महिनाको जोडी

राजेशको जिन्दगीमा मिठास घोल्ने मधु

बुधबार, ०६ बैशाख २०७४, १४ : १४ नागरिक | Kathmandu


अनिल यादव

तीन वर्षअघिसम्म राजेश हमाललाई सताइरहने प्रश्न थियो– बिहे कहिले गर्ने ? विराटनगरकी मधु भट्टराईसँग लगनगाँठो कसेपछि उनले यो प्रश्नबाट छुटकारा पाए । राजेश भन्छन्, ‘मेरो जिन्दगीमा मधुको प्रवेश नभएको भए सायद बिहे नै हुन्थेन ।’

काठमाडौँ, लैनचोरस्थित एक कफीसपमा भेटिएका राजेश र मधु नागरिक परिवारसँग आफ्नो प्रेम र जोडीबारे निकै खुलेर प्रस्तुत भएः

राजेश निर्णायक, मधु प्रतिस्पर्धी
सन् २००४ मा होटल हायातमा एउटा सौन्दर्य प्रतियोगिता भएको थियो– लक्स ब्युटी कन्टेस्ट । राजेश त्यहाँ निर्णायकका रूपमा पुगेका थिए भने मधु प्रतिस्पर्धी थिइन् । मधु त्यतिबेला प्लस टूकी विद्यार्थी थिइन् । सिम्पल र शालीन मधुमा राजेशको नजर गढ्यो । तीन दिनसम्म चलेको कार्यक्रममा उनीहरूबीच सामान्य चिनजान भयो । ‘उहाँले मलाई भिजिटिङ कार्ड दिनुभयो र मन लाग्यो भने फोन गर भन्नुभयो,’ मधुले सम्झिइन् ।
थुप्रै प्रतिस्पर्धीमध्ये राजेशले मधुलाई नै किन आफ्नो पर्सनल नम्बर दिए त ? ‘उनी ठीकै लाग्यो, त्यही भएर,’ राजेशले मुस्कुराउँदै भने । ‘ठीकै मात्र त होइन होला ?’ छेउमै रहेकी मधुले राजेशलाई हेर्दे भनिन् । जवाफमा राजेश मुस्कुराए मात्र । त्यो कार्यक्रमको अन्तिम साँझ डान्स पार्टी पनि भएको रहेछ । जहाँ राजेशले मधुलाई नाच्न आग्रह पनि गरेछन् । ‘उहाँले नाचौँ भन्नुभएको थियो, मेरो खुट्टामा घाउ थियो, त्यसैले मानिनँ,’ मधुले सुनाइन् । ‘मैले खासै जोड पनि गरिनँ, अरू युवतीहरूसँग नाचेँ,’ राजेशले हाँस्दै भने ।

तीन वर्षअघिसम्म राजेश हमाललाई सताइरहने प्रश्न थियो– बिहे कहिले गर्ने ? विराटनगरकी मधु भट्टराईसँग लगनगाँठो कसेपछि उनले यो प्रश्नबाट छुटकारा पाए । राजेश भन्छन्, ‘मेरो जिन्दगीमा मधुको प्रवेश नभएको भए सायद बिहे नै हुन्थेन ।’

 

पहिलो डेटिङ
पहिलो भेट भएको दुई हप्तासम्म राजेशको मोबाइलमा मधुको फोनको घन्टी बजेन । राजेश आफ्नै देनिकीमा फर्किसकेका थिए । दार्जिलिङको कार्यक्रम सकेर झापा, भद्रपुर आइपुगेका थिए । भोलिपल्ट काठमाडौँ फर्किने कार्यक्रम थियो । अचानक एउटा नयाँ नम्बरबाट फोन आयो । राजेशले उठाए । ‘म मधु,’ मधुको फोन रहेछ । ‘को मधु ?’ राजेशले नचिनेझैँ गरे । मधुले ‘हायातको कार्यक्रममा भेटेको’ भनेर सम्झाइन् । ‘फोन गरेको भोलिपल्ट उहाँको बर्थडे रहेछ । डिनरका लागि होटल सांग्रिलामा बोलाउनुभयो । त्यहीँ हाम्रो पहिलो डेटिङ भएको हो,’ मधुले सम्झिन् ।

