनेछ । मेलम्चीको पानी आउनेछ । बिजुलीको समस्या हट्नेछ । उपत्यकामा अकासेपानी संकलनका लागि ‘रिजरभोयर’ बनाएर व्यवस्थित गर्नेछौँ । सहरी सेवा केन्द्र बनाएर जनताको पीर तथा मर्काको अन्त्य गरिनेछ । केन्द्रमा निःशुल्क स्वास्थ्य सेवा, युवाका लागि खेलकुदको गतिविधि, ज्येष्ठ नागरिकको  हेरचाह केन्द्र, सस्तोमा खाना तथा आवासको समेत व्यवस्था गर्नेछौँ । त्यसपछि त जनताको अन्य आवश्यकताको परिपूर्ति गर्नेछौँ ।

 

उपत्यकाको ट्राफिक जाम व्यवस्थापनको योजना के छ ?

उपत्यकामा दुई वर्षभित्रै ट्राफिक जामको अन्त्य गर्छाैं । सबै ठाउँमा कार पार्क बनाइनेछ । भित्री सडकमा गाडी प्रतिबन्ध लगाइनेछ । पुरानो बसपार्क बन्दैन । सवारीसाधन पिक तथा ड्रप मात्रै गरिनेछ । साझाको भन्दा ठूला पाँच सय बस मगाइनेछौँ । जसमा अपांग र महिला तथा ज्येष्ठ नागरिकमैत्री सवारीसाधन गुडाइनेछ । देश बनाउने भनेको मःमः बनाएजस्तै हो ।






यसमा तपाईको मत

तपाईंको रुचि अनुसारको समाचारको लागि खाता खोल्नुहोस् ।

अन्य समाचार

सेल्फि र सेल्फि फोनको लहर

सेल्फि र सेल्फि फोनको लहर

सेल्फि फोनको ट्रेन्डलाई नियालेर हेर्दै र सेल्फि क्यामरा राम्रो हुनलाई केको आवश्यकता पर्छ भन्ने विषयमा टिप्पणी । ...

ट्याब्लेट रोज्दा खोज्नुपर्ने उत्तरहरु

ट्याब्लेट रोज्दा खोज्नुपर्ने उत्तरहरु

सानदार स्क्रिन हुने, बोक्न गाह्रो नहुने र चलाउन सजिलो हुने भएकाले ट्याब्लेट छोटो समयमा नै अत्यधिक लोकप्रिय भएको छ ।...

ल्यापटप छान्न सरल

ल्यापटप छान्न सरल

गाह्रोभन्दा गाह्रो कामहरु पनि सजिलै गर्न मिल्ने तर जता पनि सजिलै बोकेर हिंड्न मिल्ने भएकाले ल्यापटप अहिले पुराना शैलीका डेस्कटप...

टिभीको नयाँ रुपलाई नियाल्दा

टिभीको नयाँ रुपलाई नियाल्दा

टिभी हेर्न सजिलो छ । किन्न भने त्यति सरल नहुन सक्छ । अहिले पुराना शैलीका सिआरटि टिभीहरु उत्पादन हुन छोडिसके...

बसन्त पञ्चमीमा साँगीतिक कन्सर्ट

बसन्त पञ्चमीमा साँगीतिक कन्सर्ट

झण्डै डेढ महिनादेखी बढेको चिसोविच सोमवार मनाइएको बसन्तपञ्चमीको अवरमा वीरगन्जस्थित ठाकुरराम बहुमुखि क्याम्पसमा आयोजित साँगितिक कन्सर्टले माहोल ततायो। ...

‘हस्पिटालिटी नेपाल कन्टेस्ट’को पोखरामा अडिसन

‘हस्पिटालिटी नेपाल कन्टेस्ट’को पोखरामा अडिसन

दोस्रो सिजनको हस्पिटालिटी नेपाल कन्टेस्टको पहिलो अडिसन पोखरामा भएको छ। शनिबार पोखरामा भएको अडिसनमा कुल २८ जनाले सहभागिता जनाएका थिए।...

चीनमा रुचाइयो आमिरको पछिल्लो फिल्म

चीनमा रुचाइयो आमिरको पछिल्लो फिल्म

बलिउडका ‘मिस्टर परफेक्शनिष्ट’ आमिर खानको पछिल्लो फिल्म ‘सिक्रेट सुपरस्टार’लाई चीनमा रुचाइएको छ। भारतीय सञ्चारमाध्यमका अनुसार यो फिल्मले चिनियाँ बक्स अफिसमा...

प्रदर्शन मिति नजिकिँदा ‘पद्मावत’ को विरोध बढ्दो

प्रदर्शन मिति नजिकिँदा ‘पद्मावत’ को विरोध बढ्दो

सञ्जयलिला भन्सालीको विवादित फिल्म ‘पद्मावती’को विरोध बढिरहेको छ। जनवरी २५ मा प्रदर्शन हुने फिल्मको रिलिज मिति नजिकिँदा भारतका विभिन्न राज्यमा...