प्रेम प्रस्ताव राखिएन
प्लस टू सकेपछि अध्ययनका लागि मधु काठमाडौँ आइन् । भेट भएको १० वर्षपछि उनीहरूको बिहे भयो । ‘सुरुसुरुमा त्यति भेट हुँदैनथ्यो,’ राजेशले सम्झिए, ‘बाक्लो भेटघाट भएको चाहिँ छ वर्ष भएको थियो । एकअर्कालाई प्रेम प्रस्ताव नै त राखेनौँ, तर  भावनात्मक रूपमा हामी असाध्यै नजिक थियौैँ ।’
‘आई लभ यू भनेर हामीले एक–अर्कालाई प्रपोज नै त कहिल्यै गरेनौँ,’ मधुले थप प्रस्ट पार्न खोजिन् । ‘प्रेम चाहिँ खूब झल्किन्थ्यो है तिम्रो प्रस्तुतिमा,’ मधुको अनुहार हेर्दै राजेशले भने ।

मधुकै दबाबमा बिहे
उमेर ५० वर्ष पुगिसक्दा पनि राजेशले बिहे गरेका थिएनन् । उनी खासमा आफ्नो जीवनलाई दार्शनिक हिसाबले हेर्थे । बिहेको सोचमा थिएनन् । ‘म खासमा बिहे नै नगर्ने निर्णयमा पुगिसकेको थिएँ, ’ राजेशले भने, ‘संसारमा कोही मान्छे यस्ता हुन्छन्, जो घरव्यवहार र परिवारप्रति त्यति रुचि राख्दैनन् । ती सीमित व्यक्तिमध्ये म पनि पर्थें । जीवनको लक्ष्य भनेको बिहे गर्ने, बच्चा जन्माउने मात्र हो भन्ने लाग्दैनथ्यो । जीवनमा बिहे जरुरी नै छ जस्तो लाग्दैनथ्यो ।’ आफूले दबाब नदिएको भए राजेश बिहे गर्न तयार हुने थिएनन् भन्ने कुरा मधु स्विकार्छिन् । ‘उसले एकदमै चाहना नराखेको भए बिहे नहुन पनि सक्थ्यो, होइन त ?’ मधुतिर हेर्र्दै राजेशले सोधे । ‘हो नि,’ मधुले भनिन्, ‘तर, हजुरले मन पराएको त हो नि । त्यही पनि खासमा हजुर बिहे गर्ने टाइपको मान्छे चाहिँ होइन । आम मान्छेभन्दा फरक हुनुहुन्छ । बिहे गर्नुपर्छ, बच्चा पाउनुपर्छ भन्ने सोच छैन ।’
अन्ततः उनीहरूको बिहे भयो । ‘ऊप्रतिको निकटता र प्रेमले गर्दा मैले बिहे नगर्ने बहाना भेटिनँ,’ राजेशले भने, ‘अर्को कुरा, खासमा मेरै कारणले गर्दा छ÷सात वर्ष बिहे गर्न ढिला भएको थियो । उनले त पहिलेदेखि बिहे गरौँ भनिरहेकी थिइन् ।’

फ्यान थिइनन् मधु
कतिपयलाई विश्वास नलाग्न सक्छ । तर, राजेश हमालकी श्रीमती फिल्मप्रेमी होइनन् । राजेशलाई भेट्नुअघि उनी राजेशको फ्यान पनि थिइनन् । ‘म उहाँलाई हिरो हो भनेर चिन्थेँ,’ मधुले भनिन्, ‘तर, त्यस्तो फ्यान नै चाहिँ थिइनँ । म कसैको फ्यान होइन । फिल्मप्रति मेरो सानैदेखि त्यति रुचि पनि थिएन । सानो छँदा धरानमा उहाँको ‘गोपीकृष्ण’ फिल्म हेरेको अलिअलि याद छ । ’

राजेशभन्दा मधु बुढी !
राजेश र मधुबीच उमेरको ‘राम्रै’ ग्याप छ । सम्बन्धमा यसले कत्तिको फरक पार्दो रहेछ ? प्रश्न सोध्नासाथ राजेशले पनि जवाफ मधुसँग खोजे । ‘छैन, मलाई त त्यस्तो केही लाग्दैन,’ मधुले भनिन् । त्यसपछि राजेश स्वयंले भने, ‘खासमा मेरो जोश, जवानी र इनर्जी देखेर उनी चाहिँ मलाई सोध्ने गर्छिन्, ‘म तिम्रा लागि बुढी भएँ कि क्या हो ?’’ मधुले मुन्टो हल्लाएर स्वीकार गरिन् । ‘हो, हामी सँगै व्यायाम गर्छौं, सँगै दौडिन पनि जान्छु,’ मधुले भनिन्, ‘त्यतिबेला उहाँको फुर्ती र इनर्जी देखेर म चकित हुन्छु । त्यसपछि म पो बुढी भएँ कि जस्तो महसुस हुन्छ ।’ मधुले यति भन्नासाथ राजेशले ठट्टा गरे, ‘अहिलेसम्म त ठीकै छ । दुईचार वर्षपछि अलि बुढी हुने हौ कि मेरा लागि ?’

राजेशका हजारौँ प्रशंसक छन् । युवती फ्यान पनि उत्तिकै छन् । कहिलेकाहीँ मधुले शंका गरिहाले राजेशले फकाउनलाई आफ्नो  उमेर सम्झाउँदा रहेछन् । ‘बेलाबेलामा मैले उसलाई म फिप्टी प्लसको मान्छे हो, किन ममाथि शंका गर्छौ भनेर सम्झाउनुपर्छ,’ राजेशले भने । ‘उमेरले पनि शंका गर्ने÷नगर्ने हुन्छ र ?’ मधुले तत्काल जवाफ फर्काइन्, ‘उहाँ त्यति ह्यान्डसम, ट्यालेन्टेड हुनुहुन्छ । शंका त लागिहाल्छ नि । तर, मलाई उहाँको चरित्र थाहा छ । त्यसैले रिसाइहाल्दिनँ ।’

समझदार जोडी
राजेश र मधुका नजरमा सम्बन्धलाई टिकाइराख्ने र बलियो बनाउने कडी भनेको समझदारी हो । ‘हामी दुवै फरक–फरक विचारधाराका मान्छे हौँ,’ राजेशले भने, ‘सबै कुरा नमिल्न सक्छ । त्यही पनि हामी सँगै छौँ भनेपछि हामीबीच समझदारी छ, विश्वास छ ।’ मधुले त्यसमा थपिन्, ‘प्रेम पनि त छ ।’
मधुलाई राजेशको के कुराले आकर्षित गरेको हो ? ‘उहाँलाई मैले सेलिब्रिटी होइन, असल व्यक्ति ठानेर बिहे गरेकी हुँ,’ मधुले भनिन्, ‘मलाई उहाँका सबै कुरा मन पर्छन् । मान्छे मन परेपछि सबै मन पर्दोरैछ । उहाँको व्यक्तित्व नै मन पर्छ मलाई ।’ राजेश पनि मधुबारे एक वाक्यमा भन्छन्, ‘उनको चरित्र र स्वभाव नै हो, मलाई मन पर्ने ।’

राजेशको अनौठो बानी
अरूका बारे जोक्स बनाएर मान्छे हँसाउनेहरू त हामीले देखेसुनेकै हौँ । तर, अभिनेता राजेश हमालको एउटा अनौठो बानी छ । ‘उहाँ आफ्नो मजाक आफैँ उडाउनुहुन्छ, आफ्नो जोक आफैँ बनाएर हँसाउनुहुन्छ,’ राजेशको स्वभावबारे मधुले भनिन्, ‘अरूको कुरा काट्ने बानी नै छैन उहाँको । मैले कहिलेकाहीँ अरूको कुरा गर्न खोजेँ भने पनि उहाँ सुन्नुहुन्न ।’  राजेशले त्यसमै थपिदिए, ‘हो, म अरूको जोक्स कहिल्यै गर्दिनँ, अरूबारे गसिप पनि गर्दिनँ । कसैको टीकाटिप्पणी पनि गर्दिनँ । टिप्पणी, मूल्यांकन, मजाक, जोक्स जे गर्नुपरे पनि आफ्नै बारेमा मात्र गर्छु ।’

मधु घरको कलाकार
श्रीमान–श्रीमतीबीच कहिलेकाहीँ ठाकठुक त पर्दो हो ? मधु जवाफ दिन तम्सिहालिन्, ‘खासमा उहाँ त्यति रिसाउने मान्छे होइन । मेरो मुड चाहिँ चेन्ज भइरहन्छ । कहिलेकाहीँ झ्वाट्टै रिसाइहाल्छु ।’ त्यसपछि मधुकै कुरामा राजेशले हाँसीहाँसी थपिदिए, ‘खासमा मैले एक्ट नगरे पनि ऊ रिएक्ट गरिहाल्छ । उसको दिमागमा मलाई कसैले मन पराइरहेजस्तो लाग्यो भने ऊ त्यो होस÷नहोस्, रिएक्ट गरिहाल्छ । खासमा म दर्शकको कलाकार भए पनि घरको कलाकार चाहिँ ऊ हो । कसैले एक्ट नगरीकन रिएक्ट गरिहाल्छ ।’ आफूप्रतिको टिप्पणी सुनेपछि मधुले राजेशतर्फ हेर्दै सुस्तरी भनिन्, ‘एकदम पीडित भएजस्तो कुरा नगरिस्योस् न ।’

कन्टेन्ट जोडी
राजेश र मधु आफूहरूको जोडीलाई ‘कन्टेन्ट’ जोडी भन्न रुचाउँछन् । ‘हामी जे छ, त्यसमै रमाउँछौँ, सन्तुष्ट छौँ,’ उनीहरू दुवैको एउटै आवाज थियो । मधुले थपिन्, ‘शतप्रतिशत सन्तुष्ट जोडी हौँ हामी ।’ राजेश स्वीकृतिमा मुस्कुराए । र, थपे, ‘मधुले मेरो जिन्दगीमा मिठास घोलिदिइन् ।’ उनले यसो भनिरहँदा मधुको अनुहार दोब्बर चम्किलो भएको थियो ।

(नागरिक परिवारबाट)







यसमा तपाईको मत

तपाईंको रुचि अनुसारको समाचारको लागि खाता खोल्नुहोस् ।

अन्य समाचार

आयो मिष्टर झोले !

आयो मिष्टर झोले !

चार वर्ष अघि निर्माण भएको डार्क कमेडी फिल्म ‘झोले’सँग नाम मिल्ने गरी बनाइएको फिल्म ‘मिष्टर झोले’को ट्रेलर सार्वजनिक भएको छ...

वितरकको पैसा फिर्ता गर्दै शाहरुख

वितरकको पैसा फिर्ता गर्दै शाहरुख

बलिउडमा ‘किङ खान’का रुपमा परिचित अभिनेता शाहरुख खानको पछिल्लो फिल्म ‘जब ह्यारी मेट सेजल’ बक्सअफिसमा फ्लप भयो । आफैले निर्माण...

विराट र अनुस्काको इटालीमा लगनगाँठो

विराट र अनुस्काको इटालीमा लगनगाँठो

भारतीय क्रिकेट टोलीका कप्तान विारट कोह्ली र बलिउड अभिनेत्री अनुस्का शर्मा वैवािहक बन्धनमा बाँधिएका छन्। उनीहरुले आज इटालीको फ्लेरेन्स सहरमा...

विवाहअघि नै गर्भवती मेघान ?

विवाहअघि नै गर्भवती मेघान ?

अमेरिकी अभिनेत्री मेगान मार्केल र बेलायती राजकुमार ह्यारीको हालैको इन्गेजमेन्ट र आगामी वर्षको मे महिनामा विवाह गर्ने समाचारले विश्वमा राम्रै...